الماتى قالاسى اكىمىنىڭ اپپاراتىندا مەملەكەتتىك قىزمەت ىستەرى دەپارتامەنتىنىڭ ۆەدومستۆوارالىق جۇمىس توبىنىڭ وتىرىسى ءوتتى. وتىرىستىڭ باس مودەراتورى الماتى قالالىق مەملەكەتتىك قىزمەت ىستەرى جونىندەگى دەپارتامەنت ديرەكتورىنىڭ ورىنباسارى, جۇمىس توبىنىڭ ءتورايىمى شىناراي ءالىمحاننىڭ ايتۋىنشا, كەرەكتى قۇجاتتىڭ ەلەكتروندى نۇسقاسىن پايدالانۋ ارقىلى قاعازباستىلىق ارتتا قالىپ, حالىققا قىزمەت كورسەتۋ ساپاسى ارتىپ كەلەدى. بۇل – ەلەكتروندى ۇكىمەتتىڭ يگىلىگى. ال ەلەكتروندى قۇجات – ەكونوميكانى دامىتۋدىڭ نەگىزگى تەتىگى ەكەنى انىق.
قازاق ۇكىمەتى 2019 جىلى مەملەكەتتىك قىزمەت كورسەتۋدى 80, 2020 جىلى 90 پايىزىن اۆتوماتتاندىرۋعا كوشۋدى تاپسىرعان بولاتىن. 2019 جىلدىڭ ءبىرىنشى جارتىسىندا جەرگىلىكتى اتقارۋشى ورىندارى ۇسىنعان 181 قىزمەت ءتۇرىنىڭ 121-ءى ەلەكتروندى ۇكىمەت فورماتىندا كورسەتىلگەن.
كوميسسيا مۇشەلەرى جەرگىلىكتى جانە اۋماقتىق ورگاندار ۇسىناتىن بىرقاتار ەلەكتروندىق قىزمەتتەردىڭ قول جەتىمسىزدىگىنىڭ سەبەپتەرىن باقىلاۋدى اياقتاۋ قاجەتتىلىگى تۋرالى ۇسىنىس جاسادى. ءتيىستى ۇسىنىستار بار حاتتى مەملەكەتتىك قىزمەت ىستەرى اگەنتتىگىنە جىبەرۋ ۇسىنىلدى. سونداي-اق, وتىرىستا الماتى قالاسى بويىنشا ەڭبەك كوميتەتىنىڭ الماتى قالاسى بويىنشا دەپارتامەنتىنىڭ الماتى قالاسىنداعى قىزمەت كورسەتۋشىلەردىڭ عيماراتتارىندا مۇمكىندىگى شەكتەۋلى ازاماتتارعا جاعداي جاساۋ بويىنشا جۇرگىزىلىپ جاتقان جۇمىستارى تۋرالى اقپارات تىڭدالدى. وتىرىس بارىسىندا بارلىق مەملەكەتتىك مەكەمەلەردە ازاماتتارعا جۇگىنگەن كەزدە مەملەكەتتىك قىزمەتتەردى ساپالى كورسەتۋ ءۇشىن جەتكىلىكتى جاعدايلار جوق ەكەندىگى بەلگىلى بولدى. وسىعان بايلانىستى, الماتىداعى ەڭبەك كوميتەتىنىڭ دەپارتامەنتىنە قىزمەت كورسەتۋشىلەردىڭ عيماراتتارىندا مۇمكىندىگى شەكتەۋلى ادامدار ءۇشىن جاعدايلاردىڭ بولۋىن باقىلاۋ شارالارىن قابىلداۋ ۇسىنىلدى.
الماتى قالالىق مەملەكەتتىك قىزمەت ىستەرى جونىندەگى دەپارتامەنتتىڭ مامانى سامات ۇمبەتاليەۆ ءوز سالاسى بوينىشا الماتى قالاسى بويىنشا جاعدايدى ساراپتاپ ءوتتى. قازىر مەملەكەتتىك جانە جەكە سەكتورداعى 128 ۇيىمنىڭ 39 ەلەكتروندى فورماتقا تارتىلماپتى. حالىقتىڭ باسىم بولىگىنىڭ تسيفرلىق ساۋاتتىلىق ماسەلەسىنە اسا دەن قويا بەرمەۋى دە ەلەكتروندى ۇكىمەت فورماتىنىڭ دامۋىنا قول بايلاۋ بولىپ وتىر ەكەن. جالپى كورسەتكىشتە تۇرعىنداردىڭ ەلەكتروندى ۇكىمەت قىزمەتىنە جۇگىنۋ ەمەس, حالىققا قىزمەت كورسەتۋ ورتالىقتارىنا بارۋعا باسىمدىق بەرەتىنى بايقالعان.
