پرەمەر-ءمينيستردىڭ ورىنباسارى بەردىبەك ساپارباەۆ باستاعان ۇكىمەتتىك جۇمىس توبى شىمكەنت قالاسىنىڭ تۇرعىندارىمەن كەزدەستى.
كەزدەسۋگە قالا اكىمى ەرلان ايتاحانوۆ, دەنساۋلىق ساقتاۋ ءمينيسترى ەلجان ءبىرتانوۆ, ءبىلىم جانە عىلىم ءمينيسترى اسحات ايماعامبەتوۆ, ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ, مادەنيەت جانە سپورت ۆيتسە-ءمينيسترى وركەن بيساقاەۆ, اقپارات جانە قوعامدىق دامۋ ۆيتسە-ءمينيسترى دانيار ەسين قاتىستى.
ۆيتسە-پرەمەر ەل باسشىلىعى مەملەكەتتىڭ الەۋمەتتىك مىندەتتەمەلەرىن ورىنداۋعا جانە الەۋمەتتىك سالانى دامىتۋعا ەرەكشە نازار اۋداراتىنىن اتاپ ءوتتى. بۇعان رەسپۋبليكالىق بيۋدجەتتىڭ 45%-عا جۋىعىنىڭ الەۋمەتتىك سالاعا باعىتتالعانى دالەل. الايدا, قولداۋ ماسىلدىق پيعىلدىڭ ورشۋىنە سوقتىرماۋى كەرەك. مەملەكەتتىك كومەك تەك مۇقتاج ازاماتتارعا كورسەتىلۋى كەرەك. وسىعان بايلانىستى ۇكىمەت زاڭناماعا ءتيىستى وزگەرىستەر ەنگىزۋدى جوسپارلاپ وتىر.
بەردىبەك ساپارباەۆ الەۋمەتتىك قورعاۋ, دارىندى بالالاردى قولداۋ, جۇمىسپەن قامتۋ, مادەنيەت پەن سپورتتى دامىتۋ تۋرالى ايتتى.
شىمكەنتتىكتەر ۆيتسە-پرەمەر مەن مينيسترلەرگە ءوز سۇراقتارىن قويىپ, قالاۋلارى مەن ۇسىنىستارىن جەتكىزدى. اتاپ ايتساق, جەمقورلىقپەن كۇرەستى كۇشەيتۋ, ءبىلىم بەرۋ ساپاسىن ارتتىرۋ, حالىقتىڭ الەۋمەتتىك ءالسىز توپتارىن قولداۋ, الەۋمەتتىك قامسىزداندىرۋ جانە باسقا دا ماسەلەلەر قوزعالدى. بارلىق سۇراقتارعا جاۋاپ بەرىلدى. قوسىمشا پىسىقتاۋدى قاجەت ەتەتىن ماسەلەلەر بويىنشا ۆيتسە-پرەمەر زاڭناماعا سايكەس مۇمكىندىگىنشە قىسقا ۋاقىت ىشىندە جاۋاپ بەرۋدى تاپسىردى.
مەگاپوليستىڭ جاس بەلسەندىلەرىمەن, عالىمدارىمەن, كاسىپكەرلەرىمەن جانە سپورتشىلارىمەن كەزدەسۋ كەزىندە ب. ساپارباەۆ جاستاردىڭ سۇراقتارىنا جاۋاپ بەردى.
ستۋدەنتتەر ءبىلىم بەرۋ, سپورتتى دامىتۋ, جاستاردى قولداۋ جونىندەگى مەملەكەتتىك ساياساتتى ىسكە اسىرۋ ماسەلەلەرىنە قىزىعۋشىلىق تانىتتى.
«باسەكەلەستىك بارلىق جەردە بولۋى كەرەك, اسىرەسە ستۋدەنتتەر اراسىندا. 2019 جىل ‒ جاستار جىلى. بۇل بىرتىندەپ ەرىكتىلەر جىلىنا اينالادى. مەن وڭىرلەرگە ءجيى بارامىن, جاستارمەن كەزدەسەمىن. كوپتەگەن ءورشىل جانە ماقساتتى ادامداردى كورەمىن. سىزدەردە بارلىق مۇمكىندىك بار. ەڭ باستىسى, جاقسى ءبىلىم الۋ مۇمكىندىگى بار. ەندى جوو-لاردىڭ رەيتينگى تۇلەكتەردى جۇمىسقا ورنالاستىرۋ جانە ولاردىڭ نارىقتاعى سۇرانىسى بويىنشا جاسالادى», دەپ اتاپ ءوتتى ب. ساپارباەۆ.
