نۇر-سۇلتاندا وتكەن «ۇلكەن ەۋرازيا: ديالوگ. سەنىم. ارىپتەستىك» تاقىرىبىنداعى ەۋرازيا ەلدەرى پارلامەنتتەرى سپيكەرلەرىنىڭ 4-كەڭەسىنەن كەيىن ارنايى ءباسپاسوز ءماسليحاتى ۇيىمداستىرىلدى. بۇل تۋرالى ءماجىلىستىڭ ءباسپاسوز قىزمەتى حابارلادى.
وعان ءماجىلىس توراعاسى نۇرلان نىعماتۋلين, رەسەي فەدەراتسياسى فەدەرالدىق جينالىسى مەملەكەتتىك دۋماسىنىڭ توراعاسى ۆلاديمير ۆولودين, كورەيا رەسپۋبليكاسى ۇلتتىق اسسامبلەياسىنىڭ توراعاسى مۋن حي سان جانە 5-كەڭەستى وتكىزەتىن يندونەزيا پارلامەنتى وكىلدەر پالاتاسىنىڭ ۆيتسە-سپيكەرى فادلي زون قاتىستى.
اقپارات قۇرالدارى وكىلدەرىنىڭ الدىندا ءسوز العان ءماجىلىس سپيكەرى 4-كەڭەس - ەۋروپا جانە ازيانىڭ 60-تان استام ەلدەرىنىڭ باسىن قوسقان ەڭ ءىرى ءارى ەڭ بەدەلدى پارلامەنتتىك فورۋمعا اينالعانىن ايتتى.
فورۋمدا تالقىلانعان تاقىرىپتار اۋقىمى وتە كەڭ بولدى. ونىڭ ىشىندە, ايماقتا بەيبىتشىلىك پەن تۇراقتىلىقتى نىعايتۋ, تەرروريزم مەن ەكسترەميزمگە قارسى ءىس-قيمىل, وركەنيەت پەن مادەنيەت ديالوگىن كۇشەيتۋ, پارلامەنتارالىق ىنتىماقتاستىق, يننوۆاتسيالىق ەكونوميكانى دامىتۋ, تسيفرلاندىرۋ, الەۋمەتتىك ماسەلەلەردىڭ شەشىمى قامتىلدى. ەۋرازيا كەڭىستىگىندە تابىستى ىنتىماقتاستىقتى كەڭەيتۋ جانە نىعايتۋ ءۇشىن كوپتەگەن ناقتى ۇسىنىستار مەن تاجىريبەلىك ۇسىنىمدار ايتىلدى,- دەدى ءماجىلىس سپيكەرى.
ودان كەيىن ءسوز العان رەسەي فەدەراتسياسى فەدەرالدىق جينالىسى مەملەكەتتىك دۋماسىنىڭ توراعاسى ۆلاديمير ۆولودين, كورەيا رەسپۋبليكاسى ۇلتتىق اسسامبلەياسىنىڭ توراعاسى مۋن حي سان فورۋمنىڭ پارلامەنتارالىق بايلانىستاردى, جالپى العاندا, ەۋرازيالىق ىنتىماقتاستىقتى ودان ءارى نىعايتۋ ماقساتىن العا قويا وتىرىپ, جان-جاقتى, وتە جوعارى دەڭگەيدە وتكەنىنە ريزاشىلىق ءبىلدىردى. ال يندونەزيا وكىلى فادلي زون كەلەر جىلى ءوز ەلدەرىندە قازاقستاندىق پارلامەنتتىڭ جولىمەن تابىستى وتكىزۋ ءۇشىن بار كۇش-جىگەرىن ارنايتىنىن ايتتى.
نۇرلان نىعماتۋلين بارلىق فورۋمعا قاتىسۋشىلارعا, اقپارات قۇرالدارى وكىلدەرىنە ءوز العىسىن جەتكىزدى.