بۇگىن ءماجىلىس دەپۋتاتتارى ج.دۇيسەباەۆ, گ.قاراقۇسوۆا جانە ت.ياكوۆلەۆا اقمولا وبلىسىنىڭ اقكول قالاسىنداعى «Smart Aqkol» احۋالدىق ورتالىعىنا باردى. بۇل ءتۋرالى ماجىلىستىڭ ءباسپاسوز قىزمەتى حابارلادى.
ازاماتتاردىڭ تۇرمىس ساپاسىن ارتتىرۋعا, قولايلى ءارى قاۋىپسىز ورتا قالىپتاستىرۋعا باعىتتالىپ, تسيفرلاندىرۋ سالاسىندا جۇزەگە اسىرىلعان «Smart city» جوباسىمەن تانىسقان دەپۋتاتتار اتالعان ورتالىقتىڭ بولاشاعى زور ەكەنىنە نازار اۋداردى.
جان-جاقتى سوڭعى تەحنولوگيامەن قامتاماسىز ەتىلگەن ورتالىق ودان ءارى دۇرىس ءارى ناقتى جۇمىس ىستەسە, تۇرعىندارعا شىنايى كومەگىن تيگىزبەك.
وسى رەتتە ءماجىلىس دەپۋتاتى ج.دۇيسەباەۆ:
- قالانىڭ ەڭ نەگىزگى دەگەن سۇراقتارىن باسقارۋ جۇيەسى قۇرىلعان. ونىڭ ىشىندە دەنساۋلىق ساقتاۋ, وقۋ سالاسى, ءتارتىپ سالاسى, جارىقپەن قامتاماسىز ەتۋ, ۋاقىتىندا جەدەل-جاردەم كورسەتۋ ماسەلەلەرى جانە تاعى باسقا جاعدايلار, بۇرىنعىداي ەمەس, ۋاقىتىندا شەشىلىپ, حالىق ءوزىنىڭ جاعدايىن جاقسارتۋعا جول اشادى, - دەدى. ايتا كەتۋ كەرەك, «Smart Aqkol» جوباسى پرەزيدەنت نۇرسۇلتان نازارباەۆتىڭ تاپسىرماسى بويىنشا «تسيفرلى قازاقستان» مەملەكەتتىك باعدارلاماسى اياسىندا جۇزەگە اسىرىلعان.
وندا بارلىق دەرەكتەر ديسپەتچەرلىك زالى, مونيتورينگىلەۋگە ارنالعان بەينەقابىرعاسى جانە بەينەكونفەرەنتسبايلانىس جۇيەسى, call-ورتالىعى بار وبەكتىگە – احۋالدىق ورتالىققا كەلىپ تۇسەدى.
احۋالدىق ورتالىق ۆەدومستۆوارالىق ءوزارا ءىس-قيمىلدى ۇيىمداستىرۋ, قالا ءومىرىن تاكتيكالىق جانە ستراتەگيالىق باسقارۋ, قالا رەسۋرستارى تۋرالى دۇرىس جانە ءوز ۋاقىتىنداعى دەرەكتەردى اگرەگاتتاۋ, قاۋىپسىزدىكتى قامتاماسىز ەتۋ بويىنشا شەشىمدەردى كورسەتۋ ءۇشىن قاجەتتى ينفراقۇرىلىممەن جابدىقتالعان. دەرەكتەردى جيناۋ جانە وڭدەۋ بۋنكەرلىك تيپتەگى «قازاقتەلەكوم» اق دەرەكتەردى وڭدەۋ ورتالىعىندا جۇرگىزىلەدى, ال بۇل قاۋىپسىزدىك پەن تۇراقتى جۇمىس ىستەۋدىڭ جوعارى دەڭگەيىن قامتاماسىز ەتۋ تۇرعىسىنان بىرەگەي بولىپ تابىلادى.