قاراعاندىعا جۇمىس ساپارىمەن كەلگەن دەنساۋلىق ساقتاۋ ءمينيسترى ەلجان ءبىرتانوۆ وبلىس اكىمى ەرلان قوشانوۆ جانە وبلىستىق دەنساۋلىق ساقتاۋ باسقارماسىنىڭ باسشىسى ەرجان نۇرلىباەۆپەن بىرگە وڭىردە مىندەتتى مەديتسينالىق ساقتاندىرۋ جۇيەسىن ەنگىزۋگە ازىرلىك بارىسىن تالقىلادى.
اتالعان جۇيە ەلىمىزدىڭ باسقا وڭىرلەرىندە 2020 جىلدىڭ باسىنان باستاپ ىسكە قوسىلاتىن بولسا, قاراعاندى وبلىسى ءۇشىن وسى جىلدىڭ 1 قىركۇيەگىنەن باستالادى. سوندىقتان, بۇل اۋقىمدى شارۋاعا دەگەن ازىرلىك بارىسى كۇن تارتىبىندە وتكىر تۇرعان ماسەلەنىڭ ءبىرى.
جوبانى سىنامالى رەجىمدە قاراعاندى وبلىسىندا ەنگىزۋ تۋرالى شەشىمنىڭ وزىندىك سەبەپتەرى بار. مىسالى, مۇنداعى مەديتسينالىق مەكەمەلەردىڭ تۇگەلگە دەرلىگى كەشەندى مەديتسينالىق اقپاراتتىق جۇيەگە كوشىرىلگەن. ياعني, بۇل ەمدەلۋشىلەردىڭ دياگنوزدارى, تاعايىندالعان ءدارى-دارمەكتەر مەن راسىمدەر تۋرالى بارلىق دەرەكتەر بىرىڭعاي دەرەكقوردا ساقتالادى دەگەن ءسوز. مىنە, وسىنداي دايىن دۇنيەنىڭ ارقاسىندا وڭىردە ءمامس جۇيەسىن ەنگىزۋ وڭايعا تۇسەتىن ءتۇرى بار.
مينيستر ەلجان ءبىرتانوۆ مىندەتتى مەديتسينالىق ساقتاندىرۋ جۇيەسى تۋرالى كەڭىنەن اڭگىمەلەپ بەردى.
– ءمامس دەگەنىمىز قوردا جيناقتالعان قاراجاتتىڭ ەسەبىنەن ساقتاندىرىلعان ازاماتتارعا عانا كورسەتىلەتىن مەديتسينالىق قىزمەتتەردىڭ قوسىمشا پاكەتى. بۇل توپتاماعا توموگرافيا, سالالىق مامانداردىڭ كەڭ اۋقىمدى كەڭەس بەرۋى, تەگىن ءدارى-دارمەك ءتىزىمىن ۇلعايتۋ سياقتى قىزمەتتەر كىرەدى. بۇگىنگى تاڭدا ءبىز ءاربىر ءۇشىنشى رەتسەپتۋرالىق ءدارى-دارمەكتى بيۋدجەتتەن تولەيمىز. بىرتە-بىرتە بارلىق رەتسەپتۋرالىق ءدارى-دارمەكتەر تەگىن نەمەسە سۋبسيديالاۋمەن بەرىلەتىن بولادى, – دەدى ول.
جالپى, مەديتسينالىق ساقتاندىرۋ جۇيەسىن تەستىلىك رەجىمدە ەنگىزۋگە رەسپۋبليكالىق بيۋدجەتتەن 2,3 ملرد تەڭگە بولىنگەن. جۇرگىزىلەتىن سىناق جۇيەدەگى بارلىق كەمشىلىكتەردى انىقتاۋعا جانە ولاردى 1 قاڭتارعا دەيىن جەدەل تۇزەۋگە مۇمكىندىك بەرەدى. نورماتيۆتىك-قۇقىقتىق بازاعا, اقپاراتتىق جۇيەلەردىڭ دايىندىعىنا, مەديتسينالىق قىزمەت تۇتىنۋشىلارىن ەسەپكە الۋعا, ساتىپ الۋ جانە تولەۋ ادىستەرىن جەتىلدىرۋگە ەرەكشە ءمان بەرىلەدى.
