ونەردىڭ, سونىڭ ىشىندە قولونەردىڭ ءتۇرى كوپ, ءتىپتى زامان اعىمىنا ساي بۇل سالا جاڭعىرىپ-جەتىلىپ كەلەدى دەسە دە بولادى. الايدا قازاقتىڭ ءداستۇرلى ونەرىن, سونىڭ ىشىندە كيىز ءۇي جابدىقتارىنا قاتىستى تولونەردى تاسادا قالدىرۋ مۇمكىن ەمەس.
وكىنىشتىسى, قازىر اق, قارا ءتۇستى ورە كيىزدەر مەن تالدىرما باسىپ, ونى ويناتا ويىپ, مىڭ قۇبىلعان ويۋلى تەكەمەت باسۋ, دالادان باپپەن شي سۋىرىپ, ونى ەپپەن ارشىپ, مىڭ بوياۋلى جۇنگە وراپ ويۋلى شي توقۋ, ۇرشىق ءيىرۋ, قۇراق قۇراۋ, باۋ-باسقۇر توقىپ, سىرعالاق اينالدىرۋ, شاشاق دايىنداۋ – وزگە دە باعزىدان ءمىنى قۇرىماي جەتكەن ۇلتتىق قولونەرمەن اينالىساتىنداردىڭ جاسى قازىر 70-تەن اسىپ بارادى. جاستاردىڭ بۇل دۇنيەلەردى جاساۋعا قىزىعۋشىلىعى جوق ەمەس, تەك جالىقپاي ۇيرەتەتىن جاسقا دا, ونەرگە دە جاناشىر جان بولسا...
ماڭعىستاۋدا بۇل جاۋاپكەرشىلىكتى حاس شەبەر اۋەس ساعىناەۆا باستاعان انالار ءوز قولدارىنا الدى. قارشادايىنان ەل ىشىندەگى قولى شەبەر انا-اپالاردان ءىس ىستەۋدىڭ قىر-سىرىنا قانىعىپ, ەرىنبەي ۇيرەنۋمەن وسكەن ول ءومىرىن وسى سالاعا ارنادى. تىنىمسىز ۇزاق جىلعى ەڭبەكتىڭ جەمىسى دە از بولمادى. مادەنيەت سالاسىنىڭ ۇزدىگى, قازاقستان قولونەر شەبەرلەرى وداعىنىڭ مۇشەسى, ماڭعىستاۋ وبلىسى قولونەر شەبەرلەرى وداعىنىڭ پرەزيدەنتى, «التىن ويماق» قولونەردى قولداۋ قورىنىڭ جەتەكشىسى ءا.ساعىناەۆا جاقىندا نۇر-سۇلتان قالاسىندا وتكەن قولونەر شەبەرلەرىنىڭ فورۋمىنا بارىپ, ارنايى شەبەرلىك ساعاتىن وتكىزدى.
قازاقستان رەسپۋبليكاسى مادەنيەت جانە سپورت مينيسترلىگىنىڭ جانە ماڭعىستاۋ وبلىستىق مادەنيەت باسقارماسىنىڭ قولداۋىمەن, ماڭعىستاۋ اۋداندىق كاسىپكەرلەر پالاتاسىنىڭ ۇيىمداستىرۋىمەن اۋەس العاش بولىپ شەبەرلىك ساعاتىن شەتپە اۋىلىنان باستاپ, قىزىعۋشىلىق تانىتقان جانە ءوز كاسىبىن اشقىسى كەلگەن شەتپەلىك 20 قىز-كەلىنشەككە تەگىن كەڭەس بەرىپ, ءىس جاساۋدى ۇيرەتتى. ولار الدىمەن كەرەگە تاڭعىش توقىپ ۇيرەندى, كيىز باسىپ ماشىقتاندى. ماڭعىستاۋ وبلىسىندا ۇمىتىلىپ بارا جاتقان قازاقتىڭ ءداستۇرلى قول ونەرىن جاڭعىرتۋ جانە كاسىپكەرلىككە باۋلۋ اياسىندا وتكەن شاراعا اۋەس ساعىناەۆامەن بىرگە ماڭعىستاۋ اۋدانىندا كيىز ءۇي جابدىقتارىن جاساۋ, ەسكى قولونەر بۇيىمدارىن قايتا جاڭعىرتۋمەن اينالىسىپ جۇرگەن «اسىل قازىنا» جەكە كاسىپكەرلىگىنىڭ باسشىسى كۇمىس قوسباي جانە وڭىرگە بەلگىلى كيىز ءۇي جابدىقتارىن, قازاقتىڭ قولونەرىن دامىتۋعا زور ۇلەس قوسىپ جۇرگەن شەبەر شارقات تولەمىسوۆا دا قاتىستى. ۇيرەنگەندەرىنە ءدان ريزا بولعان قىز-كەلىنشەكتەر شەبەرلەرگە جانە ماڭعىستاۋ اۋداندىق «اتامەكەن» ۇلتتىق كاسىپكەرلەر پالاتاسىنا شەكسىز العىسىن ءبىلدىردى.
