ەلوردادا «الەمدىك ينتەگراتسيالىق پروتسەستەر تەندەنتسياسى: سىن-تەگەۋرىندەر جانە مۇمكىندىكتەر» اتتى حالىقارالىق عىلىمي كونفەرەنتسيا ءوتتى.
ەۋرازيالىق ينتەگراتسيا ينستيتۋتى ۇيىمداستىرعان كونفەرەنتسياعا گەرمانيا, رەسەي, قىرعىزستان, بەلارۋس جانە قازاقستاننىڭ ساراپشىلارى, مەملەكەتتىك ورگانداردىڭ وكىلدەرى, عىلىمي قىزمەتكەرلەر, دوكتورانتتار مەن ماگيسترانتتار قاتىستى. جيىندا قازاقستاننىڭ ينتەگراتسيالىق ۇردىستەر جۇيەسىندەگى ورنى, ەاەو جانە الەمدىك ينتەگراتسيالىق ۇردىستەر مەن ولاردىڭ مۇمكىندىكتەرى ءسوز بولدى.
ەۋرازيالىق ينتەگراتسيا ينستيتۋتى ديرەكتورىنىڭ ورىنباسارى, ساياساتتانۋشى دارحانبەك ءجانديلديننىڭ ايتۋىنشا, قازىرگى كەزدە ينتەگراتسيالىق پروتسەستەردىڭ اۋقىمى تەرەڭ سيپاتقا يە بولدى. «تۋىنداعان قاراما-قايشىلىقتار مەن قاتەرلەردى شەشۋ مەملەكەتتەر تاراپىنان ۇلكەن كۇش-جىگەردى تالاپ ەتەدى. باستىسى – جان-جاقتى تالداۋ, تالقىلاۋ جانە ودان ءارى ىقپالداسۋ بويىنشا ۇسىنىستاردى ازىرلەۋ», دەدى ول.
سونداي-اق شارادا ل.ن.گۋميلەۆ اتىنداعى ەۇۋ ينتەرناتسيونالداندىرۋ جانە يميدج ورتالىعىنىڭ ديرەكتورى سەيت الي اۆدجۋ, كونراد ادەناۋەر اتىنداعى قوردىڭ قازاقستانداعى وكىلدىگىنىڭ ديرەكتورى توماس حەلم جانە وزگە دە ساراپشىلار عالامدىق ساياسي ترەندتەر مەن سىن-تەگەۋرىندەر تاقىرىبىن ورتاعا سالدى. توماس حەلم ءوز سوزىندە باستى عالامدىق ترەندتەر رەتىندە اقش پەن قىتاي اراسىنداعى بيوورىستىلىك, كيبەر شابۋىلدار, رەسۋرستىق قاۋىپسىزدىك, ەنەرگەتيكا جانە كليمات, تسيفرلىق يننوۆاتسيا جانە كوممۋنيكاتسيا, جاساندى ينتەللەكت ماسەلەلەرىن اتاپ ءوتتى. پلەنارلىق وتىرىستان كەيىن پانەلدىك سەسسيالاردا ينتەگراتسيا ماسەلەلەرىن وتاندىق جانە شەتەلدىك ساراپشىلار بىرگە تالقىلادى.