قازاقستان رەسپۋبليكاسى پارلامەنتى سەناتىنىڭ توراعاسى داريعا نازارباەۆا ەۋرازيا ەلدەرى پارلامەنتتەرى سپيكەرلەرى IV كەڭەسىنىڭ اياسىندا قىرعىزستان, بەلارۋس, ومان, قاتار جانە تۇركيا رەسپۋبليكاسى پارلامەنتتەرىنىڭ باسشىلارىمەن كەزدەسۋلەر وتكىزدى, دەپ حابارلادى سەناتتىڭ ءباسپاسوز قىزمەتى.
كەڭەس قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ەۋرازيالىق يدەياسىنىڭ 25 جىلدىعىنا ارنالىپ وتىر. شاراعا ەۋروپا مەن ازيانىڭ 65 ەلىنەن پارلامەنتتىك دەلەگاتسيالار مەن حالىقارالىق پارلامەنتتىك 14 ۇيىمنىڭ وكىلدەرى قاتىسۋدا.
سەنات توراعاسى داريعا نازارباەۆانىڭ قىرعىز رەسپۋبليكاسى جوگوركۋ كەنەشىنىڭ توراعاسى داستان جۇمابەكوۆپەن كەزدەسۋدە ەكى ەل اراسىنداعى قاتىناستاردىڭ اۋقىمدى ماسەلەلەرى تالقىلاندى. د.نازارباەۆانىڭ ايتۋىنشا, ەكى رەسپۋبليكا پارلامەنتشىلەرىنىڭ ۇنقاتىسۋى مەن پارلامەنتارالىق كەڭەستىڭ ناتيجەلى جۇمىسى ونىڭ ماڭىزدى بولشەگى بولىپ تابىلادى.
«تاريحتىڭ بايلىعى, ءتىل مەن مادەنيەتتىڭ ورتاقتىعى قازاقستان مەن قىرعىزستان ىنتىماقتاستىعىن دامىتۋداعى ماڭىزدى ماسەلە بولىپ تابىلادى. ءبىزدىڭ مادەني-گۋمانيتارلىق بايلانىستارىمىزدى نىعايتۋدى جالعاستىرۋ قاجەت دەپ سانايمىن», – دەدى د.نازارباەۆا.
قازاقستان پارلامەنتى سەناتىنىڭ توراعاسى داريعا نازارباەۆا بەلارۋس رەسپۋبليكاسى ۇلتتىق جينالىسى وكىلدەر پالاتاسىنىڭ توراعاسى ۆلاديمير اندرەيچەنكومەن كەزدەسۋدە ەلدەر اراسىنداعى ىنتىماقتاستىقتىڭ ماڭىزىن اتاپ ءوتتى. ۆ.اندرەيچەنكو قازاقستان ەۋرازيا كەڭىستىگىندە عانا ەمەس, الەمدىك ارەنادا دا بەيبىتشىلىك پەن كەلىسىمدى جانە ىنتىماقتاستىقتى نىعايتۋدا اۋقىمدى ىستەردى اتقارىپ كەلە جاتقانىن ايتتى.
ء«سىزدىڭ ەلىڭىزدىڭ حالىقارالىق بەدەلى زور. بۇگىنگى شارانىڭ وسىنداي جوعارى دەڭگەيدە ءوتۋى دە كەزدەيسوق ەمەس. بۇل كوپجىلدىق ستراتەگيا مەن ناتيجەلى ديپلوماتيالىق باعداردىڭ كورسەتكىشى», – دەدى ۆ.اندرەيچەنكو.
سەنات توراعاسى ومان سۇلتاناتى كونسۋلتاتيۆتىك كەڭەسىنىڭ توراعاسى حاليد حيلال ناسسەر ال-ماۋاليمەن كەزدەسۋدە ەكىجاقتى ىنتىماقتاستىق ماسەلەلەرىن تالقىلادى. ومان وكىلى جىلى شىرايلى قابىلداۋلار ءۇشىن داريعا نازارباەۆاعا العىسىن ءبىلدىردى جانە دىنارالىق كەلىسىم مەن ۇلتارالىق دوستىقتى قولداۋداعى قازاقستاننىڭ الەمدىك بەدەلىن اتاپ ءوتتى.
سەنات توراعاسى قاتار كونسۋلتاتيۆتىك كەڭەسىنىڭ توراعاسى احماد بەن ابداللا بەن زايد ءال ماحمۋدپەن كەزدەسۋدە قازاقستان مەن قاتاردىڭ ىنتىماقتاستىعىن تەرەڭدەتۋدىڭ كەلەشەگىن تالقىلادى. د.نازارباەۆانىڭ پىكىرىنشە, قاتار قازاقستاننىڭ تاياۋ شىعىستاعى ەڭ ماڭىزدى ارىپتەستەرىنىڭ ءبىرى بولىپ تابىلادى. ء«بىزدىڭ حالىقارالىق باستامالارىمىزدى ۇدايى قولداپ كەلە جاتقانى ءۇشىن قاتار تاراپىنا العىس ايتامىز», – دەدى سەنات باسشىسى.
سەنات توراعاسى د.نازارباەۆا مەن تۇركيا رەسپۋبليكاسىنىڭ ۇلى ۇلتتىق جينالىسىنىڭ توراعاسى مۇستافا شەنتوپ ەكى ەل اراسىندا قالىپتاسقان ستراتەگيالىق ارىپتەستىككە 10 جىل تولعانداعى كەزدەسۋدىڭ ەرەكشە ءمانى بار ەكەنىن اتاپ ءوتتى. سەنات توراعاسى وسى ىنتىماقتاستىقتا باۋىرلاس حالىقتاردىڭ مادەني-تاريحي ورتاقتاستىعىن دامىتۋدىڭ ءرولى تۋرالى اتاپ ءوتتى. د.نازارباەۆانىڭ ايتۋىنشا, ايماقتىق جانە جاھاندىق ساياسي ۇدەرىستەرگە قازاقستان مەن تۇركيانىڭ ىقپالى ارتا ءتۇسۋى مەن ولاردىڭ مۇسىلمان جانە تۇركى الەمىندەگى بەدەلى ەكىجاقتى قاتىناستاردى دامىتۋعا جاڭا مۇمكىندىكتەر تۋعىزاتىن بولادى.