بىرىككەن اراب امىرلىكتەرىنە ساپارى اياسىندا قازاقستاننىڭ سىرتقى ساياسي ۆەدومستۆوسىنىڭ باسشىسى بەيبىت اتامقۇلوۆ ءباا پرەمەر-ءمينيسترىنىڭ ورىنباسارى, پرەزيدەنت ىستەرى ءمينيسترى شەيح مانسۋر بەن زايد ءال ناحايانمەن كەزدەسۋ وتكىزدى. بۇل تۋرالى ءسىم ءباسپاسوز قىزمەتى حابارلادى.
تاراپتار قازاقستان-امىرلىك قاتىناستاردىڭ بىرەگەي ارىپتەستىك رۋحىن, سونداي-اق ەكىجاقتى ءوزارا ءىس-قيمىلدىڭ وزگەرمەيتىن جوعارى دەڭگەيىن اتاپ ءوتتى. ەكى ەل اراسىنداعى ديپلوماتيالىق قاتىناستار ورناعان ساتتەن باستاپ 27 جىل بويى ساياسي, ساۋدا-ەكونوميكالىق, مادەني-گۋمانيتارلىق بايلانىستار قارقىندى دامىپ كەلەدى.
«امىرلىكتەر قازاقستاننىڭ تاياۋ شىعىستاعى نەگىزگى ستراتەگيالىق سەرىكتەسى بولىپ تابىلادى. ءبىزدىڭ ەلدەرىمىز اراسىنداعى قارىم-قاتىناس دوستىق جانە سەنىمدى سيپاتقا يە. ءبىز امىرلىكتەرمەن ءوزارا ءتيىمدى قارىم-قاتىناستارىمىزدى ارتاراپتاندىرۋعا بەلسەندى تۇردە جۇمىس ىستەۋگە دايىنبىز», - دەپ اتاپ ءوتتى ب.اتامقۇلوۆ.
قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ وسى جىلدىڭ ناۋرىز ايىندا ءابۋ-دابيگە جاساعان رەسمي ساپارى ەكىجاقتى ىنتىماقتاستىقتىڭ دامۋىنا قوسىمشا سەرپىن بەردى, ونىڭ شەڭبەرىندە قر مەن ءباا اراسىنداعى ستراتەگيالىق ارىپتەستىكتى ودان ءارى نىعايتۋعا باعىتتالعان جاڭا ۋاعدالاستىقتارعا قول جەتكىزىلدى.
ءسىم باسشىسى سۇحباتتاسۋشىنى قازاقستانداعى ماڭىزدى ىشكى ساياسي ۇدەرىستەر تۋرالى حاباردار ەتتى جانە قازاقستان, بۇرىنعىداي, امىرلىكتەرمەن باۋىرلاس جانە سەنىمدى قارىم-قاتىناستاردى كەڭەيتۋگە جانە نىعايتۋعا ۇمتىلاتىن بولادى دەپ سەندىردى. جاڭادان سايلانعان مەملەكەت باسشىسى تاجىريبەلى ساياساتكەر جانە تانىمال ديپلومات قاسىم-جومارت توقاەۆ قازاقستان-ءباا قاتىناستاردىڭ ساباقتاستىعى مەن جوعارى سەرپىنىن ساقتايتىنى جەتكىزىلدى.
تاراپتار سونداي-اق الداعى جوعارى دەڭگەيدەگى كەزدەسۋلەر مەن ساپارلاردىڭ كەستەسىن تالقىلادى.
«قازاقستان مەن ءباا اراسىنداعى قارىم-قاتىناس ەرەكشە سيپاتقا يە. ءبىز اعىمداعى ىنتىماقتاستىعىمىزدىڭ شەڭبەرىمەن شەكتەلمەي, جاڭا ساپالى دەڭگەيگە كوشۋىمىز كەرەك. مۇنى جۇزەگە اسىرۋ ءۇشىن بىزدە بارلىق مۇمكىندىكتەر بار», - دەدى شەيح مانسۋر بەن زايد ءال ناحايان.
امىرلىك تاراپى قازاقستانمەن ينۆەستيتسيالىق ىنتىماقتاستىقتى كەڭەيتۋگە, سونىڭ ىشىندە تۋريزم سالاسىنداعى ينفراقۇرىلىم نىساندارىن سالۋعا مۇددەلى ەكەندىگىنە سەندىردى. نۇر-سۇلتان قالاسىنداعى ء«ابۋ دابي پلازا» كوپفۋنكتسيونالدى كەشەنى ينۆەستيتسيالىق ىنتىماقتاستىقتىڭ تابىستى ۇلگىسى جانە قازاقستان مەن امىرلىكتەر اراسىنداعى باۋىرلاستىق قارىم-قاتىناستاردىڭ تاعى ءبىر سيمۆولىنا اينالعانى اتاپ ءوتىلدى.
اتىراۋ وبلىسىندا مۇناي-گاز-حيميا كەشەنى قۇرىلىسىنىڭ ينۆەستيتسيالىق جوباسى (پوليپروپيلەن ءوندىرىسى) بويىنشا ىنتىماقتاستىق پەرسپەكتيۆالى بولىپ تابىلادى.
تاراپتار قازاقستان مەن ءباا تۋريزم, اۋە قاتىناسى, لوگيستيكا, اگروونەركاسىپ سەكتورى جانە جاڭا تەحنولوگيالار سياقتى سالالاردا ودان ءارى ءوسۋ مەن ىنتىماقتاستىق ءۇشىن كەڭ پەرسپەكتيۆاعا يە ەكەنىن اتاپ ءوتتى. بۇل باعىتتاعى ماڭىزدى جانە جاعىمدى شەشىم قر مەن ءباا اراسىندا ۆيزاسىز ءتارتىپ ورناتۋ بولىپ تابىلادى.
