جاڭاوزەن قالاسى بويىنشا ءبىلىم بەرۋ جۇيەسىن قارجىلاندىرۋعا 2019 جىلعا 12 436,8 ملن تەڭگە بولىنگەن, بۇل قالا بيۋدجەتىنىڭ جالپى كولەمىنىڭ 57,9%-ن قۇرايدى. بۇل تۋرال وڭىرلىك كوممۋنيكاتسيالار قىزمەتى الاڭىندا وتكەن بريفينگ بارىسىندا جاڭاوزەن قالاسىنىڭ اكىمى ماقسات يباعاروۆ مالىمدەدى.
ءبىلىم بەرۋ جۇيەسى 91 مەكەمەنى قامتيدى, ونىڭ ىشىندە 56 مەكتەپكە دەيىنگى ءبىلىم بەرۋ مەكەمەلەرى بار. ونىڭ ىشىندە 38 بالاباقشانىڭ 28-ءى مەملەكەتتىك, 11-ءى جەكەمەنشىك جانە 18 شاعىن ورتالىقتار - 2 مەكتەپ جانىنداعى شاعىن ورتالىق, 16 - جەكەمەنشىك شاعىن ورتالىق. تاربيەلەنۋشىلەر سانى – 7 857 (2018 جىلى – 7 780). بالاباقشالار سانى 2014 جىلمەن سالىستىرعاندا 41-دەن 56 بىرلىككە دەيىن جەتتى, ياعني بالالاردى بالاباقشامەن قامتۋ 100% كورسەتكىشكە يە.
26 جالپى ءبىلىم بەرەتىن مەكتەپ بار (22 ورتا, 2 باستاۋىش, 1 كەشكى مەكتەپ, 1 جەكەمەنشىك كاسپي زياتكەرلىك مەكتەپ – باقشا). وقيتىندار سانى 2019-2020 وقۋ جىلىندا 32 601 وقۋشىنى قۇرادى (2018 - 2019 وقۋ جىلىندا – 30 804).
ءبىلىم بەرۋ سالاسىندا پەداگوگ قىزمەتكەرلەر سانى 3 851 شتاتتىق بىرلىكتى قۇرايدى. دەگەنمەن, پەداگوگتار اراسىندا كادر تاپشىلىعى بايقالادى. ماسەلەن 2018 جىلى 20 مامان جەتىسپەدى, ولار - قازاق مەكتەبىنە 10 ماتەماتيكا ءپانى مامانى, 10 ورىس ءتىلى ءپانى مامانى.
2019 جىلى 26 مامان جەتىسپەيدى, ياعني قازاق مەكتەبىنە 10 ماتەماتيكا ءپانى, 10 ورىس ءتىلى ءپانى جانە 2 اعىلشىن ءتىلى ءپانى ماماندارى, ورىس مەكتەبىنە 1 فيزيكا ءپانى, 1 تاريح ءپانى, 2 باستاۋىش سىنىبىنىڭ ماماندارى.
- جالپى, جاڭاوزەن قالاسى بويىنشا اپاتتى جاعدايداعى مەكتەپتەر مەن ءۇش اۋىسىمدا وقىتاتىن مەكتەپتەر جوق. الايدا بالالار سانىنىڭ ارتۋىنا بايلانىستى 1200 ورىندىق مەكتەپ سالۋ جوسپارلانۋدا. جوبانىڭ جوبالىق سمەتالىق قۇجاتتاماسىن تۇزەتۋ جۇمىستارى جۇرگىزىلۋدە, ول اعىمداعى جىلدىڭ جەلتوقسان ايىندا دايىن بولماق,- دەدى قالا اكىمى.
ماڭعىستاۋ وبلىسى