الماتىدا حالىق جازۋشىسى, ءسوز ونەرىنىڭ زەرگەرى شەرحان مۇرتازا تۇرعان ءۇيدىڭ قابىرعاسىنا ەسكەرتكىش تاقتا ءىلىندى. شەراعاڭنىڭ جارقىن بەينەسىن كوز الدىمىزعا اكەلەتىن مەموريالدى تاقتايشا تاۋەلسىزدىكتىڭ ەلەڭ-الاڭىندا ۇلت رۋحانياتىنىڭ بەدەلىن بيىكتەتكەن ەرەن تۇلعانىڭ ەسىمىن ۇرپاق ساناسىندا ماڭگى الديلەۋ ماقساتىندا قويىلعان. الماتى قالاسى اكىمدىگىنىڭ تىكەلەي قولداۋىمەن جۇزەگە اسقان يگى شاراعا جينالعان زيالى قاۋىم وكىلدەرى بۇل شىن مانىندە قازاق ءسوز ونەرىنە جاسالعان قۇرمەت دەپ ەسەپتەيدى.
«اكەم حالقىم دەسە جانىن بەرۋگە ءازىر تۇراتىن تۇلعا ەدى. ول اقتىق دەمى قالعانشا كيەلى ءسوز ونەرىنىڭ كيەسىن كەتىرمەۋگە, تۇنىعىن لايلاماۋعا بار كۇشىن سارپ ەتتى. بۇل اكەمە عانا ەمەس, ءبۇتىن قازاق رۋحانياتىنا جاسالعان ايرىقشا قۇرمەت دەپ بىلەمىن», - دەيدى الما شەرحانقىزى.
ەسكەرتكىش تاقتانىڭ سالتاناتتى اشىلۋ راسىمىندە ءسوز سويلەگەن قالامداستارى شەراعاڭنىڭ وتكىر مىنەز-قۇلقى, ۇلتقا جاساعان ۇلانعايىر ەڭبەگى, كەيىنگىگە مۇرا بولىپ قالاتىن شىعارمالارى تۋرالى سىر شەرتىپ, اسەرلى ەستەلىكتەرىمەن ءبولىستى.
ەسكە سالساق, الماتى تورىندە كەشەلى بەرى مارقۇمنىڭ ومىردەن وزعانىنا ءبىر جىل تولۋىنا وراي قايراتكەر-قالامگەردى ەسكە الۋعا ارنالعان ءتۇرلى ءىس-شارالار تىزبەگى ۇيىمداستىرىلۋدا.
كەشە شاھاردا باق وكىلدەرى اراسىندا بيلياردتان شەرحان مۇرتازا اتىنداعى ءداستۇرلى تۋرنير مارەگە جەتكەن بولاتىن.
الماتى