ەڭ الدىمەن, قازاقستان جازۋشىلار وداعىنىڭ ءبىراز جىلعا سوزىلعان توقىراۋدان كەيىن زامان تالابىنا ساي قارەكەت جاساي باستاعانىن ايتار ەدىم. ءبىرشاما ۋاقىت بۇرىن ەل استاناسىندا ەۋرازيا استانالارى اقىن-جازۋشىلارىنىڭ جيىنىن وتكىزگەنىن, الماتىداعى شىعارماشىلىق ءۇيدى قالا اكىمىنىڭ قولداۋىمەن قايتا جاڭعىرتىپ, قالامگەرلەردىڭ يگىلىگىنە بەرۋىن, پروزالىق شىعارمالاردى الەمنىڭ التى تىلىنە اۋدارتا باستاۋىن جانە الداعى ازيا قالامگەرلەرىنىڭ ءى فورۋمىن ۇيىمداستىرۋى – ويانۋ عانا ەمەس, ويلى شارۋانىڭ باسى جانە بىرەگەيى.
ەرتەڭگى بولار فورۋم ادەبيەتىمىزدىڭ وزگە جۇرتپەن تەرەزەسىن تەڭ كورسەتە الۋىنا يگى قادام بولىپ وتىر. الەم ادەبيەتىنىڭ وزىق ۇلگىلەرىمەن ءبىراز تانىس بولعاندىقتان, حالىقارالىق سىيلىق يەلەرىنىڭ شىعارمالارىن ءوز ادەبيەتىمىزدىڭ تاڭداۋلى ۇلگىلەرىمەن سالىستىرىپ قاراساق, اقىندارىمىز ق.امانجولوۆ, س.ماۋلەنوۆ, تۇمانباي مەن ساعيلاردى ايتپاعاندا ت.مەدەتبەك, س.اقسۇڭقار ۇلى, ە.راۋشان, ج.بودەش, پروزاشىلارىمىز م.ماعاۋين, ت.ابدىك, ت.نۇرماعانبەتوۆ, ج.شاشتاي ۇلى, ب.نۇرجەكە, ر.وتارباەۆ, ن.ءداۋتاي ۇلى, ءا.اسقار, م.بايعۇتتىڭ شىعارمالارى اۋدارۋى كەلىسسە, الەم ادەبيەتىن تاڭداندىرارى حاق. بۇدان بولەك, تۇياق دۇبىرلەرى التى قىردىڭ ار جاعىنان ەستىلەتىن دارىندى جاستارىمىز قانشاما. الەم بىلسە, ابايدى, اۋەزوۆتى, نۇرپەيىسوۆتى بىلەر. باسقاسىنان الەم مۇلدە حابارسىز. ادەبيەتى ءالسىز ەلدى قانشا جەردەن ەكونوميكاسى مىقتى بولعانىمەن, الەم مويىندامايدى.
فورۋم قازاق ادەبيەتىن تانىتۋعا كۇش سالۋى كەرەك. بۇل دا جارنامالىق قىزمەتتىڭ ءبىر ءتۇرى. دەمەك, شەت تىلگە اۋدارىلاتىن قازاق اۆتورلارىنىڭ تاڭداۋلى شىعارمالارىن ارنايى كوميسسيا مەن جازۋشىلار وداعى ىرىكتەپ, قولعا السا دەيمىن. بۇل جەردە اعايىندىق ەمەس, اقيقات, وكپە-ناز ەمەس, ادىلەت تورەشى بولسا كەرەك.
اقىن-جازۋشىلاردىڭ الىس-جاقىن شەتەلمەن شىعارماشىلىق بايلانىسىنا تولىقتاي جاعداي جاساعان ءجون. وعان قوسا جاس قالامگەرلەردىڭ توپتاما جيناقتارىن مەملەكەتتىك تاپسىرىسپەن جىلىنا ءبىر رەت شىعارىپ جاتسا, ۇلكەن قامقورلىق ەمەس پە؟!
جازۋشى ءا.اسقار بۇرىنعى «اۋدارما» باسپاسىن قايتا جانداندىرىپ, جۇمىسىن جۇرگىزسە, ادەبي اۋدارماعا قوزعاۋ سالار ەدى. فورۋمدا وسى اتالعان ماسەلەلەر قوزعالار دەپ سەنەمىن. ادەبيەتىمىزدى السىرەتىپ الماۋ جازۋشىلاردىڭ عانا ەمەس, مەملەكەتتىڭ دە پارقى مول پارىزى.
كادىربەك سەگىزباي ۇلى,
جازۋشى