ءبىر وتىنىشپەن الۋعا بولاتىن مەملەكەتتىك قىزمەتتەر سانى كوبەيەدى, ياعني «ازاماتتارعا ارنالعان ۇكىمەت» مەملەكەتتىك كورپوراتسياسى كومپوزيتتى تۇردە كورسەتىلەتىن قىزمەت تۇرلەرىن ارتتىرماق. بۇدان بىلاي قاندايدا ءبىر مەملەكەتتىك قىزمەتتى الۋ ءۇشىن تولتىرىلاتىن ءوتىنىش سانى ازايتىلاتىن بولادى.
2020 جىلى قىزمەت كورسەتۋ پروتسەسىن وڭتايلاندىرۋ ءۇشىن 55 ءتۇرلى مەملەكەتتىك قىزمەت 21 ءتۇرلى كومپوزيتتىك قىزمەتكە بىرىكتىرىلەدى دەپ جوسپارلانىپ وتىر.
«مۇنداي قىزمەتتەردىڭ ىشىندە جەر اكتىسىن الۋ قىزمەتى ۇلكەن سۇرانىسقا يە دەپ ويلايمىن. ماسەلەن, قازىر بۇل قىزمەتتى الۋ ءۇشىن 4 ءتۇرلى ءوتىنىش جازۋ كەرەك. 2020 جىلدان باستاپ, بۇل اكتىلەردىڭ بارلىعى بىرىكتىرىلىپ, «سايكەستەندىرۋ قۇجاتتارىن ازىرلەۋ جانە بەرۋ» سياقتى ءبىر قىزمەت ارقىلى قولجەتىمدى بولادى. بۇعان دەيىن ءبىز زەينەتكەرلىككە بايلانىستى تولەمدەردى تاعايىنداۋ بويىنشا بارلىق قىزمەتتى كومپوزيت قىزمەتىنە بىرىكتىرگەنبىز», – دەيدى مەملەكەتتىك كورپوراتسيانىڭ باسقارما ءتورايىمى اسەمگۇل بالتاشەۆا.
ايتا كەتەيىك, زەينەتكەرلىك تولەمدەردى ءبىر عانا وتىنىشپەن تاعايىنداۋعا مۇمكىندىك بەرەتىن قىزمەت ءبىر جىل بۇرىن ىسكە قوسىلعان, سودان بەرى كومپوزيتتى تۇردە 99,2 پايىز زەينەتاقى تاعايىندالعان. بۇعان دەيىن زەينەت جاسىنا جەتكەن ازامات حقو-عا كەلىپ جاسىنا بايلانىستى جانە بازالىق زەينەتاقىنى تولەۋ بويىنشا 2 ءوتىنىش بەرەتىن, ءارى ءبىر ايدان كەيىن قايتادان مەملەكەتتىك كەپىل تولەم جاساۋ تۋرالى ءوتىنىش جازىپ, كەيىن بىرىڭعاي جيناقتاۋشى زەينەتاقى قورىنا بارىپ, تاعى ءبىر ءوتىنىش تولتىراتىن. ەندى وسى 4 قىزمەت ءۇشىن حقو-عا ءبىر-اق رەت بارىپ, ءبىر عانا ءوتىنىش جازۋ جەتكىلىكتى.