قازاقستاندىق «TEMIRADAM» كۋبوگىنىڭ IX كەزەڭى ورال قالاسىندا ءوتتى. قازاقستاننىڭ ءار وڭىرىنەن كەلگەن 30 اۋەسقوي سپورتشى شاعان وزەنىندە 750 مەتر ءجۇزىپ, ورال قالالىق مادەنيەت جانە دەمالىس ساياباعىندا ۆەلوسيپەدپەن 20 كم, جاياۋ 5 كم جۇگىرىپ شىقتى.
العاشقى ءجۇزۋ سايىسىندا-اق جارىستىڭ ىقتيمال جەڭىمپازدارى انىق بولدى. 25-29 جاستاعى ەرلەر اراسىندا 2018 جىلعى TEMIRADAM اتاعىنىڭ يەگەرى الەكساندر حيتروۆ (پاۆلودار وبلىسى), 2018 جىلعى TEMIRADAM كۋبوگىنىڭ يەگەرى دميتري ماشەنتسەۆ (قاراعاندى وبلىسى) جانە مۇرات باتاي (نۇر-سۇلتان) ۇشتىگى وزگەلەردەن وزىق شىقتى. دميتري ماشەنتسەۆ ءجۇزۋ سايىسىندا 13 مينۋت 16 سەكۋندتا بارىنەن بۇرىن كەلدى. بىراق ۆەلوجارىس كەزىندە الەكساندر حيتروۆ قارسىلاسىنان وزىپ شىعىپ, مارەگە دەيىن الدىنا جان سالمادى. ءسويتىپ ول ەرلەر اراسىنداعى ءابسوليۋتتى جەكە ەسەپتە 1 ساعات 09 مينۋت 43 سەكۋند ۋاقىتىمەن ۇزدىك اتاندى.
دوداعا قاتىسقان جالعىز ايەل نۇرگۇل ورىنباسار (اقتوبە وبلىسى) 1 ساعات 44 مينۋت 07 سەكۋندتا مارەگە جەتىپ, ءبىرىنشى ورىننان كورىندى. ال كوماندالىق ەستافەتادا Aksai Sport Club (بقو, ورال) 1 ساعات 13 مينۋت 17 سەكۋندتا سايىستى اياقتاپ, ءبىرىنشى ورىنعا لايىق دەپ تانىلدى.
«TEMIRADAM» كۋبوگىنىڭ كەلەسى كەزەڭى وسكەمەن قالاسىندا وتەدى.
باتىس قازاقستان