«Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك نۇر-سۇلتان قالاسىنداعى №71 مەكتەپ-ليتسەيدە اشىلعان ينكليۋزيانى قولداۋ كابينەتىنە ارنايى بارىپ, اتالعان باعىتتاعى جۇمىستارمەن تانىستى. بۇل تۋرالى پارتيانىڭ ءباسپاسوز قىزمەتى حابارلادى.
بۇل باستامانى پارتيانىڭ قولداۋىمەن «بولاشاق» كورپوراتيۆتى قورى جۇزەگە اسىرىپ كەلەدى. باستى ماقسات – اۋتيزم جانە باسقا دا مەنتالدى اۋىتقۋشىلىقتارعا شالدىققان بالالاردىڭ ۇيدەن ەمەس, بالاباقشا, مەكتەپ سياقتى ءبىلىم وشاقتارىندا وقۋىنا جانە قۇربى-قۇرداستارىمەن قاتار ءجۇرىپ, ورتاعا بەيىمدەلۋىنە جاعداي جاساۋ.
ء«ار بالا مەكتەپكە بارۋعا لايىق» جوباسى اياسىندا 2015 جىلدان بەرى ەلىمىزدە 36 وسىنداي كابينەت اشىلىپ, جۇمىس ىستەپ تۇر. جاقىن ۋاقىتتا Nur Otan-نىڭ قولداۋىمەن «بولاشاق» قورى بىرنەشە قالادا تاعى 7 كابينەت اشپاق.
دەگەنمەن, «بولاشاق» كق قامقورشىلار كەڭەسىنىڭ ءتورايىمى دينارا ءشايجۇنىسوۆانىڭ ايتۋىنشا, بۇل باستاما بارلىق وڭىردە بىردەي قولداۋ تاۋىپ وتىرعان جوق. ماسەلەن, اقتوبە قالاسىندا ەكى كابينەت اشۋ ءۇشىن قور بارلىق كەرەك-جاراقتى ساتىپ الىپ, دايىنداپ قويعان. الايدا ءالى كۇنگە دەيىن مەكتەپتەر قاجەتتى جوندەۋ جۇمىستارىن جۇرگىزبەي, الەۋمەتتىك پەداگوگ, پسيحولوگ جانە دەفەكتولوگ ماماندارىن بولمەي وتىر. باۋىرجان بايبەك بۇل ماسەلەنى جەكە باقىلاۋىنا الاتىنىن ايتىپ, پارتيا تاراپىنان قولداۋ بولاتىنىن جەتكىزدى.
– قازىرگى تاڭدا ەلىمىزدە ءبىلىم بەرۋدە ەرەكشە قاجەتتىلىكتى تالاپ ەتەتىن 150 مىڭنان استام بالا بار. ولاردىڭ ارقايسىسىن الەۋمەتتىك ورتاعا بەيىمدەپ, قوعامنىڭ تولىققاندى مۇشەسى بولۋىنا كومەكتەسۋ – ءبىزدىڭ ورتاق مىندەتىمىز. ەلباسى, پارتيا توراعاسى نۇرسۇلتان ءابىش ۇلى نازارباەۆتىڭ تاپسىرماسىمەن «كەدەرگىسىز كەلەشەك» پارتيالىق جوباسى جۇزەگە اسىرىلىپ كەلەدى. وسى جوبا اياسىندا ماسليحاتتارداعى Nur Otan فراكتسياسى ارقىلى ەرەكشە قاجەتتىلىكتەردى تالاپ ەتەتىن بالالارمەن جۇمىس ىستەيتىن تاربيەشىلەرگە قوسىمشا قاراجات ءبولۋدى قامتاماسىز ەتۋدى ۇسىندىم, – دەپ باۋىرجان بايبەك ءوزىنىڭ Instagram-داعى پاراقشاسىندا جازدى.