تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىندە «تسيفرلىق قازاقستان» مەملەكەتتىك باعدارلاماسىنىڭ ورىندالۋ بارىسىن قاداعالايتىن ارنايى توپ قۇرىلدى. توپ قوعام قايراتكەرلەرى, جۋرناليستەر مەن بلوگەرلەردەن قۇرالعان «تسيفرلىق كوميسسارلاردان» تۇرادى. بۇل تۋرالى مينيسترلىكتىڭ ءباسپاسوز قىزمەتى حابارلادى.
تسيفرلىق كوميسسارلار تاۋەلسىز باقىلاۋشىلار رەتىندە مەملەكەتتىك ورگانداردىڭ «تسيفرلىق قازاقستان» باعدارلاماسى بويىنشا ىسكە اسىرىلىپ جاتقان جوبالارى مەن باستامالارىنا قوعامدىق نەگىزدە مونيتورينگ جۇرگىزەدى. مەملەكەت تاراپىنان كورسەتىلەتىن قىزمەتتەر مەن حقو جۇمىسى بويىنشا قىزمەتتى الۋشى-ازامات تۇرعىسىنان ەسكەرتۋلەر مەن ۇسىنىستار بەرەدى.
العاشقى تسيفرلىق كوميسسارلار قۇرامىنا ايگۇل سولوۆەۆا, ءلايلا سۇلتانقىزى, رينات بالعاباەۆ, وركەن كەنجەبەك, ەۆگەني كوچەتوۆ, رەنات تاشكينباەۆ, ولجاس ساتيەۆ, ديانا وكرەموۆا, ياكوۆ فەدوروۆ, جاننا مۇحامادي, ەرلان ساكەنوۆ, ماحاببات ەسەن, تيمۋر بەكتۇر كىردى.
«كونسترۋكتيۆتى سىن – پروگرەستىڭ قوزعاۋشى كۇشى نەمەسە سىرت كوز-سىنشى دەگەندەي, ءار بىلدىرىلگەن پىكىر مەن ۇسىنىمدار ءوز جۇمىسىمىزعا سىني كوزقاراسپەن قاراۋعا, ناتيجەلەرىمىزدى جاقسارتا تۇسۋگە ىقپال ەتەدى. وزدەرىڭىز بىلەسىزدەر, ءبىزدىڭ مينيسترلىك بارلىق مەملەكەتتىك ورگاندار جۇزەگە اسىرىپ جاتقان «تسيفرلىق قازاقستان» مەملەكەتتىك باعدارلاماسىنىڭ ۇيلەستىرۋشىسى بولىپ تابىلادى. سوندىقتان ءبىز تسيفرلاندىرۋ سالاسىندا اتقارىلىپ جاتقان جۇمىستاردىڭ ناقتى ناتيجەلەرىنىڭ كورىنىسىن, ونىڭ ىشىندە ەسكەرتۋلەر مەن ۇسىنىستاردى كورىپ, ءبىلىپ وتىرعىمىز كەلەدى. مەن IT-كومپانيالارمەن كەزدەسىپ تۇرامىن, بىراق بىزگە سول قىزمەتتەردى الۋشىلارمەن ءوزارا بايلانىس قاجەت», - دەدى كەزدەسۋدە تسيفرلىق كوميسسارلار توبىن قۇرۋ تۋرالى باستاما كوتەرگەن اسقار جۇماعاليەۆ.
العاشقى كەزدەسۋدە قاتىسۋشىلار ەلدەگى تسيفرلاندىرۋ جوبالارى بويىنشا پىكىرلەرىمەن ءبولىسىپ, ەلەكتروندىق ۇكىمەت پورتالىنىڭ قىزمەتتەرى مەن سەرۆيستەرىن وڭايلاتۋ جانە حقكو جۇمىسى بويىنشا ۇسىنىستارىن ءبىلدىردى.
تسيفرلىق كوميسسارلارمەن وتكەن العاشقى كەزدەسۋ سوڭىندا مينيستر ازاماتتىق ۇستانىمدارى ءۇشىن العىسىن ءبىلدىرىپ, وزەكتى ماسەلەلەر مەن ۇسىنىستاردى تالقىلاۋ ءۇشىن وسى قۇرامدا تۇراقتى تۇردە كەزدەسۋلەر وتكىزىلەتىنىن حابارلادى.
العاشقى تسيفرلىق كوميسسارلار - ايگۇل سولوۆەۆا, ءلايلا سۇلتانقىزى, رينات بالعاباەۆ, وركەن كەنجەبەك, ەۆگەني كوچەتوۆ, رەنات تاشكينباەۆ, ولجاس ساتيەۆ, ديانا وكرەموۆا, ياكوۆ فەدوروۆ, جاننا مۇحامادي, ەرلان ساكەنوۆ, ماحاببات ەسەن, تيمۋر بەكتۇر.