قازاقستان رەسپۋبليكاسىنىڭ پاكىستانداعى ەلشىسى اقان راحمەتۋللين پاكىستان پرەزيدەنتى اريف الۆيمەن سەنىم گراموتالارىن تاپسىردى دەپ حابارلايدى سىرتقى ىستەر مينيسترلىگىنىڭ ءباسپاسوز قىزمەتى.
كەزدەسۋ بارىسىندا پاكىستان پرەزيدەنتى ەلدەر اراسىندا قالىپتاسقان دوستىق قارىم-قاتىناستى, سونداي-اق وڭىرلىك جانە جاھاندىق كۇن تارتىبىندەگى كوپتەگەن ماسەلە بويىنشا ەكى مەملەكەتتىڭ ۇستانىمدارىنىڭ ۇقساستىعىن اتاپ ءوتتى. سونىمەن قاتار ول قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ەكىجاقتى قارىم-قاتىناستاردىڭ قالىپتاسۋىنا جانە قازاقستان-پاكىستان ارىپتەستىگىنىڭ دامۋىنا قوسقان قوماقتى ۇلەسىن ەرەكشە اتاپ ءوتتى.
ءوز كەزەگىندە ا.راحمەتۋللين جىلى لەبىزىن ءبىلدىرىپ, قازاقستاندا بولىپ جاتقان ەكونوميكالىق جانە ساياسي وزگەرىستەر تۋرالى حاباردار ەتتى.
تاراپتار, سونداي-اق, ساياسي ديالوگتى, ساۋدا-ەكونوميكالىق ىنتىماقتاستىقتى جانە ەكى ەل اراسىنداعى مادەني-گۋمانيتارلىق ءوزارا ءىس-قيمىلدى دامىتۋدى قوسا العاندا, بىرقاتار وزەكتى ماسەلەنى تالقىلادى.
كەزدەسۋ سوڭىندا ا.الۆي ەلباسى ن.نازارباەۆقا جانە قازاقستان پرەزيدەنتى ق.توقاەۆقا جۇرەك تىلەگىن جەتكىزدى, سونداي-اق, ەلشىگە قازاقستان-پاكىستان ىنتىماقتاستىعىن نىعايتۋ ءۇشىن تابىستى جانە جەمىستى جۇمىس تىلەدى.