«KITAP FEST 2019» تۇڭعىش رەت ەلوردادا ءوتتى

كىتاپ جارمەڭكەسىنە 20 دۇكەن, باسپا جانە ينتەرنەت-دۇكەندەر قاتىسىپ, كىتاپسۇيەر قاۋىمعا فەستيۆال اياسىندا ارنايى جەڭىلدىكتەر ۇسىندى. سونداي-اق, شارا بارىسىندا «I BOOK YOU» كىتاپ الماسۋ جوباسى جۇزەگە اسىرىلىپ, قوناقتار وزدەرىنىڭ وقىعان كىتاپتارىن وقىماعان كىتاپتارعا اۋىستىرىپ الىپ جاتتى.

«ورتالىقتاندىرىلعان كىتاپحانا جۇيەسىنەن تەگىن كىتاپتار ۇسىنىلادى. ولاردىڭ سانى شەكتەۋلى بولعاندىقتان, الىپ ۇلگەرۋ كەرەك. ءوز كىتاپتارىڭىزدى اكەلىپ, وقىماعان كىتاپتارعا الماستىرۋعا بولادى», دەدى «KITAP FEST 2019» جوباسىنىڭ باس ۇيلەستىرۋشىسى مايرا ءالجانوۆا.

ەسىل جاعالاۋىنداعى جاس جەتكىنشەكتەرگە كورسەتىلگەن ويىن-ساۋىق باعدارلامالارى مەن  شەبەرلىك سىنىپتار بالا-وقىرمانداردىڭ كوڭىل اۋلاپ, ەرەكشە اتموسفەرا سىيلادى.

وقىرماندار «جازۋشىلار شاتىرىندا» قازىرگى اۆتورلارمەن تانىسىپ, جاڭا كىتاپتاردىڭ تۇساۋكەسەرىنە قاتىستى. وندا پيانينوشى, قازاقستاننىڭ حالىق ءارتىسى ءجانيا اۋباكىروۆا «ۆارياتسي نا تەمى» كىتابى تۋرالى ايتسا, فيلوسوفيا عىلىمدارىنىڭ كانديداتى زيرا ناۋرىزباەۆا ء«تورت بۇلت» اتتى ەڭبەگىن تانىستىردى. «100 جاڭا ەسىم» جوباسىنىڭ لاۋرەاتى ايديە ايداربەكوۆا «مەنىڭ تەڭىزىم – سەنىڭ اسپانىڭ» اتتى ولەڭدەر جيناعىنىڭ تۇساۋىن كەسىپ, اقىن  ايجان تاباراكقىزى «سەن جىلاماشى» كىتابى حاقىندا كورەرمەنمەن وي ءبولىستى. ستسەناريست زاۋرە تورەحانوۆا «امينا تۇران نومادتار ەلىندە» رومانىن ۇسىنىپ, ساياحاتشى تينكاي كرەتوۆا كوپشىلىككە «قازاقستاندىق» اتتى جاڭا كىتابىن باياندادى.

«جازۋشىلار شاتىرىنىڭ» ارنايى قوناعى – اقان ساتاەۆتىڭ «توميريس» فيلمىندە ويناعان اكتريسا الميرا تۇرسىن جازۋشى بولات جانداربەكوۆتىڭ «توميريس» شىعارماسىنان ءۇزىندى وقىدى.

«وffline كىتاپتار تۋرالى» اتتى شاتىردا قوعام قايراتكەرلەرى, جۋرناليستەر, كاسىپكەرلەر, اتاپ ايتساق, بلوگەرلەر وركەن كەنجەبەك, اينا دوسمۇحامبەتقىزى, دينارا بولات, پوليتولوگ, ورتالىق كوممۋنيكاتسيالار قىزمەتىنىڭ باسشىسى تالعات قاليەۆ ءتۇرلى وزەكتى تاقىرىپتا ءسوز قوزعادى.

بيىل ەلوردا حالقىنا العاش رەت ۇسىنىلعان «KITAP FEST» جوباسى بۇعان دەيىن الماتىدا بەس جىل قاتارىنان وتكىزىلگەن بولاتىن. ۇيىمداستىرۋشىلاردىڭ سوزىنشە, وسى ۋاقىت ارالىعىندا اتالعان شارا قاراپايىم كىتاپ الماسۋ اكتسياسىنان جۇرتشىلىقتىڭ سۇيىسپەنشىلىگىنە بولەنگەن مادەني-تانىمدىق شاراعا اينالعان. بەس جىلدىڭ ىشىندە وسى الاڭدا اۆتورلار مەن باسپالاردىڭ قاتىسۋىمەن 130 كىتاپتىڭ تۇساۋى كەسىلىپ, 20 مىڭ كىتاپ قوناقتارعا سىيلانعان. 70 كىتاپ دۇكەنى جارمەڭكەگە قاتىسىپ, 45 بلوگەر سۇيىكتى كىتاپتارىمەن بولىسكەن.

«شارانىڭ ماقساتى – جۇرتشىلىقتى كىتاپ وقۋعا شاقىرىپ, قازاقستاندىق اۆتورلار مەن باسپالارعا قولداۋ كورسەتۋ. بۇل جاس جانە اعا بۋىن اۆتورلارلاردىڭ ءوز كىتاپتارىن ۇسىناتىن جالعىز الاڭ دەۋگە بولادى. مۇندا ولار كىتاپتارى تۋرالى ايتىپ, قىزىعۋشىلىق تانىتقان باسپالار مەن كىتاپ دۇكەندەرىن تابا الادى», دەپ اتاپ ءوتتى مايرا ءالجانوۆا.

جاستار جىلى اياسىندا ءوتىپ جاتقان اتالمىش كىتاپ جارمەڭكەسىن قالالىق اكىمدىكتىڭ قولداۋىمەن «استانا جاستارى» مەملەكەتتىك مەكەمەسى, «BAURZHAN» جەكە قورى, «ABAYbooks» باسپا ءۇيى ۇيىمداستىرىپ وتىر.