بۇگىن ۇكىمەتتە وتكەن ءباسپاسوز كونفەرەنتسياسىندا Nur Otan پارتياسىنىڭ مۇشەسى, «ۇلتتىق عىلىمي كارديوحيرۋرگيا ورتالىعى» اق باسقارما توراعاسى يۋري پيا باق وكىلدەرىنە قر تۇڭعىش پرەزيدەنتى – ەلباسى ن. ءا. نازارباەۆتىڭ بيىل 21 تامىزدا Nur Otan پارتياسىنىڭ ساياسي كەڭەسىنىڭ كەڭەيتىلگەن وتىرىسىندا العا قويعان مىندەتتەرى قالاي ىسكە اسىرىلىپ جاتقانى تۋرالى ايتىپ بەردى. بۇل تۋرالى primeminister.kz حابارلادى.
«تۇڭعىش پرەزيدەنت تەحنولوگيالار مەن جوعارعى زەردەنى دامىتۋ مەن ەنگىزۋ ماسەلەسىنە ۇلكەن كوڭىل ءبولدى. تەحنولوگيالار ءبىزدىڭ ومىرىمىزگە بارىنشا ەنگىزىلگەن دەۋگە بولادى. جاساندى جۇرەكتى جانداندىرۋ مەن سىمسىز ەنەرگيا تاراتۋ بويىنشا الەمدەگى العاشقى وپەراتسيا 2018 جىلدىڭ 15 جەلتوقسانىندا قازاقستاندا ءبىزدىڭ ورتالىقتا جاسالدى. ءبىز بۇل تەحنولوگيا مەديتسينادا العاش رەت تاجىريبەگە ەنگىزىلگەن ەل رەتىندە تاريحقا ەندىك. مەنىڭ ويىمشا, ءبىز جاساندى زەردەنىڭ دامۋىنىڭ كۋاگەرلەرى بولامىز», — دەدى« ۇلتتىق عىلىمي كارديوحيرۋرگيا ورتالىعى» اق باسقارما توراعاسى يۋري پيا.
ساياسي كەڭەستىڭ وتىرىسىندا قر تۇڭعىش پرەزيدەنتى – ەلباسى ن. نازارباەۆ قازاقستان جاساندى زەردەنى قولداۋ ماقساتىندا اۋقىمدى جانە جۇيەلى شارالاردى قابىلداۋى كەرەك ەكەنىن اتاپ ءوتتى.
«تەحنولوگيا مەن مەديتسينانىڭ ءوزارا بايلانىسۋىنا جول اشىلدى. قازىر ءبىز ءوز ورتالىعىمىزدا دامىعان ەلدەردىڭ – ەۋروپا, اقش, كانادا, وڭتۇستىك-شىعىس ازيا ەلدەرىنىڭ ازاماتتارى ءۇشىن قولجەتىمدى بارلىق جوعارى تەحنولوگيالىق وپەراتسيالاردى جاساي الامىز», — دەدى يۋري پيا.
ەسكە سالا كەتەيىك, بيىل 21 تامىزدا نۇر-سۇلتان قالاسىندا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ پەن مەملەكەت باسشىسى قاسىم-جومارت توقاەۆتىڭ قاتىسۋىمەن Nur Otan پارتياسى ساياسي كەڭەسىنىڭ كەڭەيتىلگەن وتىرىسى ءوتتى.