بەيبىت كۇننىڭ باتىرلارى ءدارىس وقيدى

وفيتسەرلىك توپ دەلەگاتسياسىن «وڭتۇس­تىك» وڭىرلىك قولباسشى­لىعىنىڭ ورىنباسارى, پولكوۆنيك نيازتاي الكەشەۆ پەن قازاقستان رەسپۋبليكاسى ۇلتتىق ۇلانى تاربيە جانە الەۋمەتتىك-قۇقىقتىق جۇمىستار باس باس­قارماسىنىڭ باستىعى, پولكوۆنيك الەكساندر كرامار باستاپ باردى. سونداي-اق دەلەگاتسيا قۇ­رامىندا حالىق قاھارمانى قايرات ۇمبەتوۆ پەن اسكەري سا­لا­داعى جاۋىنگەرلىك ەرلىگى ءۇشىن ءتۇرلى وردەن, مەدالدارعا يە بولعان وفيتسەرلەر – پودپولكوۆنيك ەرجان بايمولدين, اعا لەيتەنانتتار – ەربول وتارباەۆ, جان­دوس بايانباەۆ جانە لەيتەنانت سىرىم سۇندەتوۆ تە بولدى.

اسكەريلەر دەلەگاتسياسىنىڭ نەگىز­گى ماقساتى – اتالعان ءبى­لىم وردالارىندا ۇلتتىق ۇلان­نىڭ قوعامدىق قاۋىپسىزدىك سا­لا­­سىن­داعى قىزمەتىن ەل ىشى­نە كەڭىنەن ناسيحاتتاي وتىرىپ, جاسوسپىرىمدەردى اسكەري-پا­تريوت­تىق رۋحتا تاربيەلەۋگە ۇن­دەۋ بو­لىپ تابىلادى. سونىمەن قا­تار جاستاردىڭ وتانسۇيگىشتىك سەزى­مىن قالىپتاستىرۋ جولىندا ۇلت­تىق ۇلان جانىنان قۇرىلعان «جاس بۇركىت» كلۋبىنىڭ جۇمى­سىنا وقۋشىلاردى كوپتەپ تارتۋ.

كەزدەسۋ اياسىندا ءسوز العان قازاقستان رەسپۋبليكاسى ۇلت­تىق ۇلانىنىڭ تاربيە جانە الەۋ­مەتتىك-قۇقىقتىق جۇمىستار باس باسقارماسىنىڭ باستىعى, پول­كوۆنيك الەكساندر كرامار ۇلت­تىق ۇلاننىڭ بۇگىنگى تاڭداعى قىز­مەتىمەن تانىستىرا كەلە اسكە­ريلەردىڭ جاۋىنگەرلىك ەرلىگى تۋرالى ايتىپ بەردى.

ء«بىزدىڭ ۇلاندىق وفيتسەرلەر اراسىندا ءوزىنىڭ ءومىرىن قاۋىپ-قاتەرگە تىگىپ, ەرلىكتىڭ ۇلگىسىن كورسەتكەن ارىپتەستەرىمىز از ەمەس. ولاردىڭ سانى بۇگىنگى تاڭدا 170-كە جۋىقتايدى. بۇل ازاماتتاردىڭ بارلىعى دا وزدەرىنىڭ ەرلىك ءىس-قيمىلدارىمەن وزگەنىڭ ومىرىنە اراشا تۇسكەن بەيبىت كۇننىڭ باتىرلارى. سوندىقتان دا ولاردى ءبىز مەيلىنشە قوعام اراسىندا كەڭىنەن ناسيحاتتاپ, جاستارعا ۇلگى ەتىپ كورسەتە بەرگە­نىمىز ءجون», دەدى ول.

جيىندا 6506 اسكەري ءبولى­مى­نىڭ كومانديرى, پولكوۆنيك قايرات ۇمبەتوۆ باستاعان اسكە­ري­لەردىڭ ءدارىسى بۇدان بىلاي تۇ­راقتى تۇردە ۇيىمداستىرىلىپ تۇراتىندىعى ايتىلدى.

