تاشكەنت قالاسىندا جاستار مەن جاسوسپىرىمدەر اراسىندا وتكەن الەم بىرىنشىلىگىندە 56 كەلى سالماقتا سىنعا ءتۇسىپ, التىننان القا تاعىپ, الەم چەمپيونى اتانعان ماڭعىستاۋلىق سپورتشى داۋرەن تولەگەنوۆتى جانە گرەك-ريم كۇرەسىنەن الەمنىڭ كۇمىس جۇلدە يەگەرى تەمىرلان ابىشەۆتى ماڭعىستاۋ وبلىسى اكىمىنىڭ ورىنباسارى ق.جۇماشەۆ قابىلدادى.
ق.جۇماشەۆ سپورتشىلارعا ماڭعىساتۋلىقتار اتىنان العىس ايتىپ, سامبودان الەم چەمپيونى داۋرەن تولەگەنوۆكە 300 مىڭ تەڭگە, گرەك-ريم كۇرەسىنەن الەمنىڭ كۇمىس جۇلدە يەگەرى تەمىرلان ابىشەۆ پەن باپكەرلەرىنە 200 مىڭ تەڭگە سەرتيفيكاتىن تابىستادى.
گرەك-ريم كۇرەسىنەن تبيليسي قالاسىندا ارداگەرلەر, ياعني 36-40 جاس ارالىعىنداعى سپورتشىلار اراسىندا وتكەن الەم چەمپيوناتىنىڭ كۇمىس جۇلدەگەرى تەمىرلان ابىشەۆ گرۋزيا, افريكا سپورتشىلارىمەن كۇرەسىپ, اقتىق سىندا يراندىق پالۋانعا ۇپاي سانىمەن ەسە جىبرەگەن ەدى.
- ءار ەلدىڭ مىقتى سپورتشىلارى كەلگەندىكتەن, چەمپيونات ماعان وڭايعا سوققان جوق. اسىرەسە, فينالداعى قارسىلاسىم كوپتى جەڭىپ شىققان مىقتىنىڭ ءوزى بولاتىن. ونى جەڭۋدە قالماق ءادىسىن قولداندىم. ەلىمىزدىڭ ءانۇرانىن بيىك تۇعىردان شىرقاتۋ - مەن ءۇشىن ۇلكەن مارتەبە. سول جەڭىسىمىزگە قۋانىپ, قۇرمەت كورسەتىپ جاتقان وبلىس اكىمدىگىنە ريزامىن, دەدى سامبوشى د. تولەگەنوۆ.
كەزدەسۋگە ماڭعىستاۋ وبلىستىق سپورت باسقارماسى باسشىسىنىڭ مىندەتىن اتقارۋشى قانات جۇماباەۆ, ۇزدىك سپورتشىلاردىڭ باپكەرلەرى مەن تۋمالاستارى, «جاس باتىر» سپورت مەكتەبىنىڭ ۇجىمى قاتىستى.
ماڭعىستاۋ وبلىسى