مويىنقۇم – جامبىل وبلىسىنىڭ ەڭ شالعاي اۋداندارىنىڭ ءبىرى. جولدىڭ ۇزاقتىعى ءوز الدىنا, تالاي جىلدان بەرى جوندەۋ كورمەگەن جولدار دا تۇرعىنداردىڭ مويىنقۇم مەن تاراز اراسىنا قاتىناۋىنا ىڭعايسىز بولىپ كەلگەن ەدى. ەندى سول ولقىلىقتىڭ ورنى تولعالى وتىر. جامبىل وبلىسىنىڭ اكىمى اسقار مىرزاحمەتوۆتىڭ تاپسىرماسىمەن, تاراز بەن مويىنقۇم اراسىندا اۋە تاسىمالى ىسكە قوسىلاتىن بولدى.
«وڭىردە شاعىن اۆياتسيانى دامىتۋ قاراستىرىلىپ وتىر. بۇگىنگى تاڭدا وبلىسىمىزدىڭ ورتالىعىنان مويىنقۇم جانە تولە بي اۋىلدارىنا اۋە باعىتتارىن اشۋ مۇمكىندىكتەرىن زەردەلەۋ, سونىڭ ىشىندە قاجەتتىلىكتى انىقتاۋ, اۋەايلاق سالۋعا كەتەتىن شىعىن كولەمىن انىقتاۋ بويىنشا جۇمىستار جۇرگىزىلۋدە», دەيدى جامبىل وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى باقىتجان جانىبەكوۆ.
ايتا كەتەيىك, مويىنقۇم اۋىلىنان تاراز قالاسىنا ءبىر كەزدەرى, ياعني 1966-1990 جىلدار ارالىعىندا كۇندەلىكتى 2 رەت «ان-2» جانە «ياك-40» ۇشاقتارىمەن اۋە تاسىمالى قىزمەتى كورسەتىلگەن. الايدا كەزىندەگى ەلىمىزدەگى قارجىلىق قيىندىقتارعا بايلانىستى اتالعان اۋە باعىتتارى جۇمىسىن توقتاتقان ەدى. الداعى ۋاقىتتا بۇل باستاما قايتا جاندانىپ, كوپتىڭ تىلەگى ورىندالاتىن دا كۇن الىس ەمەس. اۋە تاسىمالى ىسكە قوسىلعان جاعدايدا ەكى اراداعى اۆتوكولىكپەن جۇرەتىن 4-5 ساعاتتىق جول قىسقارىپ, 1-1,5 ساعاتتا مويىنقۇمعا جەتۋگە مۇمكىندىك تۋادى دەپ كۇتىلۋدە. بۇگىنگى تاڭدا اۋداندا اۋەايلاق سالۋ ءۇشىن ارنايى جەر دە بەلگىلەنگەن.
جامبىل وبلىسى