پارلامەنت سەناتىنىڭ توراعاسى داريعا نازارباەۆا جانە سلوۆاكيا رەسپۋبليكاسى ۇلتتىق كەڭەسىنىڭ توراعاسى اندرەي دانكومەن كەزدەسۋى بارىسىندا قازاقستان مەن سلوۆاكيانىڭ پارلامەنتارالىق ءىس-قيمىلى مەن ەكونوميكالىق ىنتىماقتاستىق ماسەلەلەرى تالقىلاندى. تاراپتار ەكى ەل اراسىنداعى بايلانىستاردىڭ قارقىندى دامۋى مەن پارلامەنتتەر ىنتىماقتاستىعىنىڭ تيىمدىلىگىن ارتتىرا ءتۇسۋ قاجەتتىگىن اتاپ ءوتتى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
سەنات توراعاسى بيىلعى جىلى سلوۆاكيا توراعالىق ەتىپ وتىرعان ەقىۇ ىنتىماقتاستىعىنا قازاقستان زور ماڭىز بەرەتىنىن اتاپ ءوتتى. د.نازارباەۆا ەلىمىز سلوۆاكيا توراعالىعىنىڭ باعدارلاماسىن قولدايتىنىن جانە العا قويىلعان جوسپارلاردى ىسكە اسىرۋدا كومەك كورسەتۋگە ءازىر ەكەنىن ايتتى.
سەنات باسشىسى سونداي-اق ەكى ەل اراسىنداعى ساۋدا-ەكونوميكا سالاسىنداعى ىنتىماقتاستىقتى كەڭەيتۋ ماسەلەسىنە نازار اۋداردى. قازاقستان سلوۆاكيادا شىعارىلاتىن ماشينا جاساۋ تەحنولوگيالارىن تارتۋعا ەرەكشە مۇددەلى. سونداي-اق داريعا نازارباەۆانىڭ ايتۋىنشا سلوۆاكيا كاسىپكەرلەرى ەاەو ارتىقشىلىقتارىن پايدالانا الادى.
«سلوۆاكيالىق كاسىپكەرلەرگە وداقتىڭ كوپ ميلليوندىق نارىعىنا شىعا الاتىن جوعارى تەحنولوگيالىق بىرلەسكەن كاسىپورىنداردى قازاقستاندا اشۋدى ۇسىنامىز. ءبىزدىڭ ەلىمىز ونىمدەرىڭىزدى ءۇشىنشى ەلدەر نارىعىنا ىلگەرىلەتەتىن كوپىر بولا الادى», - دەدى د.نازارباەۆا.
سلوۆاكيا رەسپۋبليكاسى ۇلتتىق كەڭەسىنىڭ توراعاسى ا.دانكو ءوز كەزەگىندە سەنات باسشىسىنا كەزدەسۋ ءۇشىن العىس ايتىپ, ەكونوميكا جانە زاڭ تۇرعىسىندا ىنتىماقتاستىقتى دامىتۋعا ءازىر ەكەنىن ءبىلدىردى.
سلوۆاكيا پارلامەنتىنىڭ باسشىسى سونداي-اق ءىرى ينۆەستيتسيالىق جوبالاردى دامىتۋ الاڭى رەتىندە قازاقستانعا نازار اۋدارعان ينۆەستورلار تۋرالى ايتىپ ءوتتى.
ا.دانكو ودان باسقا ءبىلىم بەرۋ, قورعانىس جانە اۋىل شارۋاشىلىعى, سونداي-اق ورمان شارۋاشىلىعىن دامىتۋ سالاسىندا ىنتىماقتاستىققا ءازىر ەكەنىن ايتتى.