بۇل كۇندەرى سولتۇستىك قازاقستان وبلىسى «رۋحاني جاڭعىرۋ» باعدارلاماسى بويىنشا كوپتەگەن شارالار وتكىزىپ جاتىر. سونىڭ ىشىندە ايىرتاۋ اۋدانىنداعى «بوتاي» مەملەكەتتىك مۋزەي قورىعىندا «بوتاي – ۇلى دالا مادەنيەتى» دەگەن تاقىرىپتا سۋرەتشىلەردىڭ حالىقارالىق سيمپوزيۋمى باستالدى.
وعان الىس جانە جاقىن شەتەلدەردەن جيىرماعا جۋىق سۋرەتشى قاتىسىپ, «بوتاي» قونىسى» ارحەولوگيالىق ەسكەرتكىشىن ءوز كوزدەرىمەن كورىپ, شەبەرلىگى مەن فانتازياسى جەتكەنشە ونىڭ ماڭىزدىلىعىن قىلقالامنىڭ كۇشىمەن دۇنيەگە پاش ەتپەك. بۇل شارا قازاقستاننىڭ تەرىستىگىنە دەگەن تۋريستەردىڭ قىزىعۋشىلىعىن تۋدىرىپ, اتالعان سالانى ورىستەتۋگە دە سەپتىگىن تيگىزەر دەگەن ماقسات العا قويىلعان.
سيمپوزيۋمعا قاتىسۋشى سۋرەتشىلەر اراسىندا قازاقستاندىق كاميللا لي, عاليا ماقاشەۆا, ءۇمىت جۇبانىشەۆا,ليۋدميلا ايتۋاروۆا, ليليا بەليكوۆا, تىلەۋعازى جۇبانىشەۆ, ايدوس ماقانوۆ, باقىتنۇر بۇردەسبەكوۆ, بولات اسكەربەكوۆتەرمەن قاتار رەسەيلىك نۇرلان تايىروۆ, ەۆگەني زارەمبا, شاميل گۋليەۆ, قىرعىزستاندىق سارقىن سوورومباەۆ, بووبەك ارىقوۆ, وزبەكستاندىق الىشەر حاميدوۆ جانە ت.ب. قىلقالام شەبەرلەرى بار. بەينەلەۋ ونەرىنىڭ ءتۇرلى جانرىنا ماشىقتانعان ولاردىڭ نەگىزىنەن پەيزاجدىق كارتينالار جازىپ جاتقانى كورىنىپ تۇر. سونى سەزگەندەي تابيعات انا دا ولاردىڭ جۇمىس ىستەۋىنە جايلى جاعداي تۋعىزىپ, كۇزدىڭ قوڭىرجاي, جىلى كۇندەرىن تۋدىرىپ تۇر.
ۇيىمداستىرۋشىلاردىڭ ايتۋىنا قاراعاندا, بۇل شارا سۋرەتشىلەردىڭ ءوزارا ىنتىماقتاستىعىن دا تۋعىزىپ, ونەردىڭ ورىستەي تۇسۋىنە جول اشۋعا ءتيىس.
بارلىق قاتىسۋشىلارعا ۇيىمداستىرۋشىلار وزدەرىنىڭ وسى ساپاردان جازعان ەكى تۋىندىسىن وبلىستىق بەينەلەۋ ونەرى مۋزەيىنە سىيلاۋدى ۇسىنعان. وعان بارلىق قاتىسۋشىلار دا كەلىسىمدەرىن بەرىپتى. سيمپوزيۋمنىڭ جابىلاتىن كۇنى – 27 قىركۇيەك. وسى كۇنى سۋرەتشىلەردىڭ بارلىق ەڭبەكتەرى كورمەگە قويىلىپ, وبلىس تۇرعىندارىنىڭ نازارىنا ۇسىنىلاتىن بولادى.
وسىدان تۋرا جيىرما جىل بۇرىن پەتروپاۆلدا قاراساي مەن اعىنتاي باتىرلارعا ەسكەرتكىش اشىلعان بولاتىن. وسى داتاعا وراي وبلىستىق ۋنيۆەرسيتەتتە « ۇلى دالانىڭ حاس باتىرلارى» اتتى رەسپۋبليكالىق عىلىمي-تەوريالىق كونفەرەنتسيا بولىپ ءوتتى. ونىڭ جۇمىسىنا وبلىس اكىمىنىڭ ورىنباسارى رۋسلان الىشەۆ, الماتىدان جانە استانادان كەلگەن ەلىمىزدىڭ ءبىرتالاي تانىمال تاريحشىلارى قاتىستى. سولاردىڭ ىشىندە ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى بەرەكەت كارىباەۆتىڭ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى ماقسات الپىسبەستىڭ, ءو.سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتىنىڭ پروفەسسورى امانجول كۇزەمباي ۇلى جانە ت.ب. باياندامالارى مازمۇندى بولىپ, قىزىققان جاستار وزدەرىنە مول ماعلۇمات الدى.
ال قاراساي مەن اعىنتاي باتىرلار جەرلەنگەن ايىرتاۋ اۋدانىندا مەرەكەلىك شارالار وتۋدە.
سولتۇستىك قازاقستان وبلىسى