سول كۇنى ءسىم باسشىسى ب. اتامقۇلوۆ ءوزىنىڭ امىرلىك ارىپتەسى ءباا سىرتقى ىستەر جانە حالىقارالىق ىنتىماقتاستىق ءمينيسترى شەيح ابداللا بەن زايد ءال ناحايانمەن كەلىسسوزدەر جۇرگىزدى.
سىرتقى ساياسي ۆەدومستۆولاردىڭ باسشىلارى ەكىجاقتى كۇن ءتارتىبىنىڭ نەگىزگى باعىتتارى بويىنشا «ساعاتتارىن» سالىستىردى, سونداي-اق اسا وزەكتى حالىقارالىق جانە وڭىرلىك ماسەلەلەر بويىنشا پىكىر الماستى. تاراپتار ءوزارا قىزىعۋشىلىق تۋدىراتىن ماسەلەلەر بويىنشا قانداي دا ءبىر كەلىسپەۋشىلىكتەردىڭ جوقتىعىن اتاپ ءوتتى جانە ساياسي كونسۋلتاتسيالار وتكىزۋ جولىمەن ۆەدومستۆوارالىق ءوزارا ءىس-قيمىلدى ودان ءارى جالعاستىرۋعا ەكى جاقتى قىزىعۋشىلىق ءبىلدىردى.
كەزدەسۋ بارىسىندا ساۋدا-ەكونوميكالىق جانە ينۆەستيتسيالىق ىنتىماقتاستىققا اسا كوڭىل ءبولىنىپ, ونىڭ دامۋىنىڭ ءتيىمدى قۇرالى بولىپ تابىلاتىن ۇكىمەتارالىق كوميسسيانىڭ قىزمەتىنە دە نازار اۋدارىلدى.
امىرلىك تاراپ ەلىمىزدەگى ينۆەستيتسيالىق احۋالدى جەتىلدىرۋ ساياساتىمەن ەگجەي-تەگجەيلى تانىسىپ, قازاقستان ەكونوميكاسىنا بەلسەندى ينۆەستيتسيا سالۋعا شاقىرىلدى. 2005-2019 جىلدار ارالىعىنداعى كەزەڭدە ءباا-دەن قازاقستانعا تىكەلەي ينۆەستيتسيالاردىڭ جالپى اعىنى 2,1 ملرد. اقش دوللارىن قۇرادى. تاراپتار بۇل كورسەتكىش قر مەن ءباا اراسىنداعى الەۋەتكە سايكەس كەلمەيتىنىن مالىمدەدى.
جوعارىدا كورسەتىلگەن كەزدەسۋلەر بارىسىندا قازاقستان مەن امىرلىكتەردىڭ عارىش سالاسىنداعى ءوزارا ءىس-قيمىلدى دامىتۋ ءۇشىن جاقسى پەرسپەكتيۆالار بار ەكەندىگى اتاپ ءوتىلدى. تاراپتار تاريحتاعى العاشقى امىرلىك عارىشكەر حاززا ءال ءمانسۋريدىڭ 25 قىركۇيەكتە «بايقوڭىر» عارىش ايلاعىنان حالىقارالىق عارىش ستانساسىنا (حعس) ۇشۋىن بىردەي قولدادى.
ء«بىزدىڭ ەلىمىزدىڭ وكىلى عارىشقا ۇشقانى ءبىز ءۇشىن ۇلكەن قۇرمەت. بۇل تاريحي وقيعا. ءبىز قازاقستانعا ەلىمىزدىڭ عارىش سالاسىن دامىتۋعا قولداۋ كورسەتكەنى جانە ىنتىماقتاستىعى ءۇشىن العىس بىلدىرەمىز», - دەپ اتاپ ءوتتى ءباا سىرتقى ىستەر ءمينيسترى.
بۇل ءىس-شاراعا قۇرمەتتى قوناق رەتىندە قاتىسۋ ءۇشىن قازاقستانعا ءباا جوعارى ءبىلىم بەرۋ مەملەكەتتىك ءمينيسترى, ۇلتتىق عارىش اگەنتتىگىنىڭ توراعاسى احماد بەلحۋلا ءال فالاسي باستاعان وكىلەتتى دەلەگاتسيا كەلەدى دەپ جوسپارلانۋدا.
ەكى جاقتى قارىم-قاتىناستاردا ءبىلىم بەرۋ سالاسىنداعى ىنتىماقتاستىق ماڭىزدى ورىن الادى. 2016 جىلدان باستاپ قازاقستان استاناسىندا حاليفا بەن زايد گۋمانيتارلىق قورىنىڭ قاراجاتىنا سالىنعان №84 ورتا مەكتەپ-ليتسەي جۇمىس ىستەيدى. وسى مەكتەپتىڭ ءۇش ۇزدىك تۇلەگىن جىل سايىنعى نەگىزدە ءباا جوعارعى وقۋ ورىندارىندا تەگىن وقىتۋ تۋرالى كەلىسىمگە قول جەتكىزىلدى.
جالپى ەكى ەلدىڭ سىرتقى ىستەر مينيسترلىگى باسشىلارىنىڭ كەلىسسوزدەرى دوستىق, اشىقتىق پەن ىنتىماقتاستىققا دايىندىق رۋحىندا ءوتتى. قازاقستاننىڭ سىرتقى ىستەر ءمينيسترى امىرلىك تاراپقا ۇكىمەتارالىق كوميسسيانىڭ 7-ءشى وتىرىسىن جوعارى دەڭگەيدە ۇيىمداستىرعانى ءۇشىن العىسىن ءبىلدىردى.