«قالالىق تۋريزم باسقارماسىنىڭ ۇيىمداستىرۋىمەن وتكەن زەرگەرلەر كونكۋرسىندا «الما-سىرناي» ۇزدىك دەپ تانىلدى. «Almaty Art center» ورتالىعىندا بولعان بايقاۋعا ەلىمىزدىڭ تۇكپىر-تۇكپىرىنەن قولونەرشىلەر كەلگەن» دەپ حابارلايدى الماتى قالاسى اكىمدىگىنىڭ ءباسپاسوز قىزمەتى.
بۇل جولعى بايقاۋعا 50 ۇمىتكەردىڭ ىشىنەن ىرىكتەلگەن 20-سى قاتىستى. بايقاۋدىڭ باستى ماقساتى الماتىنىڭ برەندىن انىقتاۋ بولىپتى.
«بۇل كونكۋرستىڭ ماقساتى – قازاقستاندىق قولونەر شەبەرلەرىنىڭ مىنا سۋۆەنير, كادەسىي جاسايتىن ادامداردىڭ جۇمىستارىن قولداۋ. مىسالى, ءسىز قاي مەملەكەتكە بارساڭىز دا شەتەلدە ءار ءتۇرلى كادەسىيلار الىپ كەلەسىز. كەم دەگەندە ماگنيت بولۋى كەرەك. سوندىقتان الماتىدا كادەسىيجوق دەپ ايتۋعا بولمايدى. بىراق ولاردىڭ سانى ءازىر از» دەدى «Qazaq-Oner» قولونەر ورتالىعىنىڭ باسشىسى ايگۇل جانسەرىكوۆا.
كورمەگە قويىلعان سۋۆەنيرلەر كەلگەن كورەرمەندەردىڭ كوڭىلىنەن شىقتى. ءىس-شارا بارىسىندا شەبەرلەردىڭ قولىنان شىققان قازاقى ناقىشتاعى تۋىندىلار دا ساتىلىمعا ءتۇستى.
«نەگىزگى تالاپ – كادەسىيلار بۇعان دەيىن بولماعان بولۋى كەرەك. وزىندىك ەرەكشەلىگى بولعان. سونىمەن قاتار ءبىز ونى وندىرىسكە شىعارماق ويدامىز. ياعني ول - كىشكەنتاي, قاراپايىم, بىراق قازاقتىڭ قولونەرىن كورسەتەتىن, قازاقتىڭ تاريحىن كورسەتەتىن, الماتىنىڭ ءوزىنىڭ ەرەكشەلىگىن كورسەتەتىن سونداي بۇيىم بولۋى كەرەك بولدى», – دەيدى الماتى قالاسى تۋريزم باسقارماسى باسشىسىنىڭ ورىنباسارى باۋىرجان بىرباەۆ.
سونىمەن, 20 زەرگەر ۇسىنعان 20 جۇمىستىڭ ىشىنەن «الما-سىرناي» ۇزدىك دەپ تانىلدى. كادەسىيدىڭ اۆتورى ازامات باقي جۋرناليستەرمەن كەزدەسكەن كەزدە الماتىنى «الما» بەينەسىندە ەلەستەتىپ, سيمۆولى رەتىندە سازدى الما-اسپابىن جاساعانىن ايتتى.
باس جۇلدەگە 1 ملن تەڭگە بەرىلدى. ەكىنشى ورىنعا 700 مىڭ, ال ءۇشىنشى ورىن العان زەرگەر 500 مىڭ تەڭگەگە يە بولدى.
«ول جەردە تاپسىرعان جۇمىسىم - كەراميكادان جاسالعان الما. ول اسپاپقا «الما-سىرناي» دەگەن ات بەردىك. بايقاۋ بارىسىندا ونى باسقا اسپاپتارمەن سۇيەمەلدەپ ويناپ, ءبىرىنشى ورىنعا يە بولدىق», – دەيدى قولونەر بايقاۋىنىنىڭ جەڭىمپازى ازامات باقي.
الماتى