كەزدەسۋ اياسىندا اقپارات جانە قوعامدىق دامۋ ۆيتسە-ءمينيسترى دانيار ەسين جاستار ساياساتىن جۇزەگە اسىرۋ تۋرالى ايتتى. ونىڭ ايتۋىنشا, ەلىمىزدىڭ بارلىق ايماقتارىندا كومەك كورسەتۋگە باعىتتالعان 200-دەن استام رەسۋرستىق ورتالىق, سونداي-اق جاستار ساياساتى سالاسىندا 500-دەن استام ۇكىمەتتىك ەمەس ۇيىم بار. سونىمەن قاتار جاس ۇرپاقتى ىنتالاندىرۋعا جانە قولداۋعا باعىتتالعان, جاستار جىلى اياسىندا قابىلدانعان جول كارتاسى ءساتتى جۇزەگە اسىرىلۋدا.
«جول كارتاسى 5 نەگىزگى باعىتتان تۇرادى. بۇل جۇمىس ىستەيتىن جاستاردى تۇرعىن ۇيمەن قامتاماسىز ەتۋ, جاستاردى جۇمىسپەن قامتۋ, ءبىلىم بەرۋ مەن ۆولونتەرلىكتى دامىتۋ, جاستاردىڭ الەۋمەتتىك بەلسەندىلىگىن دامىتۋ, جاس وتباسىلاردى قولداۋعا, دەنساۋلىقتى نىعايتۋعا جانە الەۋمەتتىك ينكليۋزيۆتىلىكتى قولداۋعا باعىتتالعان شارالار كەشەنى. ماسەلەن, شىمكەنتتە جۋىردا جۇمىس ىستەيتىن جاستارعا جالدامالى باسپانا بەرۋ ماسەلەسى باستالادى. 900 پاتەر بەرۋ جوسپاردا بار», دەدى دانيار ەسين.
ءوز كەزەگىندە, ۆيتسە-پرەمەر جاستارعا ماسىلدىق كوڭىل كۇيدى جويۋعا جانە جاڭا تسيفرلى تەحنولوگيالاردى يگەرۋگە, ءبىلىم مەن ەڭبەكقورلىققا ۇمتىلۋعا كەڭەس بەردى.
«جاستارعا مەملەكەتتىك گرانتتار بولىنۋدە. قازىر جۇمىس ىستەيتىن جانە داميتىن ۋاقىت. ونىڭ ۇستىنە مەملەكەت تەڭدەسسىز مۇمكىندىكتەر جاساپ جاتىر. جىل سايىن ءۇش مەگاپوليستىڭ جاس ماماندارىنا مىڭداعان جالدامالى پاتەر بەرىلىپ, جاڭا جۇمىس ورىندارى اشىلادى», دەدى پرەمەر-ءمينيستردىڭ ورىنباسارى.
م.اۋەزوۆ اتىنداعى وقمۋ ماگيسترانتى ساكەن ساعىندىم جاستار ءماسليحاتتارىنىڭ دامۋ پەرسپەكتيۆالارى تۋرالى سۇرادى.
«بيلىككە جاستاردى كوبىرەك تارتۋىمىز كەرەك. مۇنى ەڭ الدىمەن, جەرگىلىكتى اتقارۋشى ورگاندار قولعا الۋى كەرەك. مۇنداي ءماسليحاتتار كەيبىر قالالاردا, سونىڭ ىشىندە شىمكەنتتە دە قۇرىلعان. ولاردىڭ جۇمىسى تەك كۇشەيە تۇسەدى. قازىر مەملەكەتتىك قىزمەتتە جاس, ءبىلىمدى ادامدار از ەمەس, بۇل قۋانتارلىق جاعداي», دەدى ۆيتسە-پرەمەر.
كەزدەسۋگە قاتىسۋشىلار جاس كاسىپكەرلەردى, ولاردىڭ ستارتاپتارى مەن باستامالارىن قولداۋ تۋرالى ۇسىنىستارىن جەتكىزدى. سولاردىڭ ءبىرى – ۆوركاۋت-قوزعالىسىن دامىتۋ. قازىر شىمكەنتتە وسىنداي جەتى سپورت الاڭى بار.
سونىمەن قاتار بەردىبەك ساپارباەۆ ازاماتتاردى جەكە ماسەلەلەرى بويىنشا قابىلداپ, قالا ارداگەرلەرىمەن كەزدەستى.