قالدىقتار جاڭاشا ۇلگىمەن باسقارىلادى

قۇجاتتىڭ باستى ماقساتى – قال­دىقتاردى كەشەندى باسقارۋ جۇيەسىن دامىتۋ, قالدىقتاردىڭ قورشاعان ورتاعا تيگىزەتىن اسەرىن ازايتۋ, سونداي-اق قالدىقتاردان قايتالاما شيكىزات الۋ جانە ونى ەنەرگيا كوزى رەتىندە پايدا­لانۋ. اتاپ ايتقاندا, جەكەلەگەن وڭىرلەردە تۇرمىستىق قات­تى قال­دىقتاردى بولەك تاستاۋ جۇ­يەسىن ەنگىزۋ, سۇرىپتاۋ جەلى­سىن قوسۋ, قالدىقتان ەنەرگيا وندىرەتىن زاۋىت قۇرىلىسىنا ينۆەستور­لار تارتۋ قاراستىرىلعان. قال­دىقتان ەنەرگيا ءوندىرۋ تاجى­ريبەسى كوپتەگەن مەملەكەتتەردە قولدانىستا بار. اتالعان ءادىس-تاجىري­بەنى ەلىمىزدە قولدانۋ قال­­دىقتى ءتيىمدى باسقارۋدىڭ وڭ شەشىلۋىنە ىقپال ەتەدى. ناتي­جەسىندە قوقىس پوليگوندارىنان پارنيكتىك گازداردىڭ شىعۋىن ازايتىپ, ەلىمىزدە كومىلەتىن قتق كولەمىن 90%-عا دەيىن قىسقارتۋعا مۇمكىندىك بەرەدى.

كومىلەتىن قالدىق كولەمىن قىسقارتۋ, قايتا وڭدەۋدى ۇلعايتۋ جانە تۇتىنۋشى ىدىسىنا دەپو­زيتتىك جۇيە ەنگىزۋ وپەراتور سترا­تە­گياسىندا ۇسىنىلىپ وتىر. ياعني بوس ىدىستى قايتا تاپسىر­عان تۇتىنۋشى ىنتالاندىرىلادى. سول ارقىلى تۇرمىستىق قال­دىقتاردى قايتا وڭدەۋ ۇلەسى ارتادى.

قوعامدىق كەڭەستە زاڭسىز قو­قىس الاڭدارىن جويۋعا وپەرا­توردىڭ قاتىسۋى جانە اتال­عان شارانى ورىنداۋدى ورتاق قار­جىلاندىرۋ ماسەلەسى قاراس­تى­رىلدى. زاڭسىز قوقىس الاڭىنا اينالعان پوليگوندار جانىنا قالدىقتى ۋاقىتشا بەكەتتەر ورناتۋ ۇسىنىلدى. ول جەردە قالدىقتى جاعۋعا ارنالعان ۋاقىتشا قۇرىلعى بولادى. اتال­عان تەحنولوگيا دالاعا تاستالعان قالدىقتى انىقتاۋعا جانە ونى جەدەل جويۋعا مۇمكىندىك بەرە­دى. سونداي-اق وپەراتور تاراپىنان ارالاس تۇردەگى قاپتاما قال­دىق­تارىن, قوڭىر ءتۇستى شى­نى ىدىس قالدىقتارىن, پلاستماسسا (پوليەتيلەن, پوليپروپي­لەن) قالدىقتارىن وڭدەيتىن كاسىپورىن قۇرىلىسىن سالۋعا قارجى ءبولۋ مۇمكىندىگى قاراس­تىرىلدى. سو­نىمەن قاتار وپەراتور ستراتەگيا­سىندا بۇگىندە قىزمەت ەتىپ وتىرعان باعىتتاردى ىنتالاندىرۋعا قولداۋ كورسەتىلە بەرەتىندىگى بەلگىلەنگەن. ناقتى ايتقاندا, ەسكى كولىكتەردى تاپسىرۋ باعدارلاماسىن ىنتالاندىرۋ, ەلەكتر قۋاتتاۋ بەكەتتەرىنىڭ ينفراقۇرىلىمىن دامىتۋ, وكم تارالاتىن ءونىم قالدىقتارىن جيناۋعا جانە قايتا وڭدەۋگە جۇم­­­سالاتىن وتەماقىنى بەرۋگە, ەكولو­گيالىق تازا كولىكتەردى شى­عارۋ ءوندىرىسىن ىنتالاندىرۋعا قول­داۋ كورسەتىلەتىنى بەلگىلەنگەن.

قوعامدىق كەڭەس وتىرىسىنىڭ قورىتىندىسى بويىنشا كە­ڭەس مۇشەلەرى تۇرمىستىق قالدىق­تاردى قوقىس پوليگوندارىنا كو­مۋدى شەكتەۋ, ونى قايتا وڭدەۋ, زاڭسىز قوقىس الاڭدارىنىڭ پايدا بولۋىنا جول بەرمەۋ شارالارى ەڭ وزەكتى ستراتەگيالىق باعىت ەكەنىن اتاپ ءوتتى. سوندىقتان قا­زاق­ستاندا قالدىق باسقارۋ جۇ­يە­سىن جانە قايتا وڭدەۋ سالا­سىنداعى ينفراقۇرىلىم جەدەل دامىتۋدى قاجەت ەتەدى.

ەسكەرتۋلەر مەن ۇسىنىستار تولىق ەسكەرىلگەن ستراتەگيانى ەكولوگيا, گەولوگيا جانە تابيعي رەسۋرستار مينيسترلىگى بەكىتتى. بۇگىنگى تاڭدا اتالعان شارالاردى جۇزەگە اسىرۋ بويىنشا جوسپارلار ازىرلەنەدى.