بۇل ماڭدا ءتۇبى ءبىر تۇركىنىڭ تۇپكى قاراشاڭىراعىندا كەنجە ۇلداي بولىپ وتىرعان قازاق حالقىنىڭ تاريحى مىڭجىلدىقتاردان سىر شەرتەدى. زايسان مەن كۇرشىمنەن تاس داۋىرىندە ءومىر سۇرگەن ادامداردىڭ تۇراقتارى مەن جادىگەرلەرى تابىلسا, بورىتوستاعانداعى قىزىل قىنامەن جازىلعان تاڭبالار ادامزات بالاسى جىلقىنى العاش قولعا ۇيرەتىپ, قىمىز ساپىرا باستاعان داۋىردەن جەتكەن سۋرەتتەر...
تاريحقا تولى تارباعاتاي ءوڭىرىنىڭ اسقاق التايمەن جاپسارلاس جاتقان باي مۇراسى حاقىندا جارىق كورگەن كىتاپتىڭ ءتورتىنشى تومى قازاقستان جازۋشىلار وداعىنىڭ توراعاسى ۇلىقبەك ەسداۋلەتتىڭ وسىنداي كىرىسپە سوزىمەن اشىلىپتى. كۇنى بۇگىنگە دەيىن ءتورت تومى جارىق كورگەن «تاريحقا تولى تارباعاتاي» الماناعىنىڭ شىعارۋشىسى Tas Group كومپانيالار توبىنىڭ نەگىزىن قالاعان, TasCredit قارجى كومپانياسىنىڭ باسشىسى, Assyltas قوعامدىق قورىنىڭ پرەزيدەنتى دۋلات تاستەكەەۆ. ماقساتىن «تارباعاتايدىڭ قاتپارلى تاريحىنا ءۇڭىلۋ, ءار جۋسانىنان, ەسكەن جەلىنەن, اققان سۋىنان سىر اڭداۋ جانە دە ءوڭىردىڭ جۇمباعىن اشۋ, ۇرپاعىنا ءوز ولكەسىنىڭ كيەسىن, قاسيەتىن ۇعىندىرۋ» دەگەن پىكىرىمەن ايشىقتاپ, وسى جوبانىڭ ۇلگىسىمەن ءاربىر ولكەنىڭ بەلسەندى ازاماتتارى تۋعان ءوڭىرى جايلى قىزىقتى جازبالالار بەرەتىن پاراقشا اشسا, ءسويتىپ قازاقستاننىڭ بۇكىل اۋماعىندا ولكەتانۋ عىلىمى جاندانىپ, ەكوتۋريزم دامىسا» دەگەن ويىن تۇراقتى نازاردا ۇستاپ كەلەتىن ىسكەر ازامات بۇل جولى دا تۋعان جەردىڭ تەرەڭدەگى تاريحىنا ءۇڭىلىپ, ەل تاريحىنا دەگەن قۇرمەتىن مازمۇنى تەرەڭ كىتاپقا سىيعىزعانداي...
جەتى بولىمنەن تۇراتىن كىتاپتا تاريحى تارعىتاي باباسىمەن بايلانىستىرىلاتىن كيەلى مەكەننىڭ سارقىلمايتىن سان الۋان بايلىعى پاش ەتىلەدى. ارحەولوگ ەردەن ورالباي قۇراستىرعان تاريحي توم كونە زامان ەسكەرتكىشتەرى, ارحەولوگيالىق زەرتتەۋلەر بارىسى, عالىمداردىڭ زەرتتەۋ ماقالالارى, ءوڭىردىڭ ىسكەر ازاماتتارى تۋرالى مالىمەتتەرمەن تولىققان. ال وڭىردە ءالى دە سىرى مەن جۇمباعى اشىلماعان ەسكەرتكىشتەر بارشىلىق. تارباعاتايدىڭ كۇنگەيى مەن تەرىسكەيى, جوعارى ەرتىس ءوڭىرىنىڭ حح عاسىر باسىنا دەيىنگى جەكەلەگەن تاريحىنا قاتىستى تىڭ ماعلۇماتتار ءالى تولىعىمەن جاريا ەتىلگەن جوق.
تۋعان ولكەسىن دارىپتەۋدى ءار كەز نازاردا ۇستاپ جۇرەتىن ۇلتجاندى ازامات بۇل جولى اقسۋات اۋىلىندا ءۇش مارتە وتكەن اقىندار ايتىسىنىڭ تولىق ءماتىنىن «تۋعان جەرگە تۋىڭدى تىك» كىتابىنا توپتاستىرىپ شىعارۋدى دا ماقسات ەتىپتى. اقسۋات ايتىسىنىڭ اسىل ارناسى جايىندا ءسوز ەتكەن اقىن, قازاقستاننىڭ ەڭبەك سىڭىرگەن قايراتكەرى ءجۇرسىن ەرمان «وسىدان ءۇش جىل بۇرىن قاناتىن قاققان بۇل جوبا كەلەسى جىلى-اق حالىقارالىق مارتەبەگە يە بولدى. جىل سايىن شىلدە ايىنىڭ سوڭىندا قازاقستاننىڭ ءار اۋماعىنان ايتۋلى اقىندار اقسۋاتقا ات باسىن بۇرادى. جىر جارمەڭكەسىندە اقىندار اقسۋات ايماعىنىڭ ارعى-بەرگى تاريحىن تەلەگەي جىرعا اينالدىرىپ, تەرەڭنەن وي قوزعايدى. سوعان لايىق وسى ءوڭىردى مەكەندەگەن مۇرىن انانىڭ ۇرپاقتارىنىڭ بۇگىنگى قاجىرلى ەڭبەگى, قايراتتى قيمىلى اۋىز تولتىرىپ ايتۋعا مولىنان جەتەدى» دەگەن جۇرەجاردى جولدارىنان كىتاپتىڭ مازمۇنىنا تەرەڭدەي تۇسەسىز. جىر-شۋماقتاردى شاشاۋ شىعارماي جيناقتاعان اقىن سەرىك قاليەۆ. اقىنداردىڭ جىر-شۋماعىنا ارقاۋ بولعان جەر-سۋ اتتارى مەن ايماققا ايگىلى تۇلعالار تۋرالى مالىمەتتەر دە كىتاپتىڭ اجارىن اشىپ, مازمۇنىن بايىتا تۇسەدى. سونداي-اق شىرايلى شۋماقتاردىڭ يەسى اقىنداردىڭ ومىردەرەگىنەن دە قىسقاشا مالىمەتتەر بەرىلگەن.
كىتاپتىڭ تانىستىرىلىمىنا قازاقتان شىققان تۇڭعىش وليمپيادا چەمپيونى ءا.جارمۇحامەدوۆ, اقىن ج.ەرمان, قازاقستان جازۋشىلار وداعىنىڭ توراعاسى ۇ.ەسداۋلەت, ۇلاعاتتى ۇستاز و.قارابالينا قاتىستى.
الماتى