«جاسوسپىرىمدەر اراسىندا بولىپ تۇراتىن كەلەڭسىز جاعدايلار قوعام نازارىن وزىنە اۋدارۋدا. ءبىز كەلەشەكتە وسىنداي كەلەڭسىزدىكتەردىڭ الدىن الۋعا اسكەري ازامات رەتىندە ءوز ۇلەسىمىزدى قوسايىق دەپ, ىشكى ىستەر ءمينيسترى مەن ۇلتتىق ۇلان باس قولباسشىلىعىنىڭ جوسپارىنا ساي تىڭ باستامامەن مەكتەپتەرگە بارىپ جاتىرمىز. ياعني ەرلىكتىڭ ۇلگىسىن كورسەتىپ, جوعارى ماراپاتقا يە بولعان اسكەري ءبولىم وفيتسەرلەرىنىڭ قاتىسۋىمەن وقۋشىلارعا اسكەري-پاتريوتتىق رۋحتى وياتۋ نيەتىمەن ارنايى دارىستەر وتكىزۋدى باستادىق», دەدى حالىق قاھارمانى ق.ۇمبەتوۆ.

ەرلىك جاساعان ۇلاندىق اسكە­ريلەردىڭ مۇنداي باستاماسىن قا­لاداعى ءبىلىم وشاق­تارىنىڭ باسشىلارى دا قوشتاپ وتىر.

«بىزگە جانە ءبىزدىڭ وقۋشى­لارىمىز ءۇشىن بۇگىنگى كۇن باتىر­لارىنىڭ وزدەرى جۇرگىزگەن دارىستەر وتە قىزىق ءارى شىنايى. سوندىقتان دا ءبىزدىڭ مەكتەپكە كەۋ­­دەسىنە ەلباسىنىڭ ءوزى وردەن-مەدال تاق­قان كەيىپكەرلەردىڭ كەلۋى زور مارتەبە. اتاپ ايتقاندا, اسكەري سا­لادا ەتكەن ەرەن ەڭبە­گى مەن ەر­لىگى ءۇشىن «ايبىن» وردە­نى­مەن ماراپاتتالعان پودپولكوۆنيك ەر­جان بايمولدين, اعا لەيتەنانتتار جان­دوس بايانباەۆ جانە ەربول وتارباەۆ, «جاۋىنگەرلىك ەرلىگى ءۇشىن» مەدالىنىڭ يەگەرى اتانعان لەيتەنانت سىرىم سۇن­دەتوۆ سىندى ازاماتتاردان جاس­وسپىرىمدەر ۇلگى الادى دەپ ءۇمىت ارتامىز», دەيدى ى.التىن­سارين اتىنداعى №65 مەكتەپ-گيمنازيا ديرەكتورىنىڭ مىندە­تىن اتقارۋشى ايگۇل كەرىمباەۆا.

ايتا كەتەيىك, اتالعان ءىس-شارا اياسىندا 6506 اسكەري ءبولىمىنىڭ باسشىلىعى مەن №46 جانە №65 مەكتەپ ديرەكتورلارى اراسىندا ءوزارا ارىپتەستىك مەموراندۋمى بەكىتىلدى. سونىڭ اياسىندا الداعى ۋاقىتتا اسكەري ءبولىم وفيتسەرلەرى مەكتەپ وقۋشىلارىنا بارىپ ارنايى ءدارىس وقىپ, كەزدەسۋ ۇيىم­داستىرىپ تۇراتىن بولادى. وعان قوسا, وقۋشىلاردى اسكەري سالانىڭ قىر-سىرىمەن جاقىنىراق تانىستىرۋ ماق­ساتىندا 6506 اسكەري ءبولىمىنىڭ اشىق ەسىك كۇندەرىن ۇيىمداستىرۋ كوزدەلەدى.

ەستەرىڭىزگە سالا كەتەيىك, بيىل­­عى وقۋ جىلىنىڭ باسىندا­ شىمكەنتتىك ءبىر توپ مەكتەپ وقۋ­­­شىلارىنىڭ قاتىسۋىمەن تو­بە­لەس بولىپ, ول قوعام نازارىن وزىنە اۋدارعان ەدى. الداعى ۋاقىتتا مۇنداي كەلەڭسىزدىكتەردىڭ الدىن الۋ ماقساتىندا ۇلتتىق ۇلان وفي­تسەر­لەرى وقۋشىلاردىڭ سىنىبىنا بارىپ ساباق وتكىزۋدى قولعا الا­دى.