بۇگىندە قازاقستاندىق بيزنەسمەندەر تۋريزم سالاسىندا 100 جوبانى دامىتىپ وتىر. ولار - ءتۇرلى كەمپينگتەر, ورنالاسۋ ورىندارى, پاركتەر. بۇل جوبالاردا 2 جىل ىشىندە قوسىمشا 6-7 مىڭ تۇراقتى جۇمىس ورنى پايدا بولادى. بۇل تۋرالى «Kazakh Tourism» ۇك اق توراعاسىنىڭ ورىنباسارى قايرات سادۋاقاسوۆ پرەمەر-ءمينيستردىڭ ءباسپاسوز قىزمەتىنە بەرگەن سۇحباتىندا ايتتى.
«قازىر ءبىز 100 جوبانىڭ دامۋىن قاداعالاپ وتىرمىز, ونىڭ جارتىسى كەلەسى جىلدىڭ سوڭىنا قاراي اياقتالاتىن بولادى. ەگەر جالپى سالا بويىنشا قوناق ۇيلەردى, تۋرفيرمالار مەن ورنالاستىرۋ سالاسىن الساق, بۇگىندە تىكەلەي جۇمىسپەن قامتۋدا 120 مىڭ ادام قامتىلعان. ەگەر ءبىز كولىك, مادەنيەت, ورنالاستىرۋ سالاسىن قاراستىراتىن كەڭەيتىلگەن ءتىزىمدى الساق, وندا 300 مىڭعا جۋىق ادام جۇمىس ىستەيدى. مەملەكەتتىك باعدارلاما اياقتالعان سوڭ 2025 جىلى ءبىز 70 مىڭعا جۋىق جاڭا تۇراقتى جۇمىس ورنىن قوسۋدى جوسپارلاپ وتىرمىز. جاڭا ينۆەستيتسيالاردىڭ كەلۋى ەسەبىنەن جاڭا نىساندار سالىنىپ, جاڭا جۇمىس ورىندارى قۇرىلاتىن بولادى», دەدى ق. سادۋاقاسوۆ.
سونىمەن قاتار تۋريزم سالاسىندا كادرلار بىرنەشە جوو-دا وقىتىلادى. بيىل تۋريزم جانە قوناقجايلىلىق جونىندەگى حالىقارالىق جوو تىركەلدى جانە جاقىن ارادا ءوز جۇمىسىن باستايدى.
«جاستار ءۇشىن پەرسپەكتيۆالار زور. ەگەر بۇرىن ادامدار تۋريزمگە قانداي دا ءبىر پايداسى نەمەسە ەمتيحاندارىن تاپسىرۋ جەڭىل بولعاندىقتان تۇسسە, قازىر ءبىز سانالى تۇردە تاڭداۋدى كورىپ وتىرمىز. جاستار سالانىڭ ديناميكالى دامىپ جاتقانىن, شەتەلدىكتەر اعىمىن, حالىقارالىق ءىس-شارالاردى كورەدى», دەدى سپيكەر.
«Kazakh Tourism» ۇك اق توراعاسىنىڭ ورىنباسارىنىڭ ايتۋىنشا, مەملەكەت تۋريزم سالاسىنداعى شاعىن جانە ورتا بيزنەستىڭ قۇراۋىشتارىن ۇلعايتۋعا بارىنشا نيەتتى.
شاعىن, ورتا جانە ءىرى بيزنەستىڭ بىرقاتار ارتىقشىلىقتارى بار. ماسەلەن, ءىرى بيزنەستە تاۋ شاڭعىسى كۋرورتتارىن سالۋ, جول بويى سەرۆيسى جەلىلەرىن, قوناقۇيلەر اشۋ جانە ت. ب. ءۇشىن 10 جىلعا دەيىن سالىقتان, كەدەن باجىنان بوساتىلۋ, جەر تەلىمى تۇرىندە گرانت الۋ سەكىلدى ارتىقشىلىقتار الۋعا بولادى.
«تۋريزم سالاسىنا بيزنەستىڭ قاتىسۋى شاعىن جانە ورتا بيزنەس دەڭگەيىندە. ءىرى بيزنەس ءبىرلى-جارىم, ۇلكەن ينۆەستيتسيالار كەلەتىن جاعدايلار كوپ ەمەس. سونداي-اق «قاراپايىم زاتتار ەكونوميكاسى» باعدارلاماسى بار. وندا شاعىن جانە ورتا بيزنەس كەمپينگتەر, قوناق ۇيلەر, تاقىرىپتىق پاركتەر, تاۋ شاڭعىسى كۋرورتتارىن اشۋعا جەڭىلدىكتى پايىزدىق مولشەرلەمەمەن قارجىلاندىرۋعا يە بولا الادى. تۋريستيفيكاتسيا كارتاسىنا كىرگەن اۋماقتارعا, مەملەكەتتىك باعدارلاما اياسىندا ءبىز تاڭداعان توپ-10 اۋماققا باسىمدىق بەرىلەدى», دەپ قوستى ق. سادۋاقاسوۆ.