پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا مەملەكەتتىك ساتىپ الۋلاردا جەرگىلىكتى قامتۋ ۇلەسىن ارتتىرۋ ماسەلەسى قارالدى. مەملەكەتتىك ساتىپ الۋلارداعى وتاندىق تاۋار وندىرۋشىلەردى قولداۋ بويىنشا قابىلدانىپ جاتقان شارالار تۋرالى پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءاليحان سمايىلوۆ باياندادى.
ءا. سمايىلوۆتىڭ ايتۋىنشا, 2019 جىلدىڭ 1 قاڭتارىنان باستاپ «مەملەكەتتىك ساتىپ الۋ تۋرالى» زاڭنىڭ 14-بابىمەن قازاقستان ۇكىمەتىنە ۇلتتىق رەجيمنەن, ونىڭ ىشىندە وتاندىق تاۋار وندىرۋشىلەردى قولداۋ ماقساتىندا الىپ قويۋ قۇقىعى بەلگىلەنگەن.
«وسى ماقساتتا ۇلتتىق رەجيمنەن 2 جىل مەرزىمگە 3 تاۋار پوزيتسياسى بويىنشا: اۆتوكولىك, ترانسفورماتورلار, كابەلدىك ءونىم بويىنشا الىپ قويۋ بەلگىلەندى», — دەدى ۆيتسە-پرەمەر.
اعىمداعى جىلدىڭ شىلدەسىندە ۆەب-پورتالدا تاپسىرىس بەرۋشىلەر مەن ءونىم بەرۋشىلەرگە تاۋارلاردىڭ شىعۋى تۋرالى سەرتيفيكاتتاردى, ونىڭ ىشىندە ست-KZ سەرتيفيكاتتارىن ەنگىزبەي اكتىگە قول قويۋعا مۇمكىندىك بەرمەيتىن فورماتتىق-لوگيستيكالىق باقىلاۋ ورناتىلعان. ءا. سمايىلوۆ اتاپ وتكەندەي, بۇل مەملەكەتتىك ساتىپ الۋلارداعى جەرگىلىكتى قامتۋ بويىنشا وبەكتيۆتى كورىنىستى ايقىنداۋعا مۇمكىندىك بەرەدى جانە مونيتورينگتى جەڭىلدەتەدى.
بۇدان وزگە, 2019 جىلعى 1 شىلدەدەن باستاپ جيھاز ونىمدەرى مەن جەڭىل ونەركاسىپ تاۋارلارىن مەملەكەتتىك ساتىپ الۋ تەك الدىن الا بىلىكتىلىك ىرىكتەۋ ارقىلى وتاندىق تاۋار وندىرۋشىلەر اراسىندا عانا جۇرگىزىلەدى, مۇندا جەتكىزۋشىنىڭ نەگىزگى كريتەريى يندۋستريالىق سەرتيفيكات بولىپ تابىلادى.
«پورتال تاپسىرىس بەرۋشىلەرگە بۇل تاۋارلاردى باسقا تاسىلمەن ساتىپ الۋعا جول بەرمەيدى, سونىمەن قاتار, جەتكىزۋشىدەن اۆتوماتتى رەجيمدە يندۋستريالىق سەرتيفيكاتتى جانە ست-KZ سەرتيفيكاتىن تالاپ ەتەدى», — دەدى ءا. سمايىلوۆ.
سونىمەن قاتار, قۇرىلىستاعى جۇمىستاردى ساتىپ الۋ تۋرالى ۇلگىلىك شارتتار ازىرلەندى, ونىڭ شەڭبەرىندە 2019 جىلدىڭ 1 شىلدەسىنەن باستاپ قۇرىلىس بويىنشا جۇمىستاردى ساتىپ الۋدا تەك وتاندىق تاۋار وندىرۋشىلەر تىزىلىمىنە ەنگىزىلگەن قۇرىلىس ماتەريالدارى پايدالانىلادى.
سونىمەن قاتار, 2019 جىلدىڭ 1 قىركۇيەگىنەن باستاپ قۇرىلىس جۇمىستارىن ساتىپ الۋ دا تەك الدىن الا بىلىكتىلىك ىرىكتەۋ ارقىلى جۇرگىزىلەدى, بۇل جاعدايدا قارجىلىق تۇراقتىلىق كريتەري بولىپ تابىلادى.
«بۇل كورسەتكىش مەملەكەتتىك كىرىستەر ورگاندارىنىڭ مالىمەتتتەرى بويىنشا جانە تەك قازاقستاندىق سالىق تولەۋشىلەر بويىنشا قالىپتاستىرىلاتىنىن ەسكەرسەك, اتالعان نورما وتاندىق بيزنەستى دە قولدايدى», — دەدى ۆيتسە-پرەمەر.
2020 جىلدىڭ 1 قاڭتارىنان باستاپ مەملەكەتتىك ساتىپ الۋلاردا اقپاراتتاندىرۋ وبەكتىلەرىن, سونداي-اق باعدارلامالىق قامتىلىم مەن ەلەكتروندىق ونەركاسىپ ونىمدەرىن قۇرۋ جانە دامىتۋ قىزمەتتەرى بويىنشا وسىعان ۇقساس قولداۋ شارالارى كوزدەلگەن. تەك وتاندىق ازىرلەۋشىلەر ەنەتىن سەنىم بىلدىرىلگەن ءونىم تىزىلىمىندە بولۋى الدىن الا بىلىكتىلىك ىرىكتەۋگە كىرۋدىڭ نەگىزگى كريتەريى بولىپ تابىلادى.
«مەملەكەت باسشىسىنىڭ تاپسىرماسىن ورىنداۋ اياسىندا 2020 جىلدان باستاپ پيلوتتىق رەجيمدە بارلىق مەملەكەتتىك ساتىپ الۋلاردى بىرىڭعاي ۇيىمداستىرۋشىلارعا ءتيىستى دەڭگەيدە بەرۋدى كوزدەيتىن مەملەكەتتىك ساتىپ الۋدى ورتالىقتاندىرۋ ەنگىزىلەدى. ماقۇلدانعاننان جانە ناقتىلىقسىزدارى رەداكتسيالانعاننان كەيىن بۇل مودەل بۇكىل رەسپۋبليكادا قولدانىلاتىن بولادى. ۇيىمداستىرۋشىلار سانى ەداۋىر تومەندەيدى. اكىمشىلەندىرۋ جەڭىلدەتىلەدى, بۇل مەملەكەتتىك ساتىپ الۋداعى جەرگىلىكتى قامتۋدى ءتيىمدى رەتتەۋگە مۇمكىندىك بەرەدى», — دەپ تۇيىندەدى ءا. سمايىلوۆ.