حاكىم ابايدىڭ قازىرگى كۇنتىزبەگە سايكەس, ياعني 23 تامىز – تۋعان كۇنى قارساڭىندا ۇلتتىق اكادەميالىق كىتاپحانا اباي پوەزياسىنىڭ 130 جىلدىعىنا ارنالعان دوڭگەلەك ۇستەل وتكىزدى.
بيىل ابايدىڭ 1889 جىلى جازعان ولەڭدەرىنە 130 جىل تولادى. وسى داتانىڭ اياسىندا وتكىزىلگەن ادەبي جيىننىڭ مودەراتورى, ابايتانۋشى الماحان مۇحامەتقاليقىزىنىڭ سوزىنە سۇيەنسەك, 130 جىل بۇرىن ابايدىڭ 10 ولەڭى كوپشىلىككە ءوز اتىنان تاراعان. «بيىل ابايدىڭ 10 ولەڭىنە 130 جىل تولادى. اتاپ ايتساق, «ەسىڭدە بار ما جاس كۇنىڭ», «جۇرەگىم مەنىڭ قىرىق جاماۋ», «ادام ءبىر بوق كوتەرگەن بوقتىڭ قابى», «كۇشىك اسىراپ يت ەتتىم», «سۇيسىنە المادىم, سۇيمەدىم», «دۇتبايعا», «نۇرلى اسپانعا تىرىسىپ وسكەنسىڭ سەن» ولەڭدەرى مەن م.لەرمونتوۆتان اۋدارعان «جالاۋ», «جارتاس», «جۇرەكتە كوپ قازىنا بار, ءبارى جاقسى» سياقتى تۋىندىلارى جارىق كورگەن», دەيدى عالىم.
ايتۋلى شاراعا ابايتانۋشى مەكەمتاس مىرزاحمەتوۆ, قر جازۋشىلار وداعىنىڭ توراعاسى ۇلىقبەك ەسداۋلەت, قوعام قايراتكەرى عاريفوللا ەسىم, جازۋشىلار وداعىنىڭ نۇر-سۇلتان قالالىق فيليالىنىڭ ديرەكتورى داۋلەتكەرەي كاپ ۇلى, ابايتانۋشى, پروفەسسور ابدىجالەل باكىر, فيلولوگيا عىلىمدارىنىڭ كانديداتى ەربول تىلەشوۆ, اقىن ساعىمباي جۇماعۇلوۆ باستاعان زيالى قاۋىم وكىلدەرى قاتىستى.
جيىندا ءسوز العان عالىم مەكەمتاس مىرزاحمەتوۆ: «ابايدى جاتتاۋ بار دا, ءتۇسىنۋ بار. جاتتاۋدان الدىمىزعا جان سالماي جۇرسەك تە, كوبىنەسە تۇسىنبەي قالامىز. ونىڭ سەبەبى كوپ. ابايدىڭ رۋحاني الەمى مەن پالساپالىق ليريكاسىنا ەۋروپا دا, شىعىس تا جەتە الماعان. قازىر الەمدىك دۇنيەتانىم وزگەردى. ابايدان قالعان «تولىق ادام ءىلىمى» دەيتىن ۇلى مۇرا بار. قازىر وسى ءىلىم قازاقستانداعى 8 ۋنيۆەرسيتەتتە وقىتىلىپ جاتىر. سونىڭ مونوگرافياسىن جازىپ ءبىتىردىم. ءتۇبى بۇل ءىلىمدى بۇكىل الەم زەرتتەپ, وقيتىن بولادى. سەبەبى ونداي تەرەڭ ءىلىم ەۋروپادا دا, مىنا ىرگەدەگى قىتايدا دا جوق», دەدى ابايتانۋشى.
#Abai175 چەللەندجىنە ءۇن قوسىپ, قر پرەزيدەنتى قاسىم-جومارت توقاەۆقا پوەزيا ەستافەتاسىن ۇسىنعان لايلىم-شىراق ەرلانقىزى دا دوڭگەلەك ۇستەلگە قاتىسىپ, ۇلى اقىننىڭ ولەڭىن مانەرلەپ وقىدى.