نۇرسۇلتان نازارباەۆتىڭ اتىنا تاۋەلسىزدىكتىڭ قۇرداسى راۋان ەسەنقاننان حات كەلىپ ءتۇستى, دەپ حابارلادى تۇڭعىش پرەزيدەنت – ەلباسىنىڭ ءباسپاسوز قىزمەتى.
شار قالاسىنىڭ تۇرعىنى ءوز حاتىندا ەلباسىنىڭ تاۋەلسىزدىكتى نىعايتۋ جولىندا جۇرگىزگەن ساياساتىن قولدايتىندىعىن ايتىپ, ەلدىڭ ىنتىماعىن بۇزۋعا باعىتتالعان كۇشتەردىڭ كوبەيىپ جاتقانىنا الاڭداۋشىلىق بىلدىرگەن.
«سوڭعى كەزدەرى ەل ىشىنە ىرىتكى سالۋشىلار كوبەيىپ كەتتى. ول ءبىزدى قاتتى ۋايىمداتادى. حالىقتىڭ شىرقىن بۇزىپ, قايراپ, ۇگىتتەپ, قىلمىسقا يتەرمەلەپ ءجۇر. اڭقاۋلىق تانىتىپ كەيبىر قاۋەسەتتەرگە ەرىپ كەتەتىندەر بار. ءبىر سوزىڭىزدە: «قازاققا جانى اشيتىن ەكى ادام بولسا, ونىڭ ءبىرى مەن شىعارمىن», دەگەن ەدىڭىز. سول ەسىمدە قالىپ قويىپتى», – دەپ جازادى شار قالاسىنىڭ تۇرعىنى.
ر.ەسەنقان حاتىندا نۇرسۇلتان نازارباەۆتىڭ يادرولىق قارۋدان جاريا تۇردە باس تارتۋىنىڭ تاريحي ماڭىزىنا توقتالادى. سونىمەن قاتار قازاقستاننىڭ تۇڭعىش پرەزيدەنتىنىڭ ەلدىڭ بىرلىگىن ارتتىرىپ, مەملەكەتتىڭ تۇتاستىعىن قامتاماسىز ەتۋ جولىنداعى ەرەن ەڭبەگىنە العىسىن ءبىلدىرىپتى. ال ەلوردانىڭ سارىارقا تورىنە قونىس اۋدارۋى ەل ىنتىماعىن ودان ءارى بەكەمدەي تۇسكەنىن ايتادى.
«قازاقستانداعىداي ءومىر الەمنىڭ قانشا حالقىنا ارمان شىعار. ءبىر جەرلەردە ۇلتشىلداردان قىسىم كورسە, ءبىر جەرلەردە حالىق ىشەرگە سۋ, جەۋگە نان تابا الماي ءجۇر. ەندى ءبىرتالاي ەل كۇندىز كۇلكىدەن, تۇندە ۇيقىدان ايىرىلىپ, ۇستىنەن بومبىلانىپ جاتىر. ولاردىڭ قاسىندا ءبىزدىڭ ەلدىڭ جاعدايى جاقسى.
لاتىن الىپبيىنە اۋىسامىز دەگەندى ەستىگەندە قاتتى قۋاندىم. بۇل – تاۋەلسىزدىكتىڭ نۇكتەسى. رۋحاني جاڭعىرۋ دەگەن وسى. كەيبىرەۋلەر بارلىعى ءبىر كۇندە بولا قالسا دەيدى, كۇتۋگە شىدامى جەتپەيدى. بىراق مۇنداي ۇلكەن شارۋا از ۋاقىتتا ىستەلمەيدى, رەت-رەتىمەن بوي تۇزەپ كەلە جاتىرمىز», – دەپ جازادى تاۋەلسىزدىكتىڭ قۇرداسى.
سونداي-اق ر.ەسەنقان قازاقستاندى الەمگە تانىتۋدا ەكسپو-2017 حالىقارالىق كورمەسىنىڭ ماڭىزدى ءرول اتقارعاندىعىن اتاپ وتكەن.
«ەكسپو-عا كەلەتىن بولساق, ءبىز – جاس مەملەكەتپىز. ءوزىمىزدى ساقتاپ قالۋ قامىمەن الەم نازارىن اۋدارتۋ, بار ەكەنىمىزدى كورسەتۋ. نەعۇرلىم كوپ ەل تانىپ, مويىندايتىن بولسا, كومەكشىلەرىمىز دە, قولداۋشىلارىمىز دا كوبەيمەك. «اقىرىن ءجۇرىپ, انىق باس» دەپ اباي اتامىز ايتقانداي, ۇستانعان جولىڭىزدى قولدايمىز», – دەپ جازادى شار قالاسىنىڭ تۇرعىنى.
ءسوز سوڭىندا ول ەلباسىنا اماندىق, دەنىنە ساۋلىق تىلەگەن.
ءوز كەزەگىندە نۇرسۇلتان نازارباەۆ حات اۆتورىنا جىلى لەبىزدەرى ءۇشىن ريزاشىلىعىن ءبىلدىردى.