حالقىمىز رۋحانياتىندا قوبىزدىڭ الار ورنى ەرەكشە. وسى ميفتىك مۋزىكا قۇرالىنىڭ شاناعىنان حالىقتىڭ مۇڭ-زارى توگىلگەندەي, ءتىپتى قازاق دالاسىنىڭ مۋزىكا تىلىندەگى عاجايىپ كورىنىسىندەي اسەر بەرەدى. قوبىزشىلار تەك كۇي تارتىپ قانا قويعان جوق, ولار قوبىز اۋەنىمەن ەمشىلىك جاسادى.
تورعايدا حVIII عاسىردىڭ ەكىنشى جارتىسى مەن ءحىح عاسىردىڭ باسىندا ءومىر سۇرگەن قوبىزشىلاردىڭ ءبىرى تىلەپ اسپانتاي ۇلى بولاتىن. قوبىزشىنىڭ شىعارمالارى بۇگىنگە دەيىن وينالادى. ءوزى تىلسىم كۇشكە يە قوبىز ارقىلى ادام ەمدەپ, حالقىنا كومەگىن بەرگەن. ەل جادىندا ساقتالعان تىلەپ پەن سارىقىزدىڭ ماحاببات-تاعدىرى دا ونىڭ بيىك ادامگەرشىلىك, تازا جۇرەك يەسى ەكەنىن كورسەتەدى. 1820 جىلى پايعامبار جاسىندا دۇنيەدەن وتكەن تىلەپ قوبىزشىنىڭ سۇيەگى قازىرگى جانگەلدين اۋدانىنداعى احمەت بايتۇرسىنوۆ اۋىلىنان 60 شاقىرىمداي جەرگە قويىلعان ەكەن. بەلگىلى مەتسەنات, «تىلەپ» قايىرىمدىلىق قورىنىڭ پرەزيدەنتى, قوبىزشىنىڭ ۇرپاعى ساپار ىسقاقوۆ باباسىنىڭ باسىنا كەسەنە تۇرعىزدى.
كەسەنەنىڭ ۇزىندىعى 12 مەتر, ەنى 4 مەتر, بيىكتىگى 2,5 مەتر, ەكى جاعىندا بيىكتىگى 5 مەتر مۇناراسى بار. كەسەنەنىڭ قوس كوك كۇمبەزى الىستان كوز تارتادى. قۇرىلىستى سالۋشىلاردىڭ ايتۋىنا قاراعاندا, كەسەنە جۇمىسى مۇنىمەن توقتاپ قالمايدى. الداعى جىلدارى كەسەنەنىڭ قاسىنان ادامدار تۇنەيتىن قوسىمشا ءۇي سالىناتىن بولادى. تورعاي وڭىرىنەن عانا ەمەس, باسقا جاقتان دا ناۋقاس, پەرزەنت تىلەپ جۇرگەن جاندار ءالى كۇنگە دەيىن قوبىزشى زيراتىنىڭ باسىنا كەلىپ قونىپ, دۇعا ەتەدى. زيرات ەلدى مەكەندەردەن شالعاي بولعاندىقتان, ول جەرگە جەتۋ, تۇنەۋ قيىندىق تۋعىزاتىن. مەتسەنات ادامدار سەنىمىنە قۇرمەتپەن قاراۋ, جاعداي جاساۋ ءۇشىن دە كەسەنە جانىنان شاعىن ءۇي سالۋدى ويلاستىرىپ وتىرعانىن ايتتى.
قوستاناي وبلىسى,
جانگەلدين اۋدانى