ەلىمىزدىڭ پرەزيدەنتى قاسىم-جومارت توقاەۆتىڭ حالىققا ارناعان العاشقى جولداۋىندا قازاقستان قوعامىن تولعاندىرىپ جۇرگەن كوپتەگەن سۇراقتارعا تۇششىمدى جاۋاپ بەرىلگەن. «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋدىڭ اتى ايتىپ تۇرعانداي, ماڭىزدى قۇجاتتا قوعامدىق ديالوگقا, اشىقتىققا, ادامداردىڭ مۇڭ-مۇقتاجىنا جەدەل نازار اۋدارۋعا ەرەكشە ەكپىن بەرىلگەن.
مەملەكەت باسشىسى قوعامدىق كەلىسىمدى نىعايتۋ قاجەتتىگىن ايتا كەلە: «الەۋمەتتىك جانە ەتنوستىق توپتار اراسىنداعى كەلىسىم – بۇكىل قوعامنىڭ بىرلەسكەن ەڭبەگىنىڭ ناتيجەسى. وسىعان وراي ساياسي ۇردىستەردى سارالاپ, بىرلىگىمىزدى نىعايتا ءتۇسۋ ءۇشىن ناقتى شارالار قابىلداۋ كەرەك. قازاق حالقىنىڭ مەملەكەت قۇراۋشى ۇلت رەتىندەگى ءرولىن بەكەمدەپ, ەتنوسارالىق تاتۋلىق پەن دىنارالىق تۇسىنىستىكتى قالىپتاستىرا بەرۋىمىز قاجەت. ءبىزدىڭ ۇستانىمىمىز: «ەل بىرلىگى – ونىڭ ارالۋاندىعىندا!». ەلىمىزدەگى ەتنوستىق توپتاردىڭ ءتىلى مەن مادەنيەتىن دامىتۋعا جاعداي جاساي بەرەمىز» دەدى. قاسىم-جومارت كەمەل ۇلى وسى ءسوزى ارقىلى تۇڭعىش پرەزيدەنت – ەلباسى نۇرسۇلتان نازارباەۆ نەگىزىن سالعان ەلىمىزدەگى ەتنوسارالىق تاتۋلىقتى ودان ءارى نىعايتۋعا نيەتتى ەكەندىگىن اڭعارتتى. بۇل رەتتە بايتاق وتانىمىزدى مەكەن ەتكەن وزگە ۇلت وكىلدەرى دە جاۋاپكەرشىلىك جۇگىن سەزىنىپ, ەل بىرلىگى جولىنداعى ورتاق ىسكە ءوز ۇلەستەرىن قوسادى دەپ ويلايمىن.
ءوزىم سپورت سالاسىندا جۇرگەندىكتەن پرەزيدەنتتىڭ سپورتتى, ونىڭ ىشىندە بۇقارالىق سپورتتى دامىتۋعا قاتىستى ايتقاندارىنا ايرىقشا نازار اۋداردىم. «سپورت ينفراقۇرىلىمىنىڭ بالالار ءۇشىن بارىنشا قولجەتىمدى بولۋىن قامتاماسىز ەتۋ كەرەك» دەدى مەملەكەت باسشىسى. راسىندا, بالا – ءبىزدىڭ بولاشاعىمىز. بالانى سپورتقا كىشكەنە كەزىنەن باۋلىعان دۇرىس. بۇل رەتتە ءوزىم تۇراتىن وسكەمەن قالاسىندا بالالار ءۇشىن دە, ەرەسەكتەر ءۇشىن دە سپورتپەن, ونىڭ ىشىندە بۇقارالىق سپورتپەن اينالىسۋعا ءتيىستى جاعداي جاسالىپ وتىر. قالامىزدا جاقىندا عانا «سامال» اتتى ساياباق اشىلدى. مۇندا دا سپورتتىق قۇرىلعىلار كوپتەپ ورناتىلعان. جولداۋ اياسىندا الداعى ۋاقىتتا ەلىمىزدە, وبلىسىمىزدا بۇقارالىق سپورت ودان ءارى قارىشتاپ داميتىنىنا سەنىم مول.
ولگا رىپاكوۆا,
وليمپيادا چەمپيونى
وسكەمەن