اقمولالىق پوليتسەيلەر دامسا اۋىلىنداعى قارتتار ۇيىنە بارىپ قايتتى. ءجىلىجۇزدى جۇزدەسۋدەن كەيىن ناۋچنىي ەلدى مەكەنىندەگى جاڭا ۋچاسكەلىك پوليتسيا بەكەتىنىڭ اشىلۋ سالتاناتىنا قاتىستى.
قازىرگى كۇنى قارتتار ۇيىندە 46 قاريا تۇرىپ جاتىر. اتالمىش مەكەمە قىزمەتكەرلەرى قارتتار ۇيىندەگى الەۋمەتتىك-تۇرمىستىق جاعدايمەن تانىستىرىپ, قاريالاردىڭ تىنىس-تىرشىلىگىن, ولارعا جاسالىپ وتىرعان قامقورلىقتى كورسەتتى. مۇندا ەگدە ادامدارعا جاپ-جاقسى جاعداي جاسالعان. ءسال تاراتىپ ايتاتىن بولساق, ەڭبەك تەراپياسى كابينەتىندە زەينەتكەرلەر شىعارماشىلىق قابىلەتتەرىن شىڭداي الادى. ال مەكەمە اۋماعىنداعى جىلىجايدا قيار, قىزاناق, كادى ەگەدى. ونىڭ ءدامىن وزدەرى تاتادى. ءومىر بولعان سوڭ تاعدىر جولى دا سانالۋان. وسى جەردە شاڭىراق كوتەرىپ جاتاتىندار دا بار ەكەن.
كەزدەسۋ بارىسىندا قاريالارعا ارنايى سىي-سياپات جاسالىپ, ەسكىنىڭ ەستى اندەرى شىرقالعان كوڭىلدى كونتسەرت ۇيىمداستىرىلدى. ورتالىقتا زەينەتكەرلەردەن باسقا ءتيىستى مەديتسينالىق قىزمەت الىپ جاتقان مۇگەدەك جاندار دا تۇرادى.
قۇقىق قورعاۋ قىزمەتكەرلەرىنىڭ جۇمىس ساپارى بارىسىندا ۋچاسكەلىك پوليتسيا بەكەتىنىڭ اشىلۋ سالتاناتىنا قاتىستى. مەكەمە كومپيۋتەرلىك تەحنولوگيالارمەن, بايلانىس قۇرالدارىمەن جابدىقتالعان.