قىزىلجار وڭىرىندە جول بويىندا ورنالاسقان قىزمەت كورسەتۋ ورىندارىنىڭ جۇمىسى جۇرتشىلىق كوڭىلىنەن شىعا بەرمەيتىنى كوپتەن بەرى ايتىلىپ كەلدى.
ءتىپتى وبلىستىق اكىمدىكتىڭ وتىرىسىندا بۇل ماسەلە ارنايى تالقىلانىپ, ولقىلىقتاردان قورىتىندى شىعارۋ تالاپ ەتىلگەن بولاتىن. «قازاۆتوجول» ۇك» اق وبلىستىق فيليالىنىڭ باسشىسى بولاتبەك ايتباەۆ بيىل رەسپۋبليكالىق ماڭىزعا يە اۆتوجولداردىڭ بويى تولىق رەتكە كەلتىرىلەتىنىن, اۋقىمدى جوبا جىلى دارەتحانالار قويۋدان باستالاتىنىن جەتكىزدى. ونىڭ ايتۋىنشا, العاشقى لەگى پوكروۆكا, دراگوميروۆكا, روششينسكوە, ساۋمالكول, پرەسنوۆكا, چكالوۆو, كىشكەنەكول ەلدى مەكەندەرىنىڭ, بۋلاەۆ, مامليۋتكا قالالارىنىڭ جانە «جاڭاجول» مەن «قاراقوعا» شەكارا وتكىزۋ بەكەتتەرىنىڭ جانىندا تۇرعىزىلادى.
«دارەتحانالاردى ينۆەستيتسيالىق قارجىعا ورناتۋدى جوسپارلاپ وتىرمىز. كەيىن بۇل نىسانداردى ءوز قاراجاتىمىزعا كۇتىپ ۇستايتىن بولامىز», دەيدى ب. ايتباەۆ.
بۇدان تىسقارى «كوكشەتاۋ-ومبى» اۆتوجولى چكالوۆو ەلدى مەكەنىنىڭ ماڭىندا «Kaz Way» جول پاۆيلونى تۇرعىزىلادى. نىساننىڭ ىشىندە جىلى دارەتحانا مەن اۆتوبۋس ايالداماسى بولماق.
وسىلايشا ءجيى وتكىر سىنعا ۇشىراپ جۇرگەن جول بويىنداعى سەرۆيستىك قىزمەتتىڭ ساپاسى ەلەۋلى تۇردە وزگەرەتىن بولادى.
سولتۇستىك قازاقستان وبلىسى.