قازاقستان رەسپۋبليكاسىنىڭ ساۋدا جانە ينتەگراتسيا ءمينيسترى باقىت سۇلتانوۆتىڭ جەنەۆاعا ساپارى اياسىندا قازاقستان رەسپۋبليكاسىنىڭ ۇكىمەتى مەن دۇنيەجۇزىلىك ساۋدا ۇيىمى اراسىندا دسۇ-نىڭ XII مينيسترلىك كونفەرەنتسياسىن وتكىزۋ تۋرالى كەلىسىمگە قول قويىلدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
دسۇ باس ديرەكتورى روبەرتو ازەۆەدو قازاقستاندى XII مينيسترلىك كونفەرەنتسياسىنىڭ توراعاسى قىزمەتىنە سايلانۋىمەن قۇتتىقتاپ, ءبىزدىڭ ەلىمىز وتكىزەتىن حالىقارالىق ساۋدا سالاسىنداعى جاھاندىق ءىس-شاراعا دايىندىق شەڭبەرىندە دسۇ-نىڭ تىعىز ىنتىماقتاستىققا دايىندىعىن راستادى.
سونىمەن قاتار ساۋدا جانە ينتەگراتسيا ءمينيسترى ب. سۇلتانوۆ دسۇ-نىڭ الداعى مينيسترلىك كونفەرەنتسياسىنىڭ ىقتيمال سۋبستانتيۆتىك قورىتىندىلارىن تالقىلاۋ ماقساتىندا دسۇ-عا مۇشە ەلدەردىڭ نەگىزگى ەلشىلەرىمەن كەزدەستى. كەزدەسۋ بارىسىندا ول بۇگىنگى كوپجاقتى ساۋدا جۇيەسى پروتەكتسيونيزم جانە بىرجاقتى ساۋدا شارالارى تۇرىندەگى تەڭدەسسىز سىن-قاتەرلەرگە تاپ بولاتىنىن اتاپ ءوتتى. وسىعان بايلانىستى مينيستر 2020 جىلى نۇر-سۇلتان قالاسىندا ماڭىزدى شەشىمدەر قابىلداۋ ماقساتىندا ەلدەردى بەلسەندى بىرلەسكەن جۇمىسقا شاقىردى, بۇل دسۇ-عا اعىمداعى سىن-قاتەرلەر مەن قاجەتتىلىكتەرگە تولىق سايكەس كەلۋگە مۇمكىندىك بەرەدى.
دسۇ-نىڭ XII مينيسترلىك كونفەرەنتسياسىنىڭ كۇن تارتىبىندەگى نەگىزگى كەلىسسوز باعىتتارى دسۇ-نى رەفورمالاۋ ماسەلەلەرى, قىزمەتتەردى رەتتەۋ, ينۆەستيتسيالار مەن ەلەكتروندىق ساۋداعا جاردەمدەسۋ سالاسىنداعى جاڭا جاھاندىق ەرەجەلەر, سونداي-اق بالىق اۋلاۋ سۋبسيديالارى بويىنشا كەلىسسوزدەر بولادى دەپ كۇتىلۋدە.
قازاقستان دسۇ-نى رەفورمالاۋ يدەياسىن قولدايدى جانە رەفورمالار دسۇ-عا مۇشە بارلىق ەلدەر ءۇشىن حالىقارالىق ساۋدانىڭ بىرىڭعاي باسەكەلەستىك شارتتارىن قامتاماسىز ەتۋى ءتيىس دەگەن ۇستانىمدى ۇستانادى.