جەكە كاسىپكەر جاننا امانقۇلوۆانىڭ ايتۋىنشا, اۋەس اپانىڭ وزىنەن قولونەر بۇيىمدارىنىڭ قىر-سىرىن ۇيرەنۋ ۇلكەن مارتەبە. ويتكەنى ماڭعىستاۋدا ودان وتكەن حاس شەبەر جوقتىڭ قاسى. ۇلتتىق ونەرىمىزدى ۇلىقتاپ, ونى ۇرپاقتان-ۇرپاققا جەتكىزۋ ۇلكەن يگى ءىس.
– ۇلتتىق قولونەرىمىز – مادەنيەتىمىزدىڭ, سالت-ءداستۇرىمىزدىڭ ءبىر بولىگى. ونى كەيىنگى ۇرپاققا مۇرا ەتىپ ۇيرەتىپ كەتۋ پارىزىمىز دەپ سانايمىز. ويتكەنى ساف ونەردى ءجىتى بىلەتىن شەبەرلەردىڭ جاسى 70-ءتى القىمداپ قالدى. بىلگەنىمىزدى, بويىمىزداعى شەبەرلىكتى جاستارعا ءسىڭىرىپ جاتقان جايىمىز بار. ءتۋريزمدى دامىتقىمىز كەلسە, مادەنيەتتى دە ۇمىتپاۋىمىز كەرەك. ەلگە كەلگەن تۋريست تاريح پەن مادەنيەتپەن تانىسقىسى كەلەدى. بىلتىر جاپونيالىق تۋريست قولونەر شەبەرلەرىن ارالاعىسى كەلدى. ەندى ارنايى ورتالىق قۇرىلسا قۇبا-قۇپ, دەيدى جاقسى ىسكە باستاماشى بولىپ جۇرگەن شەبەر اۋەس ساعىناەۆا.
شەبەردىڭ ماقساتى – انالارىمىزدىڭ شەبەر وي-قيالىنىڭ, دۇنيەتانىم كوكجيەگىنىڭ كەڭدىگىنىڭ دالەلىندەي بولعان تەڭدەسى جوق ۇلتتىق قولونەردى جاستارعا ۇيرەتۋ بولسا, ارمانى – ارنايى قولونەر شەبەرلەرىنىڭ ورتالىعىن قۇرۋ. ۇرپاقتىڭ, ۇلتتىق مۇرانىڭ قامىن ويلاپ قاربالاسقان شەبەرلەردىڭ بۇل ارمانى ورىندالسا, ورتالىقتىڭ حالقىمىزعا ءتان ۇلتتىق ونەردى ۇيرەتۋشىلەر مەن ۇيرەنۋشىلەردىڭ, اسىرەسە جاستاردىڭ قىزىعۋشىلىقپەن باس قوسىپ, ىشىنەن قازاقىلىقتىڭ ءيىسى اڭقىپ, قولونەر بۇيىمدارىمەن جاسانعان ناعىز ۇلتتىق ورىن بولاتىنىنا ءسوز جوق.
شەتپەدەگى شەبەرلىك ساعاتىندا قاتىسۋشىلار تەكەمەت, الاشا توقۋ, كيىز باسۋ, باۋ-باسقۇر, كيىز ءۇي جابدىقتارىن توقۋدىڭ جولدارىن ۇيرەندى. شارا سوڭىندا ولارعا ارنايى سەرتيفيكاتتار تابىستالدى. ەندى ولار ءوز كاسىپتەرىن اشىپ, ۇلتتىق ونەرىمىزدى دارىپتەۋىنە بولادى.
اۋەس ساعىناەۆا مۇنداي شەبەرلىك ساعاتتارىن ماڭعىستاۋدىڭ بارلىق اۋىلدارىندا وتكىزۋدى جوسپارلاپ وتىر.
ماڭعىستاۋ وبلىسى