ەلوردادا «قاۋىپسىز ەڭبەك» جوباسى ءوز جۇمىسىن باستادى. بۇل تۋرالى قالا اكىمدىگىنىڭ رەسمي سايتى حابارلادى.
نۇر-سۇلتان قالاسىنىڭ قالالىق ورتانى جانە ساپانى باقىلاۋ باسقارماسى ەڭبەك قاۋىپسىزدىگى جانە ەڭبەكتى قورعاۋدى باقىلاۋ ءبولىمىنىڭ باسشىسى مۇرات شاكەنوۆتىڭ ايتۋىنشا, جوبا اياسىندا وندىرىستىك جاراقاتتار مەن جالاقى ماسەلەلەرىمەن اينالىساتىن جۇمىس توبى قۇرىلدى. ونىڭ قۇرامىنا پروكۋراتۋرا, پوليتسيا دەپارتامەنتى, مەملەكەتتىك كىرىستەر دەپارتامەنتى جانە ەڭبەك ينسپەكتسياسى وكىلدەرى بار.
سونىمەن قاتار, مەملەكەتتىك ينسپەكتورلار بىرنەشە جىلدان بەرى جۇيەلى تۇردە ءتۇسىندىرۋ كەزدەسۋلەر مەن سەمينارلار وتكىزىپ كەلەدى. بۇل جۇمىستىڭ ناتيجەسى وندىرىستىك جاراقاتتانۋ, جۇمىس ورىندارىنداعى ءولىم-ءجىتىم دەڭگەيىن تومەندەتۋ جانە ەڭبەك قاۋىپسىزدىگىن ارتتىرۋ بولماق.
بيىلعى جىلى مەملەكەتتىك ەڭبەك ينسپەكتورلارى 2000 استام ادامدى قامتيتىن 84 پروفيلاكتيكالىق ءىس-شارا وتكىزدى. 2019 جىلى ەڭبەك ينسپەكتورلارىنىڭ تالاپتارى نەگىزىندە ەلوردانىڭ 8 قۇرىلىس-وندىرىستىك وبەكتىلەرىندە قاۋىپسىزدىك تالاپتارىن ساقتاماۋىنا بايلانىستى جۇمىستار توقتاتىلدى, ال ماتەريالدار سوتقا جىبەرىلدى.
نۇر-سۇلتان قالاسىنىڭ كاسىپوداق ورتالىعىنىڭ توراعاسى تاستانبەك ەسەنتاەۆ جۇمىستا جاراقاتتانۋدىڭ سەبەبى جۇمىس بەرۋشىلەر تاراپىنان بولاتىن نەمقۇرايلىلىقتى العا تارتادى. ونىڭ ايتۋىنشا, جۇمىس بەرۋشىلەر جۇمىس ءتيىستى تۇردە ۇيىمداستىرىلماي, قىزمەتكەرلەردىڭ قاۋىپسىزدىك تەحنيكاسى تۋرالى حابارسىزدىعى مەن ەسكىرگەن جابدىقتاردا جۇمىس ىستەۋگە جول بەرۋلەرى.