جامبىل وبلىسى اكىمدىگى عيماراتىنىڭ ءماجىلىس زالىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا ارناعان جولداۋىن ءتۇسىندىرۋ بويىنشا اكتيۆ جيىنى ءوتتى. اكتيۆ جينالىسىنا وبلىس اكىمىنىڭ ورىنباسارلارى, اۋدان اكىمدەرى, ءماسليحات دەپۋتاتتارى, وبلىس اكىمدىگىنىڭ باسقارما, اۋماقتىق دەپارتامەنتتەر, قۇقىق قورعاۋ ورگاندارى, جوعارى وقۋ ورىندارىنىڭ باسشىلارى, ساياسي پارتيالار, ەتنومادەني ورتالىقتار, ۇكىمەتتىك ەمەس ۇيىمدار, جاستار بىرلەستىكتەرى, بۇقارالىق اقپارات قۇرالدارى وكىلدەرى مەن وبلىستىق اقپاراتتىق توپ مۇشەلەرى قاتىستى.
جامبىل وبلىسىنىڭ اكىمى اسقار مىرزاحمەتوۆ جولداۋدا قامتىلعان ماڭىزدى باعىتتاردى اتاپ ءوتتى. اكىم ماڭىزدى قۇجاتتا الەۋمەتتىك سالاداعى وتباسى ينستيتۋتىن قولداۋ مەن ينكليۋزيۆتى قوعام قۇرۋ, ءبىلىم بەرۋ, مەديتسينالىق قىزمەتتىڭ قولجەتىمدىلىگى مەن ساپالى بولۋىن قامتاماسىز ەتۋ, مادەنيەت قىزمەتكەرلەرىن قولداۋ, الەۋمەتتىك قولداۋ جۇيەسىنىڭ دامۋى, وتاندىق زەينەتاقى جۇيەسىن دامىتۋ سىندى وزەكتى ماسەلەلەردى شەشۋ كوزدەلگەنىن جەتكىزدى. سونىمەن قاتار, وسى ماقساتتاعى تاپسىرمالاردىڭ جۇزەگە اسىرىلۋىن ورىنداۋدا جاۋاپكەرشىلىكتى كۇشەيتۋ جانە ناقتى شارالار قابىلداۋ قاجەتتىگىن ءتۇسىندىردى.
جولداۋدى وڭىردە ىسكە اسىرۋ بويىنشا وبلىس اكىمىنىڭ ورىنباسارى سۇلۋشاش قۇرمانبەكوۆا بايانداما جاسادى. ءوز سوزىندە وبلىس اكىمىنىڭ ورىنباسارى پرەزيدەنت جولداۋىندا ايتىلعان زامان تالابىنا ساي ءتيىمدى مەملەكەت, ازاماتتاردىڭ قۇقىقتارى مەن قاۋىپسىزدىگىن قامتاماسىز ەتۋ, قارقىندى دامىعان جانە ينكليۋزيۆتى ەكونوميكا, الەۋمەتتىك جاڭعىرۋدىڭ جاڭا كەزەڭى جانە قۋاتتى وڭىرلەر – قۋاتتى ەل باعىتتارى جونىندە اڭگىمەلەدى.
«ەكونوميكالىق ورلەۋ جانە الەۋمەتتىك سالانىڭ بارلىق باعىتتارى بويىنشا ساياسي رەفورمالار كەزەڭ-كەزەڭىمەن, تاباندى تۇردە جانە جان-جاقتى ويلاستىرىپ, «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ مىندەتى تۇر. بيلىك پەن قوعام اراسىندا تۇراقتى ديالوگ ورناتۋ الداعى ۋاقىتتا اتقاراتىن جۇمىستىڭ باسىم باعىتىنا اينالۋى ءتيىس. سوندىقتان ازاماتتىق قوعامعا قولداۋ كورسەتىپ, ونىڭ الەۋەتىن نىعايتا ءتۇسۋ اسا ماڭىزدى. ەلىمىزدە بەلگىلى قوعام وكىلدەرىن قامتىعان ۇلتتىق قوعامدىق سەنىم كەڭەسى قۇرىلدى. الداعى ۋاقىتتا, وڭىردەگى قوعامدىق كەڭەستەر دە وزەكتى پروبلەمالاردىڭ ءتيىمدى شەشىمدەرىن تابۋ باعىتىندا جۇمىستار جۇرگىزەتىن بولادى.
