م.ح. دۋلاتي اتىنداعى تاراز مەملەكەتتىك ۋنيۆەرسيتەتىنىڭ مارس ۇركىمباەۆ اتىنداعى جاستار سارايىندا تۇركسوي جاستار كامەرالىق وركەسترىنىڭ كونتسەرتى ءوتتى.
اتالعان شارا بيىل تۇركىتىلدەس مەملەكەتتەردىڭ ىنتىماقتاستىق كەڭەسىنىڭ قۇرىلعانىنا 10 جىل تولۋى قۇرمەتىنە ارنالدى. كونتسەرتكە تاراز قالاسىنىڭ ونەرسۇيەر تۇرعىندارى, اتالعان ۋنيۆەرسيتەتتىڭ وقىتۋشىلارى مەن ستۋدەنتتەرى قاتىستى.
قۇرامىندا كۇنى بۇگىنگە دەيىن 10 ەلدىڭ 100-دەن استام تالانتتى جاستارى ونەر كورسەتكەن وركەسترگە بۇل جولى تاتارستاننىڭ حالىق ءارتيسى رەنات سالاۆاتوۆ, قازاقستاننىڭ ەڭبەك سىڭىرگەن قايراتكەرى انۆار اكباروۆ جانە ءازىربايجاننىڭ تانىمال جاس تالانتى مۇستافا مەحمانداروۆ سىندى تانىمال ونەر ادامدارى ديريجەرلىك ەتتى. وركەستر قۇرامى الەمگە ايگىلى شىعارمالاردى ورىنداپ, كوپشىلىكتىڭ ىقىلاسىنا يە بولدى. سونىمەن قاتار, حالىقارالىق تۇركسوي ۇيىمىنىڭ ۇيىمداستىرعان كونتسەرتتىك باعدارلاماسىندا الەمدىك دەڭگەيدەگى ساحنا ساڭلاقتارىمەن بىرگە ونەر كورسەتىپ, تاجىريبە جيناعان جاس تالانتتار تىڭداۋشىلارىن تۇركى الەمى مۋزىكاسىنىڭ سيقىرلى الەمىنە بىرگە ساياحات جاساۋعا شاقىردى.
سالتاناتتى شاراعا حالىقارالىق تۇركى مادەنيەتى ۇيىمىنىڭ باس حاتشىسى دۇيسەن قاسەيىنوۆ ارنايى قاتىسىپ, تۇركسوي جاستار كامەرالىق وركەسترىنىڭ ورتالىق ازياعا تۇڭعىش رەت تۋرنەگە شىققانىن اتاپ ءوتتى. «وركەسترىمىز قۇرىلعان كۇننەن بۇل كۇنگە دەيىن الەمنىڭ تۇكپىر-تۇكپىرىندە كونتسەرتتەر بەردى. الايدا ءوز ەلىمىزدە وسىنداي ءىرى تۋرنە ۇيىمداستىرماپ ەدىك. بۇل تۋرنە – ءبىز ءۇشىن تۋعان ايماعىمىزداعى العاشقى تۋرىمىز بولادى», دەدى باس حاتشى. سونىمەن قاتار, تاراز قالاسى قازاقستاننان كەلەسى كەزەكتە «تۇركى الەمىنىڭ مادەني استاناسى» اتانۋعا لايىق بىردەن-ءبىر قالا ەكەنىن دە اتاپ ءوتتى.
ءوز سوزىندە م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى ماحمەتعالي سارىبەكوۆ اتالعان وركەستردىڭ مادەني قۇندىلىعىمىزعا نەگىزدەلگەنىن, ونەرپازداردىڭ دا جوعارى دەڭگەيلى ماماندار ەكەنىن ايتا كەلە, باس حاتشى دۇيسەن قاسەيىنوۆكە ۋنيۆەرسيتەتتىڭ «م.ح.دۋلاتي اتىنداعى توسبەلگىسىن» تابىستادى.
تۇتاس تۇركى حالقىنىڭ بىرلىگىن ناسيحاتتايتىن تۋرنە اعىمداعى جىلدىڭ تامىز ايىندا تۇركىستان وبلىسىنان باستاۋ الىپ, شىمكەنت قالاسىندا جالعاسقان بولاتىن. ەندى كونە تاراز شاھارىنان كەيىن تۋرنە الماتى قالاسىندا جانە قىرعىز رەسپۋبليكاسىنىڭ بىشكەك, سونىمەن قاتار ءازىربايجان رەسپۋبليكاسىنىڭ باكۋ قالاسىندا جالعاسادى.
جامبىل وبلىسى