الماتى وبلىسىنىڭ قاراساي اۋدانىنداعى «باتىر بابالار» مەموريالدى كەشەنى وسىدان ەكى جىل بۇرىن عانا اشىلعان ەدى. قازىر بۇل كەشەن وڭىردەگى تانىمال تاريحي ورىنعا اينالدى.
قازاق تاريحىنىڭ قالىڭ قاتپارىنان سىر شەرتەتىن شەجىرەلىك سۋرەتتەرمەن ارلەنگەن بۇل كەشەن بابالاردىڭ ەرلىك جولىنا قويىلعان ەسكەرتكىش سياقتى. كيىز ءۇي بەينەلى مەموريالدى كەشەننىڭ ءىشى-سىرتى اق ءمارمار تاسپەن قاپتالعان. كوككە ۇمتىلعان بيىك ستەللا بولاتتان قۇيىلىپ, سۇيىرلەنە بىتكەن كۇمبەزدى شاتىرعا ۇيلەسىپ تۇر.
مۇنداعى ەجەلگى ساق زامانىنا ارنالعان ەكسپوزيتسيانىڭ ءوزى ءبىر الەم. ۇزىندىعى 15, ەنى 3 مەتر بولاتىن تۇمار حانشايىمنىڭ زامانىن بەينەلەيتىن, سول كەزەڭدەگى ۇرىس دالاسىنا جەتەلەيتىن پانورامانىڭ ءجونى جانە بولەك. التىن ادام داۋىرىنەن جەتكەن جادىگەرلەر, تۇتاس دالا وركەنيەتىنىڭ بولشەگىندەي كورىنەتىن قولونەر مەن ۇستا قولىنان شىققان بۇيىمدار دا ەجەلگى دۇنيەگە شاقىراتىنداي...
ال نىسان قابىرعاسىندا مەملەكەتتىلىك شەجىرەسى جىلدار لەگىمەن ءورىلىپ, قازاق حاندىعىنىڭ قۇرىلۋى مەن بۇگىنگى تاۋەلسىز ەلىمىزدىڭ اراسىنداعى عاسىرلارعا سوزىلعان سوقتىقپالى-سوقپاقسىز تاريحتىڭ ءار ءساتى كوركەم سۋرەتتەرمەن بەزەندىرىلىپتى. عيمارات ءىشى قۇددى ءبىر باتىر بابالارىمىزدىڭ زامانى قازىرگى ۇرپاعىنا « ۇلى دالا تاريحى وسىلاي جازىلعان...» دەپ ءتىل قاتا جونەلەتىندەي كوركەمدىك پەن تىلسىم سىرعا تۇنىپ تۇر. مەموريالدى كەشەندى ارالاۋعا الماتى ماڭىنداعى اۋدانداردىڭ مەكتەپ وقۋشىلارى ىنتا تانىتىپ, ءجيى كەلەدى ەكەن. ءتىپتى تاريح ساباعىن وسىندا كەلىپ وتكىزەتىن تاجىريبە قالىپتاسۋدا.
جالپى كولەمى 465 ميلليون تەڭگە شاماسىندا قارجى قۇيىلعان كەشەننىڭ ىرگەتاسىنان شاتىرىنا دەيىنگى قۇرىلىسى دەمەۋشىلەردىڭ كومەگىمەن سالىنسا, ارلەۋ, بەزەندىرۋ مەن كوركەمدەۋ جۇمىستارىنا جۇمسالعان قارجى عانا وبلىستىق بيۋدجەتتەن بولىنگەن ەكەن.
الماتى وبلىسى