ەلباسى توراعالىق ەتەتىن «Nur Otan» پارتياسى بۇگىندە حالىقتىڭ شىنايى سەنىمىنەن, ۇدەسىنەن شىققان حالىق پارتياسىنا اينالدى. ءوڭىر تۇرعىندارىنىڭ ماسەلەلەرىن شەشۋدە وبلىستاعى باسقا دا بەس پارتيانىڭ فيليالدارى دا بەلسەندىلىك تانىتۋلارى كەرەك», دەدى سۇلۋشاش قۇرمانبەكوۆا.
«مەملەكەت باسشىسى «اتا زاڭىمىزعا سايكەس ازاماتتاردىڭ ءوز ويىن ەركىن ايتۋعا قۇقىعى بار» ەكەندىگىن باسا ايتتى. سوندىقتان, تاراز قالاسى مەن اۋدان اكىمدەرىمەن بىرلەسە وتىرىپ, قولدانىستاعى زاڭناما اياسىندا بەيبىت اكتسيالار جانە نارازىلىق شارالارىن ۇيىمداستىرۋ ءتارتىبى مەن وتكىزۋ ورىندارىن قايتا قارايتىن بولامىز.
«ەل بىرلىگى – ونىڭ ارالۋاندىعىندا!» ءپرينتسيپى وبلىستا تۇراتىن 87 ەتنوس پەن ەتنيكالىق توپتىڭ وكىلدەرى ءۇشىن باستى ۇستانىمعا اينالۋى ءتيىس. قازاق حالقىنىڭ مەملەكەت قۇراۋشى ۇلت رەتىندەگى رولىن بەكەمدەپ, ەتنوسارالىق تاتۋلىق پەن دىنارالىق تۇسىنىستىكتى قالىپتاستىرۋ – ماڭىزدى مىندەت. وبلىستىق قازاقستان حالقى اسسامبلەياسىنىڭ حاتشىلىعى, تاراز قالاسى مەن اۋدان اكىمدەرى ۇلتارالىق تاتۋلىقتى نىعايتۋدا جۇيەلى جۇمىستار جۇرگىزەتىن بولادى. جاقىن ارادا قابىلداناتىن «ازاماتتىق قوعامدى دامىتۋدىڭ 2025 جىلعا دەيىنگى تۇجىرىمداماسىندا» ۇكىمەتتىك ەمەس ۇيىمداردىڭ جاۋاپكەرشىلىكتەرى ارتىپ, جاڭا مىندەتتەر جۇكتەلمەك. سونىمەن بىرگە, الداعى جىلى ءال-ءفارابيدىڭ 1150 جىلدىق, اباي قۇنانباي ۇلىنىڭ 175 جىلدىق مەرەيتويلارىن اتاپ ءوتۋ بويىنشا وبلىس دەڭگەيىندە تاربيەلىك ءمانى بار ءىس-شارالار ۇيىمداستىرىلاتىن بولادى. ەل ومىرىندەگى ماڭىزدى مەرەكە –تاۋەلسىزدىگىمىزدىڭ 30 جىلدىعىنا بايلانىستى وتكىزىلەتىن شارالار تاۋەلسىز مەملەكەتىمىزدىڭ جەتىستىكتەرى مەن قۇندىلىقتارىن جاستارىمىزدىڭ تەرەڭ ءبىلىپ, سەزىنۋلەرىنە باعىتتالماق», دەدى ول. سونىمەن قاتار, سۇلۋشاش قۇرمانبەكوۆا سىبايلاس جەمقورلىقپەن كۇرەسۋ – نەگىزى مىندەتتەرىمىزدىڭ ءبىرى ەكەنىن ايتا كەلىپ, اعىمداعى جىلى «جامبىل – ادالدىق الاڭى» جوباسى اياسىندا تۇرعىندار تاراپىنان 140 شاعىم ءتۇسىپ, ونىڭ 52 ماسەلەسى شەشىلگەنىن, قالعان 88 ماسەلە باقىلاۋعا الىنعانىن جەتكىزدى. مەملەكەتتىك قىزمەت كورسەتۋدىڭ بارىنشا اشىق بولۋىن قامتاماسىز ەتۋ, تۇرعىندارعا قولايلى جاعداي جاساۋ ماقساتىندا 6 سەرۆيستىك اكىمدىكتەر مەن فرونت-وفيستەر اشىلعانى, 7 مەكەمەنىڭ باسشىسى «وۋپەن سپەيس» فورماتىندا جۇمىس ىستەۋگە كىرىسسە, 133 مەملەكەتتىك ورگان باسشىسى كابينەتتەرىن ءبىرىنشى قاباتقا كوشىرگەنىن ايتتى.
