سەربيا سارايىندا قازاقستان رەسپۋبليكاسىنىڭ ەلشىسى عابيت سىزدىقبەكوۆ سەربيا رەسپۋبليكاسىنىڭ پرەزيدەنتى الەكساندر ۆۋچيچكە سەنىم گراموتالارىن تاپسىردى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
ەكىجاقتى كەزدەسۋ اياسىندا ع.سىزدىقبەكوۆ سەربيا پرەزيدەنتىنە قازاقستانداعى الەۋمەتتىك-ەكونوميكالىق جاعداي جونىندە, سونداي-اق قىركۇيەك ايىنداعى پرەزيدەنت قاسىم-جومارت توقاەۆتىڭ جولداۋىندا بەلگىلەنگەندەي ەلدى ودان ءارى رەفورمالاۋ جانە قازاقستاندىق قوعامدى دامىتۋ جونىندەگى شارالار تۋرالى حاباردار ەتتى.
سۇحباتتاسۋ بارىسىندا ەكى ەل اراسىنداعى ىنتىماقتاستىقتىڭ بارلىق باعىتتارى بويىنشا, ءبىرىنشى كەزەكتە, ءوزارا ساۋدا جانە ينۆەستيتسيالار, قۇرىلىس جانە ينفراقۇرىلىم سالالارىنداعى ەكىجاقتى ىنتىماقتاستىقتىڭ الەۋەتى تالقىلاندى.
سونىمەن قاتار, ەكونوميكالىق ىنتىماقتاستىق جونىندەگى ەكىجاقتى ۇكىمەتارالىق كوميسسيانىڭ تيىمدىلىگىن ارتتىرۋدىڭ ەرەكشە ماڭىزى اتالىپ ءوتىلدى. مادەني-گۋمانيتارلىق سالادا جوعارى جانە كاسىبي ءبىلىم بەرۋ مەكەمەلەرى اراسىندا تىعىز ىنتىماقتاستىق ورناتۋ, سپورت جانە شىعارماشىلىق ۇجىمدارىنىڭ ءوزارا ساپارلارىن ۇيىمداستىرۋ جانە باسقا دا سالالارداعى ءوزارا ءتيىمدى بايلانىستاردى دامىتۋ ماسەلەلەرىنە ەرەكشە نازار اۋدارىلدى.
قازاقستان ەلشىسى ەاەو مەملەكەتتەرى مەن سەربيا اراسىنداعى ەركىن ساۋدا ايماعى تۋرالى كەلىسىمنىڭ قازاقستان مەن سەربيا اراسىنداعى ساۋدا-ەكونوميكالىق ىنتىماقتاستىقتى ەكىجاقتى جانە كوپجاقتى تۇردە جانداندىرۋعا مۇمكىندىك بەرەتىنىن اتاپ ءوتتى.
سەربيا پرەزيدەنتى ەكىجاقتى قارىم-قاتىناستاردىڭ جوعارى دەڭگەيىن تىلگە تيەك ەتە وتىرىپ, ەكى ەل اراسىنداعى ءداستۇرلى دوستىق بايلانىستاردى ودان ءارى نىعايتۋ مەن دامىتۋعا, جانە دە جوعارى دەڭگەيدەگى ءوزارا ساپارلار ۇيىمداستىرۋعا دايىندىعىن جەتكىزدى.
جۇزدەسۋ سوڭىندا ا.ۆۋچيچ قازاقستان ەلشىسىنىڭ جۇمىسىنا ساتتىلىك تىلەدى.