ۇكىمەت باسشىسى قىزىلوردا وبلىسىنا جۇمىس ساپارىمەن كەلدى

اسقار ۇزاقباي ۇلىنا بايقوڭىر قالاسىندا اتقارىلىپ جاتقان جۇمىستار جايلى قىزىلوردا وبلىسىنىڭ اكىمى قۋانىشبەك ىسقاقوۆ باياندادى.

بايقوڭىر قالاسىندا «نۇرلى جەر» باعدارلاماسى اياسىندا 50 پاتەرلى بەس ءۇيدىڭ قۇرىلىسى اياقتالدى. قۇرىلىستىڭ جالپى اۋماعى-15,7 مىڭ شارشى مەتر, مۇندا 250 پاتەر بار. ۇيلەر ورتالىق سۋ جانە كارىز جۇيەسىنە قوسىلعان. جىلۋ جانە ىستىق سۋمەن قامتاماسىز ەتۋ ءۇشىن تابيعي گازبەن اۆتونومدى بۋ قازاندىعى ورناتىلعان. قازىرگى ۋاقىتتا  باسپانا كەزەگىندە تۇرعان بايقوڭىرداعى قر ازاماتتارىنا پاتەر بەرىلۋدە»,-دەدى ايماق باسشىسى.

ايتا كەتەيىك, "قىزىلوردا وبلىسىن گازداندىرۋ جانە جاڭا اكتيۆتەر قۇرۋ" ينۆەستيتسيالىق جوباسىن ىسكە اسىرۋ اياسىندا بايقوڭىر قالاسىن "بەينەۋ - شىمكەنت" گاز قۇبىرىنا قوسۋ جانە بايقوڭىر قالاسىنىڭ جەتكىزۋشى گاز قۇبىرى مەن كۆارتالىشىلىك گاز تاراتۋ جەلىلەرىن سالۋ بويىنشا جۇمىستار جۇرگىزىلدى. بۇگىندە قازاقستاندىق الەۋمەتتىك نىساندار مەن بوي كوتەرگەن 5 كوپ قاباتتى تۇرعىن ءۇي گاز جەلىلەرىنە قوسىلعان. تۇتىنۋشىلار ءۇشىن گاز باعاسى-20,90 تگ م3.

پرەمەر-مينيسترگە «بايقوڭىر» كەشەنىندە ەركىن ەكونوميكالىق ايماق قۇرۋعا بايلانىستى  اتقارىلىپ جاتقان جۇمىستار دا باياندالدى. 

سودان سوڭ, اسقار مامين قوناق ءۇي كەشەندەرىنىڭ قۇرىلىس بارىسىمەن, اتاپ ايتقاندا, "رەسەي" قوناق ءۇيى مەن "نولدىك كۆارتال" قوناق ءۇي كەشەنىن قايتا جاڭعىرتۋ جۇمىستارىمەن تانىستى.

قازىرگى تاڭدا قالانىڭ ويىن – ساۋىق-تۋريستىك الەۋەتىن ارتتىرۋ ءۇشىن قىزىلوردا وبلىسىنىڭ اكىمدىگى مەن بايقوڭىر قالاسىنىڭ اكىمشىلىگى "رەسەي" قوناق ءۇيى مەن "نولدىك كۆارتال" نىساندارىن جالدان شىعارۋ ماسەلەسىن تالقىلاۋدا.

قىزىلوردا وبلىسىنا جۇمىس ساپارىنىڭ سوڭىندا قر پرەمەر – ءمينيسترى "سويۋز مس-15" باسقارىلاتىن عارىش كەمەسىنىڭ ۇشىرىلۋى شاراسىنا قاتىستى. عارىشكەرلەر -ولەگ سكريپوچكا (رف), دجەسسيكا مەير (اقش) جانە حاززا ال-مانسۋري ء(باا).