بالكىم, كاسىپكەرلىك ىسكە جەتە توسەلە قويماعان نازىك جان جەرگىلىكتى نارىقتاعى تاجىريبەلى ارىپتەستەرىمەن باسەكەلە الماس. دەگەنمەن تىنىمسىز ىزدەنە ءجۇرىپ ادامدار كۇندەلىكتى تۇرمىستا ءجيى قولداناتىن ءونىمنىڭ بارىنشا تابيعي تۇردە شىعارىلۋىنا دەگەن ۇمتىلىسى مەن العاشقى قادامى قۇپتاۋعا تۇرارلىق. سۇرانىستىڭ بۇلايشا كۇرت ارتاتىنىن گۇلشاتتىڭ ءوزى دە كۇتپەسە كەرەك.
كەيدە تاڭدانىسىن جاسىرا الماعان كۇيى باسىن انتەك شايقاپ قوياتىنى بار. مۇنىڭ ءوزى ودان ءارى شىعارماشىلىق شابىتپەن ىزدەنە تۇسۋىنە جول اشىپ, ەندى شامپۋن جاساۋعا دا كوشتى.
بۇگىندە ءوتىمدى ونىمگە اينالىپ وتىرعان سابىننىڭ جاسالۋ تەحنولوگياسى قاراپايىم. نەگىزىنەن دارىلىك وسىمدىكتەردى پايدالانادى. قاجەتتى گۇلدەر مەن شوپتەردى ءوزى وسىرەدى. وسى سەبەپتى ەكولوگيالىق جاعىنان تازا ءارى باعاسى دا قولجەتىمدى. وتىنىشتەر كوبىنە ەلوردالىق مەن رەسەيلىك تۇتىنۋشىلار تاراپىنان كوپتەپ ءتۇسىپ جاتادى.
–بۇرىندارى اجەلەرىمىز ساقار قايناتىپ, قارا سابىن دايىنداۋشى ەدى عوي. اتا-بابامىزدىڭ وسى كونە ءداستۇرىن زامان اعىمىنا قاراي تەحنولوگيالىق جاعىنان جاڭعىرتىپ, ارنايى رەتسەپت بويىنشا تۇزەمىن. ارالاستىراتىن قوسپالارعا تۇيمەداق, قاراعاي ينەلەرى, شايىر, سالبەن قوسىلىپ, حوش ءيىسى مۇرىن جاراتىنداي بولۋى كەرەك. بەلگىلى مولشەردە قايناتىلعاننان كەيىن دايىن شامپۋن ارنايى ىدىستارعا قۇيىپ الىنادى,– دەيدى «شاكىروۆا» جك جەتەكشىسى گۇلشات شاكىروۆا.
ول قازىر سۋسابىننىڭ ەرلەرگە جانە ايەلدەرگە ارنالعان تۇرلەرىن ازىرلەۋگە كىرىسكەن. الداعى ماقساتى – تۇتىنۋشىلارعا ەمدىك سابىن ۇسىنۋ. ونى دايىنداۋ ءۇردىسى كۇردەلىلەۋ ءارى كوپ ۋاقىتتى الاتىنىنا قاراماستان كوزدەگەن ماقساتىنا جەتپەي تىنبايتىن ەڭبەكقور كاسىپكەر كادەگە جاراتىلاتىن ونىمدەردى سۇرىپتاپ قويىپتى. بەتتەگى بەزەۋ, دەنەدەگى بورتپە, قىشىما, اللەرگيالىق كەسەلدەرگە پايداسى زور كورىنەدى.
گۇلشات بۇل سالامەن ءۇش جىلدان بەرى اينالىسىپ كەلە جاتسا دا, جەتكەن جەتىستىكتەرى قۋانتارلىق.
سولتۇستىك قازاقستان وبلىسى