قالادا بالالاردىڭ جاراقات الۋى مەن ولىمىنە اكەلىپ سوعاتىن نەگىزگى سەبەپتەردىڭ ءبىرى - تەرەزەدەن قۇلاۋ وقيعاسى. كوپ جاعدايدا 2 جاستان 7 جاسقا دەيىنگى بالالار تەرەزەدەن قۇلاۋ قاۋىپ-قاتەرىنە ءجيى ۇشىرايدى, بۇل جاستاعى بالالار تەرەزە الدىندا ويناۋدىڭ قانشالىقتى قاۋىپتى ەكەنىن تۇسىنەتىن جاستا ەمەس. قايعىلى جاعداي بولماس ءۇشىن نە ىستەۋ كەرەك ەكەندىگىن نۇر-سۇلتان قالاسى اكىمدىگىنىڭ رەسمي سايتى جازدى.
نۇر-سۇلتان قالاسىنىڭ تجد اقپاراتىنا سايكەس, 2019 جىلدىڭ باسىنان ەلوردادا 14 جاعداي تىركەلگەن (2018-21), ونىڭ ىشىندە 1 جاعداي ولىممەن اياقتالدى (2018-8), 13 ادام اۋرۋحاناعا جەتكىزىلدى (2018-13).
كوپ جاعدايدا بالالاردىڭ قۇلاۋى ولاردىڭ اتا-اناسىنىڭ قاراۋىنسىز قالۋى سەبەبىنەن ورىن الادى. قاسىرەتتىڭ الدىن الۋ ءۇشىن, قۇتقارۋشىلار كىشكەنتاي بالالاردى جالعىز قالدىرماۋعا كەڭەس بەرەدى. سونىمەن بىرگە بارلىق جيھازداردى بالا تەرەزە الدىنا شىعا المايتىنداي ەتىپ, تەرەزە جانىنان الشاق قويۋدى ۇسىنادى.
تەرەزەدەگى موسكيتتىك تورلارعا سەنبەۋ كەرەك. ولار قۇلاۋدان ساقتاۋعا ارنالماعان. كەرىسىنشە, موسكيتتىك تور قايعىلى جاعدايدىڭ ورىن الۋىنا اكەلىپ سوعادى, بالالار موسكيتتىك تورلاردى قاۋىپسىز دەپ ويلايدى جانە تەرەزەگە سۇيەنگەندەي سول تورلارعا سۇيەنەدى. ەڭ ساپالى توردىڭ ءوزى بالانىڭ سالماعى مەن قىسىمدى كوتەرە المايدى.
ەگەر بالاڭىز بولمەدە بولسا, تەرەزەنى جانە بالكون ەسىگىن اشپاڭىز. جوعارعى جەلدەتكىشتەردى نەمەسە تىك جەلدەتۋ رەجيمىن پايدالانىڭىز. بالا تەرەزەنى ءوز ەركىمەن اشا الماۋ ءۇشىن تەرەزەگە ارنايى بەكىتكىشتەر ورناتۋ قاجەت.
ەگەر ءسىز بالاڭىزعا تەرەزەدەن ءبىر نارسە كورسەتەتىن بولساڭىز, ونى مىقتاپ ۇستاڭىز, بالانىڭ شۇعىل قيمىلدارىنا دايىن بولىڭىز, الاقاندى قۇرعاق ۇستاڭىز, بالانى كيىمنەن ۇستاماڭىز.
بالالارعا قاۋىپسىزدىك ساباقتارىن ۇيرەتىڭىز.
بالالاردىڭ ۇلكەندەرىن وزىنەن كىشىلەرىنە قاراۋعا ۇيرەتىڭىز.