رەسەيدىڭ ەكاتەرينبۋرگ قالاسىندا قىركۇيەكتىڭ 7-21 ارالىعىندا وتكەن بوكستان الەم چەمپيوناتىنىڭ جۇلدەگەرى بەكزات نۇرداۋلەتوۆتىڭ جەڭىسىن بۇكىل قازاق ەلى زور قۋانىشپەن قابىلدادى. تۋعان جەرى ماڭعىستاۋ وڭىرىنە ورالعان بوكسشى جىگىتتى جەرلەستەرى قۇشاق جايا قارسى الىپ, ونىمەن كەزدەسۋلەر تولاستار ەمەس. جاس بوكسشىمەن كەزەكتى كەزدەسۋ ماڭعىستاۋ وبلىسى پوليتسيا دەپارتامەنتىندە ءوتتى.
ماڭعىستاۋ وبلىسى پوليتسيا دەپارتامەنتىنىڭ باستىعى قانات تايمەردەنوۆ الەم چەمپيونى بەكزات نۇرداۋلەتوۆتى قارسى الدى. 21 جاستاعى بوكستان اۋەسقويلار اراسىنداعى الەم چەمپيوناتىندا التىن مەدالعا يە بولدى. سپورت جانكۇيەرلەرى مەن ماماندار 81 كەلىدە شارشى الاڭعا تۇسكەن جاڭاوزەندىك بىلعارى قولعاپ شەبەرىنىڭ جەڭىسىن چەمپيوناتتىڭ جاڭالىعى دەپ باعالاۋدا.
چەمپيونات اياسىنداعى التى كەزدەسۋىنىڭ بارلىعىن جەڭىسپەن اياقتاعان بەكزاتتىڭ وليمپيادا چەمپيونى حۋليو لا كرۋزدى جەڭۋى, اقتىق كەزەڭدە وزبەكستاندىق جالىندى جاس بوكسشى ديلشودبەك رۋزمەتوۆتەن اسىپ ءتۇسۋى شىندىعىندا ۇلكەن جەڭىس بولاتىن. ماڭعىستاۋ پوليتسيا دەپارتامەنتىندە جينالعان جەكە قۇرام الدىندا چەمپيون ءوزىنىڭ باپكەرىنىڭ ارقاسىندا جەڭىسكە جەتكەندىگىن ايتىپ, الداعى جوسپارىمەن ءبولىستى. ول بوكستان وليمپيادا ليتسەنزياسىن سارالايتىن تۋرنير, سودان كەيىن وليمپياداعا دايىندالاتىن بولادى.
پوليتسيا باسشىسى بەكزاتتى جەڭىسىمەن قۇتتىقتاپ, الداعى جوسپارلارىنا ساتتىلىك تىلەدى. سونداي-اق پوليتسيا باسشىسى ۇلگىلى, ەل مەرەيىن كوتەرگەن ۇل تاربيەلەگەن سپورتشىنىڭ اتا-اناسىنا, باپتاعان جاتتىقتىرۋشىلارىنا العىسىن ءبىلدىرىپ, بەكزاتقا شاپان جاپتى.
ماڭعىستاۋ وبلىسى