بۇگىندە وبلىستاعى اۋىل شارۋاشىلىق ماقساتىنداعى جەرلەردىڭ كولەمى 7 ميلليون گەكتار بولسا, 4,9 ميلليون گەكتارىن ەگىستىك القاپتار, 1,9 ميلليون گەكتارىن جايىلىمدىق جەرلەردى قۇرايدى.
سوڭعى بەس جىلدىڭ ىشىندە جالپى اۋماعى 2,9 ملن. گەكتارعا 1887 تەكسەرۋ جۇرگىزىلىپ, جەر زاڭناماسىن بۇزۋدىڭ 985 دەرەگى تىركەلگەن. تەكسەرۋ ناتيجەلەرى بويىنشا جالداۋ شارتتارى بۇزىلىپ, 658,3 مىڭ گەكتار جەر مەملەكەت مەنشىگىنە قايتارىلعان.
قاراۋسىز قالدىرۋ سالدارىنان دۇرىس يگەرىلمەي وتىرعان القاپتار ءالى دە جەتەرلىك. بيىل 316 تەكسەرۋ جۇرگىزىلىپ, جارتىسىنا جۋىعىندا زاڭدى بەلدەن باسۋ اشكەرەلەنگەن. 5392 گەكتار اۋىل شارۋاشىلىق جەرى بويىنشا كەلىسىم- شارتتار كۇشىن جويىپ, 10,6 مىڭ گەكتارى مەملەكەت مەنشىگىنە وتكەن. قازىرگى ۋاقىتتا 3 شارۋاشىلىقتىڭ 20 مىڭ گەكتاردان استام يگەرىلمەگەن القاپتارىن قايتارۋ سوتتا قارالۋدا.
جەر ينسپەكتسياسى باسقارماسىنىڭ باسشىسى بەيبىتبەك جايلىباەۆتىڭ ايتۋىنشا, اۋدانداردا 107 تەكسەرۋ جۇرگىزىلىپ, 5 ميلليون تەڭگە ايىپپۇل سالىنعان.
«يگەرىلمەي بوس جاتقان جەرلەردى مەملەكەتتىك قورعا قايتارۋ جۇمىستارى وبلىس ورتالىعىندا دا ءوز شەشىمىن تاۋىپ كەلەدى. جالپى اۋماعى 2,5 گەكتار 10 ۋچاسكە الىندى. تاعى 20 جەر تەلىمىن پايدالانۋشى ءوز ەركىمەن قايتاردى. «شىعىس ەليون» جشس جەر ۋچاسكەسىن 20 جىلدان ارتىق يگەرمەگەن. بۇل ورىنعا ەندى كوپبەيىندى 500 ورىندى اۋرۋحانا سالىنادى. وبلىس ورتالىعىندا كوپتەگەن جەرلەر بوس. كاسىپكەرلەر ول ۋچاسكەلەردى ءبىر-بىرىنە ساتىپ كەلگەن. ماقساتتى پايدالانىلماعاندىقتان بۇل جەرلەر قايتارىلادى, ول ايماقتارعا ساۋلەتتى عيماراتتار تۇرعىزىزىلىپ, جۇمىس ورىندارىن اشاتىن كاسىپكەرلەرگە بەرىلەدى», دەيدى ول.
باسقارمانىڭ مالىمەتىنشە, سوڭعى 5 جىلدىڭ ىشىندە جەر زاڭناماسى نورماسىن بۇزۋشىلارعا 1024 نۇسقاما بەرىلىپ, جالپى سوماسى 64 ملن. تەڭگەگە 621 اكىمشىلىك جازا قولدانىلعان. جەردى يگەرمەگەندەرگە سالىق 10 ەسە ۇلعايتىلادى. بۇگىنگى كۇنگە دەيىن 442,1 ملن. تەڭگە مولشەرىندە سالىق سالىنسا, ونىڭ 38,5 ميلليوندايى بيىلعى جىلعا تيەسىلى.
سولتۇستىك قازاقستان وبلىسى