كاسپي – دوستىق تەڭىزى دەلىنەدى, سوندىقتان الىپ سۋ ايدىنىنىڭ جاعالاۋىن مەكەن ەتكەن كورشى ەلدەردىڭ اسكەريلەرى بىرلەسە جاتتىعۋ جاساپ, كۇش-قايراتتارىن جەتىلدىرۋى ءارى ءوزارا تاجىريبە الماسۋى ءداستۇرلى قالىپقا ەنگەن. مىنە, تاعى كۇزدىڭ قوڭىر سالقىن مەزگىلىندە كاسپي تەڭىزىندە قازاقستان مەن رەسەي اسكەرلەرىنىڭ بىرىككەن تەڭىز وقۋ-جاتتىعۋلارى وتۋدە.
بىرلەسكەن وقۋ-جاتتىعۋلارىنا قازاقستان رەسپۋبليكاسى اسكەري-تەڭىز كۇشتەرىنىڭ «ورال», «سارىارقا», «ماڭعىستاۋ» جانە «قازاقستان» راكەتالىق-ارتيللەريالىق كەمەلەرى رەسەي فەدەراتسياسى اسكەري-تەڭىز كۇشتەرىنىڭ كاسپي فلوتيلياسىمەن بىرگە قاتىسۋدا.
وقۋ-جاتتىعۋلار كاسپي تەڭىزىنىڭ قازاقستاندىق اكۆاتورياسىندا ءوتىپ, 22 قىركۇيەككە دەيىن سوزىلادى. جۋىردا اقتاۋ قالاسىنىڭ پورتىنا رەسەيلىك «تاتارستان» كەمەسى مەن «ستۋپينەتس» كاتەرى, سونىمەن قوسا 2 گيدروگرافيكالىق كەمە, راكەتالىق جانە رەيدتىك ترالدار, قۇتقارۋ بۋكسيرى مەن كىشى تانكەر كەلگەن بولاتىن. وقۋ-جاتتىعۋلارعا قازاقستان اسكەري-تەڭىز كۇشتەرىنىڭ باس قولباسشىسى, كونتر-ادميرال ساكەن بەكجانوۆ جەكە باسشىلىق ەتۋدە.
– جاتتىعۋ بارىسىندا قازاقستان مەن رەسەي اسكەري-تەڭىز كۇشتەرى بىرىككەن توپتارىنىڭ جاڭا ۇرىس فورمالارى مەن ادىستەرىن زەردەلەۋگە باستى نازار اۋدارىلماق. ەكى ەلدىڭ تەڭىزشىلەرى ارنايى وپەراتسيالار مەن ۇرىستى جۇرگىزۋ بويىنشا بىرقاتار ماسەلەنى پىسىقتاپ, كەمەلەردىڭ بىرلەسكەن ءىس-قيمىلدارىن, تاپسىرمانى ورىنداۋ ورنىنداعى مانەۆرلەردى جۇزەگە اسىراتىن بولادى. وسى جاتتىعۋلاردىڭ ناتيجەسىندە ەكى ەلدىڭ بىرىككەن شتابتارىنىڭ ۇيلەسىمدىلىگى باعالانىپ, وفيتسەرلەردىڭ بىلىكتىلىك دەڭگەيى سىنعا الىنادى, – دەيدى بىرلەسكەن وقۋ-جاتتىعۋ جونىندە اقپارات بەرگەن كاپيتان ر.يگيسينوۆ.
قازاقستاندىق جانە رەسەيلىك اسكەري تەڭىزشىلەر بىرىككەن وقۋ-جاتتىعۋلاردان بولەك, حالىقارالىق ارميالىق ويىندارى بارىسىندا ءوزارا ءىس-قيمىلداردى بىرلەسە وتكىزىپ, ماشىقتانۋ شەبەرلىكتەرىن جەتىلدىرىپ كەلەدى.
ماڭعىستاۋ وبلىسى