س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە جەتەكشى عالىمداردىڭ, پروفەسسور-وقىتۋشىلار قۇرامى جانە ستۋدەنتتەردىڭ قاتىسۋىمەن قازاقستان رەسپۋبليكاسى پرەزيدەنتى قاسىم-جومارت توقاەۆتىڭ قازاقستان حالقىنا ارناعان «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋى تالقىلاندى.
جيىندا ۋنيۆەرسيتەت عالىمدارى مەن جاستارى پرەزيدەنت جولداۋى بويىنشا كوپشىلىك الدىندا بايانداما جاساپ, ءوز ويلارىن ورتاعا سالدى.
«پرەزيدەنت جانىنان ارنايى كەڭەس قۇرىلاتىن بولدى. ول نەگىزىنەن حالىقپەن تىكەلەي بايلانىسىپ وتىرادى. دەمەك بيلىك حالىققا جاقىنداي تۇسەدى دەگەن ءسوز. بۇل مەملەكەتتىك باسقارۋداعى جاڭاشا باعىت دەپ بىلەمىن. «اۋىل – ەل بەسىگى» اتتى جوبا بويىنشا بۇگىندە وتە جاقسى جۇمىستار باستالىپ جاتىر. ونىڭ كەلەشەگى دە زور بولادى. سەبەبى جوعارعى بيلىك اۋىلىمىزعا جاقىنداي تۇسۋدە. اۋىل كوركەيسە, اۋىلشارۋاشىلىق سالاسى دا كوركەيەتىنى ءسوزسىز. سەبەبى حالقىمىزدىڭ 42 پايىزى ءالى دە بولسا اۋىلدىق جەرلەردە تۇرىپ جاتىر. مىنە, ءبىز وسى قۇندىلىقتارىمىزدان ايرىلىپ قالماۋىمىز كەرەك. اۋىل كوتەرىلمەي, ەكونوميكا دامىمايدى! بۇل – فاكت. اۋىلدى جەرلەردى دامىتۋ مەن قوسا, اۋىل شارۋاشىلىعى سالاسىنا دا ەرەكشە ءمان بەرۋىمىز كەرەك. وعان ءبىلىم وردالارى دا ءتيىستى دەڭگەيدە اتسالىسۋى ءتيىس.
پرەزيدەنت جەر ماسەلەسى توڭىرەگىندە ناقتى تاپسىرمالار بەردى. ءبىزدىڭ باستى قۇندىلىعىمىز دا وسى جەر. جەردى ءتيىمدى پايدالانۋ – باستى مىندەت. ول ءۇشىن عىلىمداعى جاڭا مۇمكىندىكتەردى دە ءتيىمدى پايدالانۋىمىز قاجەت. مىسالى, ءبىزدىڭ بازامىزدا عاج ورتالىعىنىڭ (عارىشتىق اقپاراتتىق جۇيەلەر) مۇمكىندىگى زور. وسى ءبىر مۇمكىندىكتى ۇتىمدى پايدالانۋدىڭ قىر-سىرىن جەر پايدالانۋشىلارعا تۇسىندىرە بەرۋىمىز قاجەت. ءبىر كەزدە ءتۇرلى جولمەن اۋقىمدى جەر تەلىمدەرىنە يەلىك ەتىپ قالعان لاتيفۋنديستەردىڭ يەلىگىندەگى جەر مەملەكەتكە قايتارىلۋى مۇمكىن. ولارعا ەڭ اۋەلى كەشەندى تەكسەرۋ جۇرگىزۋ كەرەك. ەگەر شىن مانىسىندە يگەرىلمەي جاتقان جەرلەرى بار بولسا, مەملەكەت مەنشىگىنە قايتاراتىن بولادى. مىسالى سولتۇستىك قازاقستان, اقمولا, قوستاناي وبلىستارىندا يگەرىلمەي جاتقان 1,2 ملن گەكتار جەر بارى انىقتالدى. جەر بۇلاي يگەرىلمەي جاتپاۋى كەرەك. ەندى وسى سالادا دا كوپ ەڭبەك ەتۋىمىز كەرەك. ول ءۇشىن ەڭ الدىمەن بىزگە قويىلاتىن تالاپ – ساپالى مامان دايارلاپ شىعارۋ. تاپسىرماعا ساي قازىر جوعارى وقۋ ورىندارىنىڭ الدىندا جاۋاپكەرشىلىگى وتە زور وسىنداي مىندەت تۇر», دەدى ۋنيۆەرسيتەت رەكتورى اقىلبەك كۇرىشباەۆ.
«الەۋمەتتىك جاڭعىرۋدىڭ جاڭا كەزەڭى» دەپ اتالاتىن ءىV تاراۋدا ءبىلىم سالاسىنىڭ بۇگىنگى احۋالى مەن قويىلاتىن تالاپتارعا باسىمدىق بەرىلىپ وتىر. اتالعان سالا بويىنشا قازاتۋ-ءدىڭ ءبىرىنشى پرورەكتورى ا.ءابدىروۆ جوعارى وقۋ ورىندارىنداعى ءبىلىم بەرۋ ماسەلەلەرىنە توقتالدى. ول ءبىلىم بەرۋدەگى پراكتيكالىق دايىندىقتى سىنعا الدى. ونىڭ ايتۋىنشا, ستۋدەنتتەردىڭ پراكتيكالىق دايارلىعىن ۋنيۆەرسيتەت قابىرعاسىندا جوعارى دەڭگەيدە ۇيىمداستىرۋ قاجەت. سەبەبى بولاشاق مامان وندىرىستە قاۋقارلى بولۋى كەرەك. سونداي-اق ا.ءابدىروۆ قاسىم-جومارت توقاەۆتىڭ قازاقستان حالقىنا ارناعان جولداۋىندا ايتىلعان «ديپلوممەن – اۋىلعا!» باعدارلاماسىن ودان ءارى جەتىلدىرىپ, مۇمكىندىگىنشە باعىتقا باسىمدىق بەرۋ كەرەكتىگىن ايتتى.
ۋنيۆەرسيتەت «اكادەميالىق ادالدىق ليگاسىنىڭ» ايقىن ماقساتتارىنا سايكەس ءبىلىم ساپاسىن جاقسارتۋدى قولعا الدى. ەندىگى كەزەكتە ۋنيۆەرسيتەت اكىمشىلىگى وقىتۋشىلار نەمەسە ستۋدەنتتەردىڭ ءبىلىم سالاسىنا سايكەس ەرەجەلەردى بۇزعان زاڭسىز ءىس-ارەكەتتەرىن نازاردا ۇستاماق.
جولداۋدى تالقىلاۋ بارىسىندا جاستار دا نازاردان تىس قالعان جوق. بۇگىندە ولار ءۇشىن مۇمكىندىكتەردىڭ جاڭا كوكجيەگى اشىلىپ وتىر. جاستار وكىلدەرى الداعى جىلدىڭ «ەرىكتىلەر جىلى» بولىپ بەلگىلەنگەنىنە قۋانىشتى.