سونداي-اق, قاراعاندى وبلىسىندا سىنامالى جوبا اياسىندا Saqtandyrý باعدارلاماسى اپروباتسيالانادى, ول مىندەتتى مەديتسينالىق ساقتاندىرۋ جۇيەسىندە ەمدەلۋشىنىڭ مارتەبەسىن انىقتاۋعا مۇمكىندىك بەرەدى.
دەنساۋلىق ساقتاۋ مينيسترلىگىنىڭ مالىمەتىنشە, جوبانى باسقارۋعا 2,3 ملرد تەڭگە بولىنگەن. بۇل قارجى 175 مىڭنان استام ادامعا جۇرەك-قانتامىر جۇيەسى, قانت ديابەتى, گلاۋكوما جانە ۆيرۋستىق گەپاتيت اۋرۋلارىن ەرتە انىقتاۋ ءۇشىن الدىن الۋ تەكسەرۋلەر جۇرگىزۋ ءۇشىن جەتكىلىكتى. سونىمەن قاتار, ينسۋلت, ينفاركت, اۋىر جاراقات نەمەسە كۇردەلى وتا جاساعان ادامدار ءۇشىن مەديتسينالىق وڭالتۋ قىزمەتى ۇسىنىلادى.
مىندەتتى مەديتسينالىق ساقتاندىرۋ جۇيەسىن ەنگىزۋ ساقتاندىرۋدىڭ بولۋى نەمەسە بولماۋىنا قاراماستان, بارلىق ازاماتتارعا كورسەتىلەتىن قولجەتىمدى تەگىن مەديتسينالىق قىزمەتتەردىڭ كۇشىن جويمايدى. مۇنداي قىزمەتتەر قاتارىنا جەدەل جاردەم شاقىرۋ, اۋرۋحاناعا شۇعىل جاتقىزۋ جانە باسقالارى ەنەدى. تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا قاراعاندى وبلىسىنىڭ تۇرعىندارىنا جىلىنا 5,6 ملن تەڭگەنىڭ قىزمەتى كورسەتىلەدى دەپ جوسپارلانعان.
ايتا كەتۋ كەرەك, بۇگىنگى كۇندە قاراعاندى وبلىسى بويىنشا جۇمىس ىستەيتىن 549 مىڭ ازامات مىندەتتى مەديتسينالىق ساقتاندىرۋ جۇيەسىنە جارنا تولەدى. تولەمدەردىڭ جالپى سوماسى 15,4 ملرد تەڭگەنى قۇرايدى.
جيىن بارىسىندا وبلىس اكىمى ەرلان قوشانوۆ جوبانى ىسكە اسىرۋ دايىندىعىنىڭ تىڭعىلىقتى جۇرگىزىلىپ جاتقانىن جەتكىزدى.
– تسيفرلاندىرۋدىڭ جوعارى دەڭگەيى قامتاماسىز ەتىلگەن, بارلىق تۇرعىنداردىڭ ەلەكتروندىق دەنساۋلىق تولقۇجاتى بار. سونداي-اق, كەي جاعدايدا بيزنەستى تارتا وتىرىپ دەنساۋلىق ساقتاۋ نىساندارىن جىلدامداتا جاڭعىرتۋ جۇرگىزىلۋدە. ءبىز مەديتسينالىق كادرلاردىڭ جەتىسپەۋشىلىگى ماسەلەسىن ماقساتتى تۇردە شەشۋدەمىز. اعىمداعى جىلى 500-گە جۋىق جاس مامان كەلەدى دەپ كۇتىپ وتىرمىز. ءمامس جۇيەسىندە ازاماتتاردىڭ مارتەبەسىن تولىق وزەكتەندىرۋ جۇرگىزىلدى, وبلىس تۇرعىندارىنىڭ 2%-ءىن جۇمىلدىرۋ عانا قالدى, – دەپ باياندادى ءوڭىر باسشىسى.
قاراعاندى وبلىسى