«مەملەكەت باسشىسى يندۋستريالىق-يننوۆاتسيالىق دامۋ باعدارلاماسى اياسىندا ونىمدىلىگى جوعارى ورتا بيزنەسكە قولداۋ كورسەتۋدىڭ كەشەندى شارالارىن ازىرلەۋدى تاپسىردى. بۇل باعىتتاعى ەڭ ءتيىمدى شارالاردىڭ ءبىرى – يندۋستريالىق ايماقتار قۇرۋ. شۋ اۋدانىندا «تاراز حيميالىق پاركى» ارنايى ەكونوميكالىق ايماعىنىڭ ينفراقۇرىلىم قۇرىلىسى اياقتالۋدا. كاسىپكەرلىك جانە يندۋستريالدى-يننوۆاتسيالىق دامىتۋ باسقارماسى «تاراز حيميالىق پاركى» باسقارۋشى كومپانياسىمەن بىرلەسىپ, جوبالاردى ۋاقتىلى ىسكە اسىرۋ ءۇشىن, زاڭناماعا سايكەس بارلىق مەملەكەتتىك قولداۋ شارالارىن كورسەتەتىن بولادى. تاراز قالاسىنىڭ اۋماعىندا رەسپۋبليكالىق ماڭىزى بار يندۋستريالىق ايماق قۇرۋ جۇمىستارىن اياقتاۋ مىندەتى تۇر. بۇگىنگى كۇنگە تىركەلگەن 84 مىڭنان اسا شاعىن جانە ورتا كاسىپكەرلىك سۋبەكتىلەرىنىڭ ىشىندەگى جۇمىس جاسايتىندارىنىڭ ۇلەسى 80,3 پايىزعا جەتتى. ول, وتكەن جىلدىڭ وسى كەزەڭىمەن سالىستىرعاندا 11,4 پايىزعا ارتىپ وتىر. «بيزنەستىڭ جول كارتاسى – 2020» باعدارلاماسى اياسىندا اعىمداعى جىلدىڭ 8 ايىندا 4,5 ميلليارد تەڭگەگە 290 جاڭا جوبا ىسكە اسىرىلۋدا», دەدى سۇلۋشاش قۇرمانبەكوۆا ءوز سوزىندە.
سونداي-اق, جامبىل وبلىستىق كاسىپكەرلەر پالاتاسىنىڭ ديرەكتورى ولجاس قارجاۋوۆ, م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى, پروفەسسور ماحمەتعالي سارىبەكوۆ, قازاقستان رەسپۋبليكاسىنىڭ مەملەكەتتىك قىزمەت ىستەرى اگەنتتىگى جامبىل وبلىسى بويىنشا دەپارتامەنتى باسشىسىنىڭ مىندەتىن اتقارۋشى نۇرلان ەركەباەۆ, «جاستار زەرتتەۋ» جاستار قوعامدىق بىرلەستىگىنىڭ ءتورايىمى پاريدا مامەدوۆا جانە وزگە دە ازاماتتار ءوز سالالارى بويىنشا جولداۋدىڭ باعىتتارىنا سايكەس تاپسىرمالاردىڭ جۇزەگە اسىرىلۋى تۋرالى قابىلداناتىن شارالار مەن اتقارىلاتىن جۇمىس جوسپارلارىمەن تانىستىردى.
جيىن سوڭىندا اسقار مىرزاحمەتوۆ پرەزيدەنت جولداۋىن ءتۇسىندىرۋ بويىنشا قۇرامىندا 102 مۇشەسى بار 11 وبلىستىق اقپاراتتىق توپ قۇرامى جاساقتالعانىن ايتتى. بەكىتىلگەن كەستەگە سايكەس, توپ مۇشەلەرى جىل سوڭىنا دەيىن وبلىستىڭ 50-دەن استام ەلدى مەكەندەرىنە شىعىپ, مەكەمەلەردە, ەڭبەك ۇجىمدارىندا, وقۋ ورىندارىندا, كاسىپورىندار مەن مادەنيەت ۇيلەرىندە ءتۇسىندىرۋ جۇمىستارىن جۇرگىزەتىن بولادى. سونىمەن قاتار, جولداۋدا ايتىلعان مىندەتتەردى ورىنداۋ بويىنشا وبلىستىق ءىس-شارالار جوسپارى ازىرلەنىپ, قاجەتتى شارالار قابىلدانادى.
جامبىل وبلىسى