ماڭعىستاۋ وبلىسىنىڭ «ويماشا» پوليگونىندا راكەتا اسكەرلەرى مەن ارتيللەريا بولىمدەرىنىڭ لاگەرلىك جيىندارى اياقتالۋدا. ءبىر اي ىشىندە ەلىمىزدىڭ باتىسىنداعى اتىراۋ, اقتاۋ جانە اقتوبە گارنيزونى اسكەري بولىمدەرىنىڭ ارتيللەرياشىلارى دالالىق جاعدايدا شابۋىلداۋشى جانە قورعانىس ۇرىس ارەكەتتەرىن پىسىقتادى. «باتىس» وڭىرلىك قولباسشىلىعى باسقارماسىنىڭ ءباسپاسوز قىزمەتىنەن كاپيتان رۋستەم يگيسينوۆ حابارلادى.
جيىن باسىندا «باتىس» وڭىرلىك قولباسشىلىعىنىڭ اسكەرلەرى قولباسشىسى, پولكوۆنيك نۇرلان الدياروۆ ارتيللەرياشىلاردىڭ الدىنا جەكە قۇرامنىڭ دالالىق ماشىقتىلىعى مەن جاۋىنگەرلىك ءىس-ارەكەتتەردى ۇيىمداستىرۋداعى بىلىكتىلىكتى ارتتىرۋ بويىنشا ناقتى تاپسىرمالاردى قويىپ ءوتتى.
ارتيللەريالىق جيىنداردىڭ بارىسىندا باتىس ايماعىنداعى بارلىق ارتيللەريالىق بولىمدەر ماڭعىستاۋ وبلىسىنداعى «ويماشا» پوليگونىنا شوعىرلاندىرىلدى. جەكە قۇراممەن جەكە اتىس جاتتىعۋلارى, نورماتيۆتەردى ورىنداۋ بويىنشا سىناقتار جانە باتارەيالاردىڭ تاكتيكالىق وقۋ-جاتتىعۋلارى وتكىزىلدى. وفيتسەرلەر اتىستى تۇزەتۋ بويىنشا ەرەكشەلىكتەردى قاراستىرىپ, ايماقتاعى كليماتتىق جاعداي مەن تاۋلىك ۋاقىتىنا قاراماستان نىسانالاردى جويۋ, قوندىرعىنىڭ اتىس پوزيتسياسىن تەز ارادا اۋىستىرۋ جانە اتىستى قارۋدى قالىپقا كەلتىرۋسىز جويۋ بويىنشا سۇراقتاردى جان-جاقتى قاراستىردى.
ارتيللەريالىق اتىستار «گراد» جاپپاي اتىستىن رەاكتيۆتىك جۇيەلەرىنەن, «گۆوزديكا», «اكاتسيا» جانە «تيۋلپان» ارتيللەريالىق قوندىرعىلارىمەن, د-30 گاۋبيتسالارى مەن مينومەتتەرمەن جۇرگىزىلدى.
«باتىس» وڭىرلىك قولباسشىلىعى اسكەرلەرى قولباسشىسىنىڭ ورىنباسارى, پولكوۆنيك اسقار بينازاروۆتىڭ ايتۋىنشا, اسكەري قىزمەتشىلەر ءۇشىن ارتيللەريالىق ەسەپتوپتاردىڭ اتىس پوزيتسياسىندا ورنالاسۋ ۋاقىتىنىڭ قىسقارۋى وتە ماڭىزدى, سونىمەن قوسا ارتيللەريستتەر ءۇشىن بارلاۋ جانە ۇشقىقسىز ۇشۋ اپپارات بولىمدەرىمەن ءوزارا قارىم-قاتىناستى وڭتايلاندىرۋ قازىرگى زاماننىڭ تالابى بولىپ تابىلادى.
اتىس دايارلىعىنان باسقا, جيىندار بارىسىندا كومانديرلەردىڭ بولىمشەلەردى باسقارۋداعى كاسىبي شەبەرلىكتەرى, بولىمشە, ەسەپتوپ پەن ەكيپاج جەكە قۇرامىنىڭ ءوزارا الماسا ءبىلۋى جەتىلدىرىلدى.
لاگەرلىك جيىندار قۇرلىق اسكەرلەرىنىڭ بارلىق وڭىرلىك قولباسشىلىقتارىندا ۇدايى تۇردە وتكىزىلىپ وتىرادى. بۇل جيىندار 15 قىركۇيەك كۇنى اياقتالادى. ونىڭ قورتىندىسى بويىنشا ۇزدىك ارتيللەريالىق باتارەيا كومانديرى, مينومەتتىك ۆزۆود پەن وق اتىس ۆزۆودى, سونىمەن قوسا توپوگەودەزيست, ەسەپتەۋشى, بارلاۋشى-قاشىقتىقتى ولشەۋشى جانە راديوتەلەفونيست انىقتالادى.
ماڭعىستاۋ وبلىسى