«قازىر حالىققا قىزمەت كورسەتۋ ورتالىقتارىندا مامانداردىڭ جەتىسپەيتىنى سەزىلىپ ءجۇر. سەبەبى جالاقى از جانە جۇمىس اۋىر. الداعى ۋاقىتتا ەلەكتروندى قىزمەت ءتۇرىن وڭتايلاندىرىپ, حالىققا بارىنشا جاقىن جانە تۇسىنىكتى فورماتتا ۇسىنباساق, جاعداي قيىندايىن دەپ تۇر» دەپ اتاپ ءوتتى سامات ۇمبەتاليەۆ.
الماتى قالالىق اكىمدىگىنىڭ وكىلى دارحان احمەتوۆ الماتى قالاسى ەلەكتروندى ۇكىمەت فورماتىنا كوشۋدە كوش باستاپ وتىرعانىن ايتىپ ءوتتى. ءتىپتى الماتى بۇل رەتتە نۇر-سۇلتانعا قالاسىنا دا ۇلگى بولادى ەكەن.
IV توقساندا الماتى ەلەكتروندى فورماتقا كوشۋدى اياقتاۋى ءتيىس. «تەحنيكالىق پروبلەما – ىشكى پروبلەما. ءبىز ونى ءوزىمىز شەشۋىمىز كەرەك. بۇل سىرتقا اسەر ەتپەۋى ءتيىس», دەپ اتاپ ءوتتى دارحان احمەتوۆ.
ساياساتتانۋشى, بلوگەر مارات شيبۇتوۆ وزىنە دەيىن سويلەگەن سپيكەردىڭ ءسوزىن قولدايتىنىن اشىپ ايتتى. ەلەكتروندى ۇكىمەت فورماتىنىڭ نەگىزدەرىن وقىتۋدى مەكتەپتەردە, جوو-لاردا باستاۋ كەرەك. سەبەبى قازىرگى فورماتتى جاسى ەلۋدەن ءوتىپ كەتكەن ازاماتتاردىڭ بىردەن مەڭگەرىپ كەتۋى قيىن. سول سەبەپتى ونىڭ نەگىزدەرىن مەكتەپتە مەكتەپتە وقىماي, بۇكىل حالىقتىق ناسيحاتقا اينالدىرماي ءبىز العا جىلجي المايمىز. «حالىقتىڭ 100 پايىزى بيلىك ورىندارىمەن بايلانىسىن ەلەكتروندى فورماتقا كوشىرمەي بارماق باستى, كوز قىستىدان ارىلا المايمىز», دەيدى مارات شيبۇتوۆ.
جەرگىلىكتى اتقارۋ ورىندارىنىڭ ەلەكتروندى ۇكىمەت فورماتىنا تارتىلماي وتىرۋىنىڭ كەرى ەسەرى تۋرالى وسى جىلدىڭ ءساۋىر ايىندا وتكەن باس قوسۋدا كەڭىنەن تالقىلانعان بولاتىن. تەكسەرۋ ناتيجەلەرى بويىنشا, بارلىق مەملەكەتتىك مەكەمەلەردە ازاماتتار جۇگىنگەن كەزدە مەملەكەتتىك قىزمەتتەردى ساپالى كورسەتۋگە جەتكىلىكتى جاعدايلار جاسالمايتىندىعى انىقتالعان.
وسى كەزدەسۋدىڭ قورىتىندىسى بويىنشا الماتى قالاسىنىڭ ەڭبەك باسقارماسى مەن اكىمدىگىنە قىزمەت بەرۋشىلەردىڭ عيماراتتارىن بەكىتىلگەن ستاندارتتارعا سايكەس كەلتىرۋ تالاپتارىنىڭ ساقتالماۋى سەبەپتەرىن تالداۋ, سونداي-اق ەڭبەك دەپارتامەنتى مەن الەۋمەتتىك دەپارتامەنت قىزمەتكەرلەرىن قوسۋ مۇمكىندىگىن قاراستىرۋ تۋرالى كەڭەس بەرىلدى.
الماتى