تاۋەلسىزدىك سارايىندا قاسىم-جومارت توقاەۆتىڭ توراعالىعىمەن ۇلتتىق قوعامدىق سەنىم كەڭەسىنىڭ ءبىرىنشى وتىرىسى باستالدى. بۇل تۋرالى اقوردانىڭ ءباسپاسوز قىزمەتى حابارلادى.
«بۇگىن ءدال وسىنداي جاڭا فورماتتا كەزدەسىپ وتىرعانىمىزدىڭ ءوزى وڭ وزگەرىستەرگە ءبارىمىزدىڭ مۇددەلى ەكەنىمىزدى كورسەتەدى. حالىق بىزدەن ناقتى ۇسىنىستار مەن ناتيجە كۇتىپ وتىر.ۇلتتىق قوعامدىق سەنىم كەڭەسى وسى مىندەتتى ويداعىداي جۇزەگە اسىراتىن بىرەگەي قۇرىلىمعا اينالادى دەپ سەنەمىن. ءبىز حالىق سەنىمىن اقتاۋىمىز كەرەك. ءاربىر ازاماتتىڭ مۇددەسى ءبىز ءۇشىن وتە ماڭىزدى», دەدى پرەزيدەنت.
كەڭەستىڭ نەگىزگى ماقساتى – جۇرتشىلىقتىڭ, ساياسي پارتيالاردىڭ, ازاماتتىق قوعام وكىلدەرىنىڭ قاتىسۋىمەن مەملەكەتتىك ساياساتقا قاتىستى وزەكتى, ماڭىزدى ماسەلەلەر بويىنشا باستامالاردى, ۇسىنىستاردى تۇجىرىمداۋ. سونىمەن قاتار تۇجىرىمدامالاردىڭ, مەملەكەتتىك باعدارلامالار مەن نورماتيۆتىك-قۇقىقتىق اكتىلەردىڭ جوبالارىنا قوعامدىق ساراپتاما جۇرگىزۋ, جۇرتشىلىقتىڭ, ازاماتتىق قوعامنىڭ پىكىرىن ەسكەرە وتىرىپ ماڭىزدى ستراتەگيالىق پروبلەمالاردى قاراۋ, سىندارلى ديالوگتى قامتاماسىز ەتۋ – كەڭەستىڭ نەگىزگى مىندەتتەرى.
شاراعا كەڭەس مۇشەلەرى مەن باق وكىلدەرى قاتىسىپ جاتىر.